يا حليل رمضان الفضل فيهو زمن مزانق شديد لمليم قروش للعيد ما بكفي الشفع دايرين قول غشيناهم أمهم دي كيف عاد ؟؟؟ لا بتتغشه ولا بتتفشه لو جبت ليها تياب دبي كلها ما بتتفشه وحق الكعك وايييييييييييييييييك الستائر الستارة ركبناها العيد الفات شركة جديدة لنج لي اسي بدفع في اقساطها لسه اقساطها ما انتهت قالوا ايه قديمة ودايرين وحدة جديدة للعيد غايتو يا رمضان لا تفوت لا تموت اصلك ما تنتهي كان انتهيت بننتهي معاك بنتمقلب عندي جاري قال إن شاء الله يوم تسعة وعشرين رمضان يقولوا كان في غلط ويعيدوهوا لينا كيتا علي النسوان المهم اعداد الشباب ماشي تمام ولما نقول الشباب حالياً نعني الفريق الكبير لانو معظمو شباب مهند الطاهر لو فكيت عمرو يجيب اعمار تلاتة من اولادنا الاساسيين والغريبة عمر بخيت بجيب ليهو اعمار اربعة خمسة فيهم اتنين من القدام عشان كده نحنا بنمشي لي قدام خليفة ده ما تشوفوهوا كده ما هوين قرج ساي من اسمو ده الزول ده دحين ما من ناس اواخر الخمسينات بداية الستينات ؟؟ لاقاكم زول ولدوهوا تمنين اسمو خليفة ؟؟؟ في الامارات خلوهوا الاسم ده الزول ده حجيري ساي المهم اعدادنا ماشي طيب وصدقوني كلو يوم بتظهر فائدة الرجوع للحق والاعتماد على الصغار وفي وضع زي ده كان مفروض يستمر الوالي لانه وضع محتاج لي رعاية والرعاية ما دعاية رعاية حاضرة وكاشها بره نشء زي ديل وااااو بتشيب شعورهم قبل يومهم ونبدأ من الصفر عشان كده يا جيمي حقو تخلي الاولاد دل يقوى عودهم وبعد داك ممكن تعمل الدايرو لكن تخلي الزرع يا دوبك مبتق بموت عطش يا فردة ايها الناس واحد بتاع بحر صايم مرشرش الواطه ولابس سبحة وعامل ليك فيها ابو الورع ذاتو قاعد يتونس مع صاحبو نغمة رسالة جات في موبايلو قراها وخته الموبايل وما علق تاني رسالة عمل نفس الحكاية وواصل يتونس رابط ليهو شريط في راسو تقول كابتن الصائمين تاني جات رسالة قراها وقال لي صاحبو علي اليمين الرسائل الدينية الجاتني من بداية رمضان لي اسي موبايلي قربت تقوم ليهو دقن اها نرجع لي الخلافات الكتيرة البدت تظهر مؤخراً في المريخ الخلافات الخلتنا سمينا المريخ أبيي الخلافات الما عندها اي اساس توتر ساي وبلبلة ما ليها معنى وحقو الناس تفكر للحكاية دي وما اجمل قامات المريخ الشاهقة حين تقف الى جوار بعضها منظر بديع كأنها تجمع ناطحات سحاب وعشان ما ناطحات السحاب يبقى مصيرها مصير برجي التجارة ويجوا الدايمة في مشهد مأساوي حقو يخلوا بالهم للطيارات الطيارات البتطير من ناطحة سحاب شايلة كلام وتوديهو لناطحة سحاب جايبة كلام الطيارات دي هي الرمت برجي التجارة على عينك يا تاجر يبقى ما تتاجروا بالمواقف وتفقدوا المريخ الكتير على الاقل قامات ومقامات وعلى القامات الباسقات ان يتمسكوا بقاماتهم ولا ينزلوا للصغائر ومريخ يا مريخ يعيش اها نجي لي شمارات والي الخرتوم كان شفت يا والينا عشان نجهز للعيد باقي رمضان ما بكفينا يا زيدوهوا لينا يا في باقيهو ده خلينا اقتنعوا بانو الفينا مكفينا بس المرتب ما بكفينا يبقى المرتب ضاعفوهوا لينا سلك كهربا ننساك كيف والشفع السنة دي للعيد الا نحنكم والى لقاء سلك
