٭ الجماعة فرحانين جنس فرح بالتعادل.. ٭ والله حيروني عديل كده.. ٭ انتو الجماعة ديل غلبونا ونحنا ما عارفين.. ٭ والله ناس الهلال رايحة ليهم فرحة ساكت.. ٭ ما مساكين ليهم فترة من الفرح.. ٭ والله سيف مساوي رافع كأس الاستقلال وفرحان جنس فرح.. ٭ أنا قايلو رافع كأس أبطال افريقيا.. ٭ الحالة شال الكأس بالقرعة.. ٭ قرعة بال«ق».. ٭ ما الجماعة ديل مساكين الكاسات الا تجيهم بالقرعة.. ٭ غايتو بي حالتهم دي لو جابو كأس من بره بموتوا.. ٭ كأس من بره في عينك.. ٭ هسي ده شكل فريق بجيب كأس من بره.. ٭ فريق حارسو نظرو ضعيف يجيب كاس!!.. ٭ انتو متأكدين انو مكسيم ده بشوف بالليل.. ٭ ياخي علاء الدين يوسف ده شات الكورة من العرضة جنوب.. ٭ أنا كنت فاكر علاء الدين ده بهظر وما جادي.. ٭ معقولة يا علاء الدين.. كترتها.. ٭ لكن شكلي كنت ظالمك والله يا علاء.. ٭ الكورة دخلت القوون عديل.. ٭ انا كنت مفتكر انو مرمى الجماعة فاضي.. ٭ لكن قالوا واقف مكسيم.. ٭ والله يا فطومة مكسيم ده عايز ليهو تصحيح نظر.. ٭ والله الضربات كترت عليك يا كردنة.. ٭ وبرضو تقول لينا ده فريق مستقبل.. ٭ فريق مستقبل حارسو نظرو ضعيف.. ٭ لكن والله يا كردنة انت ما غلطان.. ٭ علاء الدين يوسف ده برضو ببالغ كمان.. ٭ معقولة يجيب قوون من العرضة شمال.. ٭ شكلوا علاء الدين ده دخل معارضة الهلال.. ٭ هووووي يا علاء الدين يوسف هوووي.. ٭ والله يا علاء قلبك ما فيهو رحمة.. ٭ القوون الجبتو ده هسي قوون نصاح.. ٭ ياخي قالوا مكسيم لسه بفتش في الكورة جوه الشبكة. ٭ لكن والله الفيكم اتعرفت.. ٭ ياخي لعيبة الجماعة زي الراكوبة في الخريف.. ٭ وبرضو تقول مستقبل!!.. ٭ صحي مستقبل.. ٭ كدي خليكم من مكسيم ده هسي شوية.. ٭ وكمان خلونا من قذيفة علاء الدين برضو.. ٭ بكري المدينة ده ما بسمع الكلام.. ٭ والله اتكلمت معاهو كتير قبل الكورة.. ٭ حذرتو من الدمار في بداية الموسم.. ٭ لكن ما سمع كلامي.. ٭ لكن الحمد لله ربك ستر.. ٭ ياخي بكري الله هداهو في آخر لحظة.. ٭ كان مُصر على أن يغلب الجماعة كتير.. ٭ عايز يدمرهم من بداية الموسم.. ٭ ده الحالة وصيت ليهو بلة جابر.. ٭ لكن برضو ما سمع الكلام.. ٭ ربك ستر بس.. ٭ لو كان عمل الفي راسو كان مشكلة والله.. ٭ كان زريبة العيش اتحرقت.. ٭ كان رقد الجماعة مستشفيات.. ٭ ومستشفيات مامون حميدة ما جاهزة لاستقبال الحالات.. ٭ ياخي الجماعة لسه مخلوعين من قوون علاء الدين.. ٭ خمسة وخميسة.. ٭ ما قلنا ليكم علاء الدين طلع ما حنين.. ٭ حنين بال«ح». ٭ لكن نحنا بقينا مطمنين.. ٭ وعلى دمار الجماعة قادرين.. ٭ والموسم ده حكايتو حكاية.. ٭ بس الله يدينا الفي مرادنا.. ٭ والله فريق الجماعة بقت حالتو صعبة خلاص.. ٭ زي حفلات أفراح عصام الجماهيرية.. ٭ لا طعم.. لا صوت.. لا ريحة.. ٭ كلمات ضعيفة والحان ركيكة وصوت مشروخ.. ٭ ده حال فريق الجماعة.. ٭ الله يكون في عونك يا كردنة.. ٭ آخر خبر.. ٭ مكسيم لقى كورة علاء الدين وللا لسه..