بيناتنا مقطوعة الصلات .. لا يوم تجيني ولا أجيك وبقينا أغراب في الوداد .. لا لي حق .. لا شوفة فيك أصبحنا ضدين في الغرام .. لا إنت لي .. لا شوقي ليك لكن تأكد يا مناي بيناتنا مليون احتمال يرجع يوالينا الوصال يتلم شملنا من جديد وتعود ليالي الاشتياق .. غيرة ومناكفة .. واحتراق تحتاج حناني .. واشتهيك لكننا الآن يا عزيز .. بيناتنا مقطوعة الصلات ٭ ٭ ٭ ٭ بيناتنا مقطوعة الصلات .. والجفوة جاوزت الحدود أصبحنا أغراب في الوداد .. لا بينا شوفة ولا وعود أحلامنا تاهت في الزحام .. وأشواقنا حابساها القيود والساعي بين قلبي وهواك .. يا إما شامت يا حسود بيناتنا عالي المستحيل .. بيناتنا مرتفعة السدود درسنا بي ريدنا الغرام .. وجازانا بالصد والجحود لكن تأكد يا عزيز .. رغم المحاذير والتلال بيناتنا مليون احتمال يرجع يوالينا الوصال ونتلاقى بالحب والورود تلويح: ما أجمل الخصام الذي يؤجج الوله ويعرفنا على البعد الحقيقي لأعزائنا في تقاسيم حياتنا .. على ألا يتجاوز الخصام حدود هذه اللهفة الممتعة فقط وإن شاء الله ما يحصل خصام لي قلوب بعد إتآلفوا