رغم السنين المروا في حرمان وخوف .. رغم الهموم.. والحسرة.. والقيد التقيل ما برضى غير حبك بديل .. وأنا ما مصدق إنتا لي.. تصبح هنا وتصبح خليل كيفن أضحي بأغلى شي.. بي أحلى إحساس جد نبيل بي روعة الريد والحنان.. بي حب تخطى المستحيل رجعت لي حضني الأمان.. وجددتَ أحلامي القبيل وأصبحت فيك درويش غرام.. لازم درب ريدك عديل طالبك من الأيام مدد.. ماسك عدد.. عطشان.. ودايرك تبقى نيل يا فجر هادي ومنتعش يا قلب خاشع كل ليل يا نعمة من خالق الوجود يا منحة الرب الجليل ... يا معنى منساب زي نغم يا لحن متناسق جميل .. يا نور لمع وسط الظلام .. وأصبح مع الأيام دليل .. يا شوق غلب صبري وسدر .. يا نسمة الدغش العليل خليك معاي طول العمر وأنا ببقى بالأزمات كفيل أنا بي وجودك بنتصر لا بنهزم لا بنكسر لا يوم بميل تلويح: السبت أخضر.. وحرف الشعر أزهر