{ زمان كان في الحي الذي نسكنه امرأة غريبة قادرة ومقتدرة وعينها كمان قوية.. أنا لا أستطيع أن أكتب اسمها.. أصلها بيني وبينكم لو كتبت اسمها بتجي تفتش شمبات دي زقاق.. زقاق لمن تلم فيني وبعدها عينكم ما تشوف إلا النور.. زولة قادرة وأنا مسكينة ومكسورة جناح.. لكن بالتأكيد ستعرف نفسها ونسمّيها مثلاً (زهرة).. زهرة دي تجي بيتك وتدخل المطبخ وتأكل وتشيل معاها لأولادها وتطلع وتكون ما سلمت عليك إنت سيد البيت.. عين قوية ساي كده.. تقول الخضار واللحمة ديل إشترتهم هي..(تشد) التوب من أمي وتقول اشترته من برعي (برعي أكبر تاجر ثياب في القضارف).. مرة غالطتني في توب أمي قالت اشترته امبارح من دلاّلية، وكان التوب هديتي لأمي في عيد الأم.. في قوة عين أكثر من كده!! { تذكرت زهرة وأنا أستمع لنتائج الانتخابات.. ما شاء الله ناس المؤتمر الوطني كلهم 97 % ، 96 %، 92 % ، يعني كلهم دخلوا طب الخرطوم زول ساي دخل اقتصاد ولا آداب ب70 % ما في؟! ولا خجلانين وبعين قوية محتفلين ويضبحوا في الخرفان.. قال ليك سعر الخروف وصل (500) جنيه مال سايب تقول شنو.. الجماعة الما صوّتوا شالوا الخرفان ومشوا عليهم يعملو شنو.. الناس دي قاعدين تاني (4) سنين.. وعين قوية وآخر تصريحات قالوا نحن جينا باختيار الشعب.. والشعب يعاين وإن شاء الله بكره يكون أحلى. { في حوار مطول أجراه أستاذي شفاه الله رئيس تحرير الرأي العام كمال حسن بخيت في زمان مضى مع كرم الله عباس الشيخ قال من خلاله إبان مشاكله الكثيرة مع ولاة القضارف إنه لا يسعى ولا يفكر أن يكون والياً لأن أنصاف المتعلمين والمزارعين أمثاله لا يصلحون حكاماً.. يا ربي كرم الله ده يكون دخل جامعة القضارف ناضجين ولا شنو.. عشان كده اترشح وبقى والي..!! { مازال المرشح الصديق حزيناً بعد أن كان شعاره القلم فتحول الى ماسورة قال لينا يا أخوانا الجماعة ديل قايلنّي وارغو ولا شنو؟! يا أخوي الموضوع أنتهى والناس دي في مكانها شوف ليك شغلة تانية. { في حوار أجريته مع المدرب البرازيلي باولو كامبوس قال ليَّ بأن الكرة السودانية تحتاج للكثير حتى تتطور.. تتطور وين يا كمبسة مع شداد وسيحة ديل..!! { أحد المرشحين مازال مندهشاً حينما أُخبر بأن الذين صوّتوا له (4) فقط.. الراجل ده مخلوع لسه.. قال ناس بيتهم ساي ما يكونوا صوّتوا ليهو.. خلِّي بالك الراجل ده يكون مطلِّق مرته.. ومرته حرشت أولادها ما يصوّتوا لأبوهم.. ويكون كمان متشاكل مع أخوانه في ميراث وكده.. فالجماعة زعلانين منه.. وإلا فليس هناك منطق غير ذلك. { جاء أحد أعضاء المؤتمر الوطني كما يتردد بسلحفاة كفكاهة.. وقال إن الخواجة أخبره أن هذه السلحفاة ستعيش (250) عاماً حتى تموت انقضت منها (50) عاماً.. فرد عليه نافع: «خليها النشوف كضب الخواجات ديل نحن قاعدين».. معقولة يا نافع تاني (200) سنة!! { الشيخ حسن الترابي صرّح بأن حزبه لن يدخل في الحكومة الجديدة التي نادى بها المؤتمر الوطني.. يا أخوانا الترابي ده لا بقرأ جرائد ولا بشوف تلفزيون.. ما زمان نافع قال في حكومتنا الجاية المؤتمر الشعبي ما في حساباتنا.. (بري) ده تعرفوه براكم. { ما يهمنا في هذه الانتخابات فوز المشير عمر حسن أحمد البشير.. نتيجة متوقعة وحلال لابن دار جعل.. كما نتوقعها حتى قبل بداية الانتخابات.. فحب الناس لهذا الرجل يفوق الوصف والخيال.. مبروك الفارس المغوار.. فقط ننتظر أن ترد الديْن لهذه الجماهير خيراً ونماءً وتنميةً ورخاءً.. عشمنا فيك وسيظل. { بدعوة كريمة من الدكتور الفاتح عز الدين المقرر العام للهيئة القومية لدعم الرئيس البشير سنكون حضوراً زاهياً يوم الجمعة بجبل أولياء وسط المشايخ وأهل الطرق الصوفية.. الشيخ الياقوت وأهله ومريدوه احتفالاً بالفوز الكاسح للبشير.. أرادت الهيئة أن يكون احتفال فوز الرئيس وسط أهل القرآن وخيراً فعلت.. { شايفة كارتر وإخوانو نطّوا من كلامهم في نزاهة الانتخابات.. خواجة ما عنده كلمة يعملوا ليهو شنو.. ده حالهم. { لك الله يا سودان.. وعزيز أنت يا وطني وستظل.