ما سكلبت ركزت وكت دقّن حريم الحلة دلوكة النواح ما شمتت فيك البتاوقولك كما شمس الصباح كانت تزغرد كلما تلكد مصارينه الجراح كانت ملخبطة بالوجع لا غنى خاطره لا استراح وأسع وكت كل الخلوق.. تفتح خشومه تقهي فيك راجياك تهز قلبك وكت يتنحنح الحزن الجواك يفتح عيونك ضفتين شريان يضخ للنيل دموع ووريد يصد الوجعة ليك ما تشتغل بالهم وكت يضحك عليك ما تشتغل.. والله ساعة الحارة كان حفيانة بتدرع قماش أحزاني.. بتوكل وأجيك يا فرحة مالك تندهيني غياب محل ما أشتهيك يا وجعة مالك ياخ تقول خلقونا من قدة تراب مالك تكلكلي في صغار دمعاتي.. هادي المرة شريان القلب حالف يضوقك العذاب مالك..؟ محل ما نبني للأفراح رويكيبة.. ونغم.. نلقاك زي رقراق شمس يدخل علينا من أي باب مالك..؟ سألتك بالذي لا ينوم ولا منك بهاب }}}} وأنا يوم سكونك بندفق ريقين من الغنا والسرور نفسين من الضل.. ساعة الشمس البتقلي البن تلاقيك أو شعاعين في الضلمة القاسية وإحساسات ونور أو قول.. وكت تزعل تصاوير من خيال.. إني البنية الكنت يوم تزعل عشان عاشق غيور كانت تراضيك إني غيرك يا ضرى الرجالة ساعة الحارة حرّم ما بدور يا زول زخم حنية، نوبة، ودين وحولية وبدور يا زول وكت ينضم بصن كل الحضور يا زول وكت يفتح شراع الحن.. بتتعلم صغار القسوة والقيف والطيور }}}} يومداك تتذكر وكت كان قلت لي نمشي البحر هميت عشان كانت مواعيد مرقة الحورية جنية المغارب كنت بتوقع حضوره.. عشان وكت جيتك تصن كل موجة في عمق المحيط كل اتساع للموجة برجاك زي زي اشتها العطشانة لي موية المط كان يوم حضورك.. دقة الظار لي شياطين حسي كان لمة مسيد.. كان نوبة.. كان رنة وتر كان أي حاجة بتفصل الروح عن رعاية الخاطر المليان سكر كان.. كان.. ولسع انت ركازة القصيد لسع تفاصيل اشتها الدم للوريد لسع بتلفظك الحروف شان القلم برجاك مستف روحو ريد لسع صغار الحلة بستنوك عيد لسع شيوخ الخلوة مستنين رجوعك للمسيد لسع حريم القهوة فاقدات جنزبيل النشوة.. والبن مر.. عشان كنت بتطعم أي فنجال قهوة بي إحساس جديد اتخيل الناس قاعدة تتوقع مروقك مني من رحم القصيد الناس تتاوق فيني من باب الحزن.. ترجاك عيد وأنت بتونس في صدى الإحساس.. وفي فضلة بكاري القهوة.. مالك يا عشاي مالك وكت سميتك العكاز.. عشان تستر عماي مالك وكت مسكتك الضل.. لا رحمت ظروفي.. لا همالك حفاي مالك وكت سميتك القمر البقيف برجاهو... ما ضويت سماي... مالك.. أنا اتحديت حبال أوتاري ما سامع غناي مالك.. إذن خليني ساي وأنا من زمان كان أقتنع.. إنك رفيق زولا سواي لكن محل ما أفوت بعيد.. بلقاك في كريات دماي بلقاك في شهقة نفس أعماقي في نومي وصحاي بلقاك في ضحكة صغار حلتنا.. من إحساسي جاي بلقاك في كفتيرة أمي الغالية شاي بلقاك محل ما أبتعد.. مشتول مع قلبي وجواي وألقاك إذا خارت قواي.. مصدر وهج روحي وقواي بلقاك معاي
