تعرفوا.. بعد شويه ماح تقدر تشترى البتاكلوا.. قول ليَّ كيف؟ أقول ليك (الأسود) الخضار المعروف ده.. (فى ناس بسوي ليهم حيرقان( لكنو من أسهل المأكولات التي يمكنك تحضيرها.. فمثلاً يمكنك أن تشوي حبات الأسود على النار ثم تهرسها وتضيف إليها (زبادي أو دكوه) أو لا تضيف فتكون وجبة.. كانت أيام اليسر تكون صحناً إضافياً لصحن «الباشري» - الجيل الجديد لايعرفه - هو صحن ماهل أوقل حجم عائلي «بلغة المشروبات الغازيه» .. الآن أصبح وجبة قائمة بذاتها.. لعل الناس اكتشفوه مؤخراً.. بعد غلاء الطماطم.. والعجور فانصرفوا إليه فاشتريت الكيلو باربع جنيهات .. بعد اُسبوع اشتريته بعشر جنيهات .. حقيقة لم أشتريه عملاً بشعارات محاربة الغلاء (الغالي متروك) لكن أكتشفت إنه ضرورة فعدت اليوم التالي.. ليس بعد أسبوع ولا بعد يومين تلاته (فَرِد) يوم لقيت الكيلو قفز إلى عشرين جنيه.. « كيلو الأسود بي عشرين جنيه ..! » فهتفت مع المتنبيء من علم (الأسود) المخصي مكرمة.. فقد كان هذ الأسود الزنديق رخيصاً رخص التراب بالكوم.. بالقفه.. وكان ثمن القفه أقل من ثمن الكيلو الآن.. هل أصبح الأسود المكتشف حديثاً فجأةً من أهم الخضروات.. وزاد الطلب عليه.. فأصبح العرض قليلاً.. أم الذين عندهم علم الضرر أكتشفوا إن الفقراء (أولاد الذين) لقو وجبة رخيصة.. قاموا زادوها ليهم عشان مايتعودوا على الرخصه ويقوموا يقولوا ليك ده غالي وده بقى نار .. الأسود.. أصبح متعززاً.. وغالياً.. أكتشفت الآن لماذا المرأة حين تُبشر بخبر فاجع تقول « أسود عليَّ » .. بالمناسبه إذا حاولنا مثلاً نعمل مع الأسود حكاية الغالي متروك.. (زمان كان الغالي تمر السوق كان قسموه مابحوق) أعتقد إنه يمكن تركه نهائياً.. أصلو الأسود قفه ولا أضان قفه نخليهو زى السلام عليكم.. كمان نعبي الرأي ضدو.. وهو زي ماقلت ليكم منسوب إليه تسبب الحيرقان يمكن أن تقول إنه يسبب شلل الأطفال أو الأكتئاب وإذا كنا دايرين نغطِس حجرو مره واحده نقول بسبب الضعف الجنسي .. والله وأحد يشتري مافي إلا المساجين، المحرّق روحي كلما أتذكر إنو الأسود بقى غالي الكيلو بي عشرين جنيه ألقى الكيلو فيهو من الحجم المتوسط أربعه أسودات يعني الحبه بى خمسه جنيه يعني زيها زي المنقه الكبيره.. يعني تساوي تفاحتين ونص.. فدي ممكن تصدِّقا إنو حبة الأسود بي خمسه جنيه والله دي (جِدي) مايصدقها.. جدي شنو والله (عمي ولا خالي) مايصدقا.. عمي وخالي شنو والله (ولدي) مايصدقا.. المحرق روحي ليه الأسود بقى غالي يعني عشان لونو أسود مثلاً.. خلاص يبقى نبيعو مقشر يبقى بدل أسود أبيض.. أمكن كيلو الأبيض أبقى أرخص.. أها وبعدين معاكم ياجماعة.. ناوين تودونا وين وتأكلونا شنو؟ (تأكلونا النمل) والله الحاله بقت صعبه حتى واحد زميلنا قال عن واحد زميلنا تاني إنو بحب أكل لحم البشر.. مالازم.. إذا كان كيلو الأسود بقى بى عشرين جنيه أهو حل من الحلول.. كبديل مناسب وموضوعي لديكتاتورية الأسود المزعومه.. غايتو الأسود بقى الوسيم القلبي رادو.. خصوصاً فيها (توب حدادو) والأسود فى توب حدادو ومتعزز.. غلاء الأسود يعني مؤامره ضد السَّلطه.. (سلطة الروب.. سلطة الأسود) والسلطه يومها أسود دمها تقيل.. السلطه ماعندها دم.. السلطه بايخه.. بالمناسبه البقرأ «السلطه» بضم السين يتحمل مسؤوليتو!
