رابطة شعراء الهشيب «رشا» تهنيء عبد العظيم صالح عبد العظيم ود صالح الصحفي الحصيف حفيد ود بانقا الشيخ الكبير الصالح تخدم في الوطن من غير قروش ومصالح بي قلمك بتجمع في النفوس وتصالح ***** مبروك الجلوس في القمة والمقصورة يا صاحب العمود الراقي خارج الصورة بيك تترقى آخر لحظة تعلو قصوره يا فخر الهشيب بيك أكيد منصوره ***** يا الأسد البزم قارع الخصيم من بيتو مجالاً جيتو بي هيبة ووقار كسيتو اتربع على عرش الصحافة الجيتو جيت بي جدارة مو تدليس وغش سويتو ***** يا أبومحمد الإبداع معاك وقريتو قلمك فوق قلامة الغير مسطر ڤيتو فيه التمثيل كتير وطن الجدود عزيتو خارج الصورة افخر بيك فوق رقيتو ***** يا عبد العظيم نسل الكريم ودصالح مؤدب خلقه ماك فحاش وقولك جارح لي قضايا الوطن وهمومو قلمك شارح بتكتب بي تروي شديد وبتار طالح ***** رئيس تحريرها آخر لحظة بنهنيهو قمراً طابق السبعة وغمام خاتيهو حافظ للصحافة شرفها بل حاميهو قلمك صدق وكل صحافي يفخر بيهو ***** أصلو الصحفي حقو يكون غيور لي بلادو زي عبد العظيم المهنة كانت زادو تهنئة خاصة لي أهلو الجميع وأولادو من رابطة رشا الأدب الرفيع روادو ***** ربنا يحفظك من العيون الحارة تعيش محبوب ومعروف في الوطن والقارة تعيش في الدنيا أفراح من مواسم سارة بالمال والبنين تصبح حياتك سارة الشاعر: العطا محمد محمد أحمد