كانت مباراة المريخ واهلي الخرطوم قمة في كل شيء إلا التحكيم لم يكن في مستوى المباراة كان معلقاً على شماعته يخطئ ولا يظلم كانت قمة في المهارات واللعب الرجولي والخططي واستطاع المريخ ان يحول خسارته لفوز لان روح المريخ بدت تدب في ذلك الجسد الذي هجرته طويلاً وده في حد ذاتو مكسب كبير ووقوف الجماهير بهذا الاصرار والتشجيع بحرارة والفريق متأخر بهدف منذ الدقيقة العاشرة ده برضو ليهو معناهو الجماهير لما تقرر تصبر تبقى مقتنعة انو الفريق ماشي صاح هنات بسيطة وعلات سببها الرئيسي طبائع بعض القدامى نوع من السلبية اثناء اللعب في ناس طبيعتهم كده ما بقدروا يغيروا طبيعتهم عشان المريخ والمريخ كمان ما بقدر يغير طبعوا عن زي ديل يبقى البحصل زي الحصل بين الطريفي وجملو المهم المباراة فيها سلبيات ولكن المؤشرات الايجابية فيها اكدت اننا ماشين صاح وبمزيد من الصبر يا ناس سنعود لمنصات التتويج الافريقية قلت سنعود ابقوا معنا سنعود لاننا اساساً كنا فيها يوماً ما لكن اذا كان الكلام عن الهلال ما ممكن طبعاً نقول سيعود لمنصات التتويج الافريقية يعود كيف لي حته عمرو ما كان فيها في نشرة الاخبار دي يقول ليك عاد الى البلاد السيد وزير كذا بعد زيارة للصين استغرقت حوالي اسبوعين «النثرات طبعاً ما بذيعوها» لكن كلمة عاد للبلاد تفيد انو كان في البلاد لكن مثلاً ما ممكن نقول عاد للبلاد ملك هولندا الصاح نقول وصل البلاد ملك هولندا في مهمة كذا وكذا لانو ملك هولندا ما ساكن عندنا يبقى لما يجينا بكون وصل ما عاد عشان كده بنقول نعود نحن المريخاب لمنصات التتويج الافريقية ويقول الخبر ان يصل الهلال لمنصات التتويج الافريقية فرق كبير بين يعود ويصل وخليك متصل عشان الهلال يصل نديكم ستة وتمنين سنة تاني وليكم اجر المحاولة المهم نحنا ماشين صاح ونتمنى ان يقوم الجمهور الواعي بدوره الرسالي والبطولي مع الصبر الجميل لنعود موش نصل المهم الهبابي برد شديد والرقاد بالقميص الكنغولي في الحوش متعة ومتعة المتعة الاجواء الخريفية دي وصبحان عيد المهم كان السيسي كما توقعنا له قائداً ميدانياً محترماً فقام بالقيادة الحقيقية داخل الملعب واستطاع ان يسيطر على الاوضاع اذا تفلتت واعاد الثقة للمدرجات واعادها للاعبين داخل الملعب فاستحق النجومية التي قلدها له الواقع والجمهور قبل سوداني وصدقوني ناس يخطئ ولا يظلم ديل بتلحوا لينا الزول ده بالاخطاء عشان يقيف كورة كورتين طبعاً في كورة كده بوزنوا ليهو كروتها عشان ما يلعبها معقولة باسكال والسيسي وعلاء الدين مهند شنو وبخيت منو وسيدي بيه ياتو البقعدوا في وسط فيهو السيسي وباسكال وعلولو عشان كده يخطئ حا يخطئ في انذار الثلاثة ديل عشان على الاقل يغيب منهم اتنين كورة الهلال أها نجي لي شمارات والي الخرتوم كان شفت يا والينا عندنا مثل قديماً لينا بقول البدورك ولا البتدورو يا والينا عشان كده انتوا اخير لينا موش بتدورونا يا والينا !!!!! سلك كهربا ننساك كيف والبدورك ما بتدورو والى لقاء