وهذه قصيدة «الهوجاكولا» وهو مشروب وهمي ولكنه قد يكون طبق الأصل لمشروبات غير وهمية، فإلى مضابط القصيدة.. **** مص في دمنا يا دراكولا مافيش مشكلة.. بكرة نعوض بالهوجاكولا الهوجاكولا... أهي الهوجاكولا مرة صحا الجمهور من نومو لقى في كومو حكاية مهولة طويلة فصولا *** ضاق الطعم وقال مقبولة وأقول ليك يا صاحب قولة سر الدنيا وسحر الكون اسمها كان في الصحف الأولى الهوجاكولا.. أهي الهوجاكولا *** مرة صحينا في ذات صباح ديكنا اتبّكم غلبو صياح لقينا بيضرب راسو تراح ترراح جبنا العيش جبنا ألذّ بذور واعلاف ديكنا الأحمق تب ما شاف قلنا الديك يظهر خواف دلّعناه وحنّسناه وجبنا حبوب أنواع وأصناف صاح في صوت نبراتو ضعاف كاك.. كاك كاك.. هوجاكولا كدايس حينا كسبت عادة فرحنا لأنها فيها إفادة سابت فجأة حمام حلتنا جداده أبت اللبن الدسمو زيادة الفيران رتعت وأولادا تشوف الكدسة بكل سعادة قلنا الدنيا بقت مهبولة عرضها وين من سمكها طولا يا كدايسنا الباعت أصولا صاحت فينا بكل سهولة ناو ناو ناو ناو كولا قصدها طبعاً إنها دايره دايره تمزمز بالهوجاكولا *** أطفال حينا سابوا البزه تركوا حليب الأم النزّ حليب البقرة حليب العنزة القاموس يا اخوانا اهتزّ الأطفال ح يضيعوا خلاص قلنا نفتش لينا خلاص صاحوا الشفع في إخلاص انقا.. انقا.. انقاكولا دايرين يرضعوا في الهوجاكولا!!