من زمن الكورة اسمها التيوة كان في مثل بقول الكيشه قدمو قدمو والحقو وفوتو ما كيشه كيشه ساااااي بعيش علي تقدمو وبسرح ولما يسرح تاني ما بجمع أها اشتغلنا بالمثل قدمنا الكيشه وقدمنا فيهو عرض لما عرف حاجة حصان المدينة ما شفع ولا نفع مع همر العصر الحديث الهمر يا عمك محمد عبدالماجد طبعاً اسي بكون بكتب عن عثمان حسين ما تنسى البلابل يا حمادة وقالوا فطومة اختي وقفت ليها ركشة لما عاينت لقت لساتك الركشة تلاتة حردت المرقة ذاتها أيها الناس الغريبة ضفر كلما يجيب قون في الهلال الكورة تنتهي تلاتة لينا حقو تاني لما ضفر يجيب قون في الهلال الحكم يخليهم يردوها من النص تلاتة مرات عشان يكسبوا زمنهم الداير يمشي يمشي من بدري والداير يطقع يطقع من بدري ضفر جاب قون بتنتهي تلاتة بتنتهي تلاتة المهم ببرطع المدينة مساحة للبرطعة ساي ما لقاها فريق بلعب بخطة الكارو ياخ طبعاً عارفين العلاقة بين فريق الجماعة والكارو شنو ؟؟؟ في الاتنين الحصان قدام رابطين ليهم حصان قدام يبرطع ساااااي ودايرين يغلبوا معقولة !!! وكتب روشا عنتر كتلو أعمى الله يرحم عنتر يعني اعترفتوا بموت عنتر الدايم الله يعني ضربنا لعنتر الاسبوع الجاي ببقى ضرب علي الميت ؟؟ حرااااااااااااام الضرب علي الميت حرااااام فارشين علي عنتر وين يا روشا ؟؟؟؟ هنا ولا في أديس ؟؟؟؟ الغريبة عنتر ده يا روشا كيف يكون عنتر وتمنية وتمنين سنة ما جاب راس من بره سيفو ده سيف عشر ولا سيفو ده سيف مساوي!!! المرحوم عنتر متمرن متين ؟؟؟ لكن قون راجي التالت ده مبالغة بالله الكورة زي الفار دخلت تحت واحد وعشرين ساق مافي ساق حسه بيها ولا زول شافها ما تستغربوا في واحد وعشرين ساق دي فداسي ده كراعو واحدة عشان كده طلع عدد السيقان فردي غايتو قون عجيب زي الكشح ليهو مويه تحت الرجال تقال ديل شووووووو وعزو كالعادة انبطح لقاها جوه اتدردق أيها الناس كنا متأكدين من انتصارنا لانهم تقال شديد بتحركوا يا الله ويا مين وكنا عارفين ايمن سعيد ده شفت بجهجه التقال ديل وقد كان وكان يا ما كان زمان عند الجماعة يا مان زي سيسيه ده اسمو داريو كان يطير البلنت ويدور البمبان أيها الناس كبسور ما اشتكانا دحين ؟؟؟ إن شاء الله يقول قون ضفر شات الكورة ضفر طيب قلنا شنو قلنا جابو ضفر أيها الناس إن تنصروا الله ينصركم أها نجي لي شمارات والي الخرتوم كان شفت يا والينا الخوف من الإيبولا ده ما بخلينا بالذات بعد سمعنا إنها جات في دولة جارة لينا وعزيزة علينا وكانت مننا ولينا ولسه مع ناسها متشابكات ايدينا عشان كده يا والينا في هذا الخصوص حبة اهتموا بينا سلك كهربا ننساك كيف يا حبوب والبتاعة قالوا وصلت الجنوب والى لقاء سلك
