عم الزين في الدكان ختا طحنية وجبنة لشفع الحوش عشان يأكلوا بعيد عن الريح وصهيب ناس الجرسة، وجرى واحد جاب جك الحلومر الابيض من ثلاجة البيت وهاك يا اكل وشراب.. وجاء النعيم فاطر رمضان يشتري سجاير.. الشفع بصوت واحد نادوا اتفضل معانا.. النعيم زعل وقال انا صايم يا صرم.. واتحرج اكتر لما جات حاجة زهور تشيل بن من الدكان وشافت الشفع رافعين لي جك الابري وشغالين.. الليله مالك يعني امبارح ماشربتا معانا الجوافة عشان ابوي الزين قاعد.. انتي ما كلبة رمضان زينا.. انتهرهم عم الزين.. يا ولد قليل ادب انتا؟ يلا امشوا من هنا خلوا الريح يكتلكم! الشفع جروا والضحك مدور ههههههه.. انسجب النعيم خجلان.. وصفقت زهور يديها وضحكت شديد.. استغفر الله العظيم.. عفيت منهم الشفع ديل وروا نجوم الضهر! هز عم الزين رأسه في حسرة.. الزول بجيب الصغرة لروحو براهو.. هم عارفين شنو؟المغرب اذن النعيم واقع شفط في شوربه الحمام شف شف.. الريح قلع الكورة.. تشفط كدا تقول ريقك ناشف! حرد النعيم الفطور ولبس المركوب وهو يبرطم دي بقت قصة دي الزول يخلي الحلة دي ولا شنو؟أنا ألقاها من الريح ولا ولادوا؟