تقول الطرفة إنو واحد من جماعة «الهبرو ملو» بعد ما إتورط في هبْرة مليارية جابوهُ لي ناس لجنة فقه السُتْرة وهي لجنة محاسبة لطيفة جدًا وحِنيْنة وسُكَّرة، وبينما الراجل ماثل أمام اللجنة، وهي تدردش معه بلطف وحِنيَّة، وأمامه صحن بلح وفول مدمس، دخل عليهم دكتور نافع، سألهم: دا الراجل ذاتو اللي قالو ضرب القروش..؟ قالو ليهو أيوا يا دكتور.. سألهم: وهو معترف بجريمتو دي؟.. ردو أيوا يادكتور!!! قال ليهم ما في أي مجاملة، شوفو لو عندو أي عمارة ولاّ شركات دلِّلُوها طوالي القروش دي لازم ترجع كلها «المركز»... في الوكت داك لجنة فقه السترة تحولت لي لجنة دفاع عن اللص الماثل أمامها، بس قعدت اللجنة تشيل وتقول لي نافع: الراجل دا كان من المجاهدين الأوائل، وليهو دور كبير في نشر الإسلام في الجنوب، والراجل دا كان في أدغال الجنوب، والراجل دا كان في الأحراش، وشِهِدْ معركة توريت، وشِهِدْ معركة الجِكَوْ، وشِهِدْ معركة «هنا اسم المعركة طار ليهم، وقعدو يسووا:معركة آآآ اللي آآآ... ».. نافع قال ليهم: معركة بدر؟؟؟؟، علي الطلاق لو شِهِدا ما ح نخليهو.. -- تعاريف عصرية جدًا السُّلالة هي: أن تسلْ لسانك طويلاً ثم تبلعه الحِلاقة هي: أن تُحلِّق بأجنحة الأنتنوف العصابة هي: أن تُعصِّب أثناء الكتابة الرِّسالة هي: أن ترسل لِحْيتك ثم تدخل السوق الحداثة هي: أن تُحدث نفسك بأربعين حرية