هل كتب علينا الانتظار؟ البشرية السودانية كلها في حالة انتظار.. في انتظار البص.. في انتظار الماء والكهرباء.. في انتظار الترقية.. في انتظار التأشيرة.. في انتظار الحرامية.. في انتظارك يا حبيبي.. في كشف الانتظار.. وفي الانتظار أنا على نار. وهكذا ترون أن الانتظار قدرنا المحتوم الذي لا فكاك منه. وقفت أمام الأفندي الجهبذ وأنا أتقدم بورقتي لاستخراج شهادة بحث وقد أرفقت معها أية ورقة تمت لها بصلة القرابة ولم أترك حتى شهادة التطعيم الدولي وإنني خال من الأعذار التي تبيح الفطر في رمضان. نظر الأفندي في ورقتي ملياً ثم قال: الليلة يوم كم؟ أجبت: يوم خمسة وتنحنح الأفندي ثم قال لي: تعال لينا الأسبوع الجاي.. ولم أفهم لماذا أحضر لهم الأسبوع القادم وأنا الآن بكامل هيئتي أمامهم فقلت متسائلاً: وليه الأسبوع الجاي؟ وبعدين يا أخي أنا مسافر يمكن ما أكون هنا الأسبوع الجاي.. أجاب بثقة غريبة : لا يا أخي إنت حتكون موجود هنا الأسبوع الجاي ويمكن البعدو كمان. الحكاية دي اسمها شهادة بحث يعني عايزة بحث وشوف إنت لما تبحث عايز ليك كم يوم. على أي حال انتظرنا شوية كمان. وهكذا وجدت أنني يجب أن أنتظر. وعليه قررت أن استفيد من وقت الانتظار هذا في إنجاز أمر آخر. والتقيت بأحد الأصدقاء وبعد السلام والذي منه شرحت له موضوعي مع ناس شهادة البحث فهوّن علي الأمر ووعد أن يحله سريعاً وتواعدنا على اللقاء: أسمع نتلاقى بكرة الساعة ثمانية شوكة عشان أمشي معاك للجماعة بتاعين شهادة البحث ديل.. أصلو هم ناس ما عندهم كبير وأنا بعرف رئيسهم وإنت ما تنسى بكرة الساعة ثمانية جنب العمارة. وللتأكد قلت لصديقي: لا مش حأنسى.. جنب العمارة الساعة ثمانية شوكة. أيوه جنب العمارة الساعة ثمانية شوكة.. وبعدين حوالى الساعة تسعة لو أنا ما جيت انت الساعة عشرة أمشي. وحمدت الله كثيراً فهذا صديق يأتي وقت الضيق سانتظره الساعة الثامنة وإذا التاسعة لم يحضر انصرف أنا الساعة العاشرة تلك هي المواعيد ولا بلاش. وتذكرت قصة ذلك الرجل الذي أراد أن يتزوج فذهب لنجار يعرفه وطلب منه أن يقوم بصنع غرفة نوم له بمناسبة زواجه ودفع له المبلغ «كاش» وقد كان في ذلك الزمن يساوي «500» جنيه فقط لا غير. وسأله النجار: قلت لي عرسكم بتين؟ ويجيب الأخ: بعد ثلاثة شهور. ويتنفس النجار أكثر من صعداء واحدة وهو يقول: يا أخوي اعتبر نفسك عرّست واستلمت أوضتك بتاعة النوم أصلو قروشك مدفوعة والزمن كافي جداً وإن شاء الله قبل الموعد ده تستلم حاجاتك. ولكن الموعد جاء وفات وتزوج الرجل ولم يستلم غرفته ولا خشبة منها يبل بيها ريقه وتطمئنه إلى أن هناك غرفة تلوح في الأفق. وكان كلما يسأل النجار عن الغرفة كان يقول له جاهزة: جاهزة ما فاضل ليها حاجة غير ضلفتين وراس للدولاب والسرير عايز قوائم والشوفونير خشبه جاهز والكمودينات عايزين نغريها والتواليت عايز مراية ودولاب صغير يشيل المراية وكلها حاجات صغيرة ما بتاخد وقت. وطبعاً ما بتاخد وقت إذا كان الرجل رزق ابناً وكبر الابن وترعرع وأصبح رجلاً ويريد الآن أن يتزوج. فقال الرجل لابنه: يا ولدي .. أنا زمان أديت النجار داك «500» جنيه عشان يعمل لي أوضة نوم قبال أعرس أمك، ويبدو إنها بقت من نصيبك.. دحين خلينا نمشي نكلمه يسلمك الأوضة. وذهبا سوياً للنجار وفاتحه الرجل في الأمر وأبدى النجار ترحيباً حاراً بالموضوع، ووعد أن ينجزه في أقرب وقت، والتفت إلى الابن قائلاً: شوف يا ولدي أهو الاوضة بقت من نصيبك، وأنا إن شاء الله اجتهد ليك فيها وأطلعها ليك قبال وقتها.. بس إنت من فضلك ما تضايقني زي أبوك. وفي الصباح الباكر ومنذ الساعة الثامنة أنا في كشف الانتظار أمام العمارة عملاً بنصيحة صديقي الهمام، وجاءت الساعة التاسعة ولم يحضر، وفي الساعة العاشرة انصرفت وأنا في أسعد حال. وبعد مضي أسبوع ذهبت للأفندي ووقفت أمامه فقال لي: ما تفتكر أنا نسيت موضوعك لكن قول لي الليلة يوم شنو؟ قلت: يوم «12». قال: طيب.. إنت فوت علي بعد بكرة. أنا بعرف حكاية أمشي وتعال بكرة لكن بعد بكرة دي يا خوي جديدة علي. قال وهو يبتسم: ما هو كله حاجة بقت فوق.. مشيها إنت دلوقت وتعالي بعد بكرة. وعندما أطل علينا بعد بكرة بطلعته البهية ذهبت للمكتب ولكني لم أجد ذلك الأفندي، ووجدت شخصاً آخر يجلس مكانه، فوقفت دون أن أفصح عن شيء حتى خاطبني ذلك الأفندي الجديد قائلاً: عندك شنو يا أخينا؟ عندي شهادة بحث كانت عند الأفندي الكان قاعد هنا وهو قال لي أجي الليلة. وبملامح تخلو من أي تعبير قال الأفندي الجديد: الراجل ده مشى عمرة وما اظنو يجي قريب.. علي أي حال أنا ممكن أشوف ليك الحكاية دي لكن الموضوع حياخد وقت .. الليلة يوم كم؟ «من كتاب إحراج مؤقت».
