طربقوا طربقة لا في السما ولا في الواطه الرائع رمضان طالب والي الخرطوم والوزير بالمساهمة في استقرار الهلال واستقرار الهلال يتلاشى بالطبع ويتزعزع بعد هزيمة السبت يعني يا رمضان يحكمها ليك الوالي ولا شنو ؟؟؟ موش كفاهو الولاية الحاكمها ؟؟؟ إن شاء الله والي الخرطوم يا رمضان يمد ليكم عمر المجلس ويزيدو تلاتة اعضاء من موظفي مكتبو عشان لا تعرفوا تتحللوا ولا تعرفوا تتحلحلوا وهضرب محمد عبدالماجد مشى من الموبايل لي جامعة الخرطوم وزاغ زاغ اسبورت وروشا يهضرب قال مخطط مريخي لارهاب الحكام لا ياخ !!!! صدقناك ايها الناس طيلة عمر الممتاز لم يحتسب التحكيم ضربة جزاء واحدة للمريخ ضد الهلال برغم ان عدد ضربات الجزاء في لقاءات الممتاز التي لم تحتسب للمريخ اكثر من ضعف اهداف ماجد التوالي الراحل المقيم في الهلال ولكن التحكيم غداً سيحتسب اول ضربة جزاء لصالح المريخ ضد الهلال في الممتاز عشان يسكتنا بس وبحاول يعوضها بي هناك ولكن هيهات ايها الناس الدقيقة سبعة بتزاول لي !!! اللهم اجعلو خير خطتنا واضحة لاعب المعز شوت شديد تحت لاعب جمعة شنقة يا تراوري اشنق من النص علي مسؤوليتي ولكن رمضان برغم بعده عن مستواهو المعروف لن يهدأ الراجل اتعود على شباكهم وشباكهم دايما متعوييييييييييدة رمضان على الابواب يا رمضان وراجنوا بي كل الصبر ايها الناس اعطوا زغبير الثقة يعطيكم الامان انه سلاحنا الذي نقاتل به لا داعي لدفعه للتوتر لا داعي للرجفة على المدرجات زغبير برضك لاعب منتخب وله خبراتو المهم مساوي واتير زي شارع الستين وشارع الاربعين تمشي سااااااااااي يا مشيت يا حادث والحادث جوه الشارع ببقى واضح بوليس الحركة بكون مضطر يكتب انو الحادث جوه الشارع ولما الحادث يكون جوه الشارع تبقى الدقشة عمداً ومأمنين نحمد الله ورابطين الحزام كعب الزول البدقش وما مرخص يدفع التمن غالي ايها الناس بكرا اكيد لينا أحلى بس الشفوت من عصرا بدري ونوحد الهتاف مازيمبي ما بخصنا يشوف ناسو وين لكن نحنا العلينا بنسويها من منطلق الوطنية بنكشف للجماعة اماكن الضعف كلها في التشكيلة عندهم حداشر نقطة ضعف وفي الكنبة سبعة نقاط ضعف ده في كورتنا كورة مازيمبي الحكم شجااااااااااع اي شنكبة عنكبة تييييييييييييييييييييييت وبويا يقعد يبكي اها نجي لي شمارات والي الخرتوم كان شفت يا والينا عندنا اتنين اخوان في الحلة عمرهم ده كلو هادين داخلين مارقين مارقين داخلين ما سمعنا ليهم صوت اليومين دي صوتهم علا شديد يا والينا مرات يقربوا يتضاربو باقي لي ناس الحلة اتهموهم بشي ضاع ودخلو في جدال من سرق الروب انا ما سرقو مين سرقو ؟ هذا سرقو انا سرقو ؟؟؟؟ انا ما سرقو ومين سرقو ؟؟ هذا سرقو كل واحد يرميها في التاني يا والينا بتاع بحر قاعد يعاين سااااااكت قال لي ناس الحلة ديل اختلفوا ؟؟؟ قالوا ليهو ايوه اختلفوا قال ليهم بختكم روبكم برجع كان ما اتلحس كلو اذا اختلف اللصان ظهر المسروق سلك كهربا ننساك كيف والحر يلفح والناس تلفح والجرح ينقح والضرس ينتح والحبن ابى يفتح والى لقاء سلك
