مثلاً تلقى ناس هوايتهم الصيد والصيد خشوم بيوت زول هوايتو صيد السمك وفي ناس هوايتها صيد الخلا وفي ناس بتهوى تصيد الاخطاء وفي ناس بتصطاد في الماء العكرة كلو زول بي مزاجو وجمال سالم من ناس الصيد ديل بهوى صيد الشاردة والواردة يمسك الشاردة بي جاي والواردة بهناك يخلي ليك الناس الراجين الشاردة يتطاقشوا مع الناس الراجين الواردة الهوايات خشوم بيوت في ناس هوايتهم يكتبوا عن عثمان حسين زي محمد عبدالماجد الشهر ده حايهرينا اغنيات عثمان حسين لكن من منا لا يستمتع بعثمان حسين بالذات لما يكتب عنو محمد عبدالماجد اكتب لينا يا حمادة عن ذكرتني تيرارا ذكرتني حبيبي ذكرتني الهوايات خشوم بيوت في ناس بتهوى الشمارات الواحد فيهم لو نايم تقول ليهو ما حكيت ليك يقوم فلتلب يفتح خشمو ويقول ليك اهاااااا احكي لي ناس الشمارات ديل كتار وفي ناس بتهوى تربية الحيوانات النادرة تلقى الواحد مربي ليهو كديسة دسيسه شعرها تقول عاملة ليهو دهان فرد وما بترقد في الواطه الكنبة بس واجمل كنبة في الصالون هوايات غريبة في ناس بتهوى الحفلات الواحد يقشر ويتريح تقول ليهو علي وين يقول ليك ماشي عرس رمتله ساااااي العريس منو ما بعرفو يختار صالة ويمشي يترمتل ديل فيهم ناس بنظموا الحفلة كمان اهل العرسان بعد العرس لما يشغلوا الشريط اول شي بسألوا انتوا ده منو ؟؟؟ زول بعرفوا مافي هواية في واحد من الجماعة ديل مرة لقى العربات شديدة والصالة فخمة اتوكل وانقطع اتاري القصة ما حفلة القصة اجتماع مؤتمر وطني ووجد نفسه مجبور على التهليل والتكبير وكسير التلج المجتمعين ذاتو لما شافوهوا قربوا يرشحوهوا للولاية زي ديل ممكن تضرب معاهم اصلو المناصب في بلدنا بتجيبها الصدف المهم كلو زول بهوايتو في ناس بتهوى جمع المال باي طريقة وبكل السبل يمارسون هوايتهم المحببة في الطيف او في الصحيان الواحد كان حلم يحلم بشنطة دولار الطبعة الجديدة المهم تختلف الهوايات لكن في ناس ما عندها هوايات لا عندهم فنان مفضل ولا اغنية عاجباهم عليك الله شفت ليك زول ما عندو فنان مفضل !!!!! اسي محمد عبدالماجد فنانو المفضل عثمان حسين بسمعو طول العام وبكتب عنو ايام الهلال يتهزم يوم فيتا كتب عن عثمان حسين ويوم مازيمبي كتب عن عثمان حسين ويوم الخمسة المازيمبية كتب كل اغاني عثمان حسين حتى الما اتلحنت ولا اتغنت ولا اتكتبت اليوم داك محمد عبدالماجد كتب عنها هوايات واليومين دي طبعاً حايهرينا لكن هات يا ابو حميد اي شي من عثمان حسين حلو المهم كلو زول ليهو هوايتو قاعد في البيت بمارس في هوايتي ود اخوي صغير جاني لقاني قاعد وسط ما اهوى وبتفرج قال لي يا عمو نحنا كلنا موش مريخاب قلت ليهو الحمد لله يا حميد يا ولدي قال لي وتيب مربي ديل ليه طبعا انا اهوى تربية الحمام شديد ضحكت وقلت ليهو ده حمام نادر ما حمام بلدي يا ولدي قال لي كان كده معليش جني وجن الحمام البلدي المهم كلو زول ليهو هوايتو والداير تعرف هويتو شوف هوايتو يعني البغني لي عثمان حسين معروف يا مشوكش يا الهلال مغلوب واذا قابلك شعب هوايتو صالة المغادرة تعرف طوالي هويتو نعرف انو من الشعب الفضل أيها الناس إن تنصروا الله ينصركم أها نجي لي شمارات والي الخرتوم كان شفت يا والينا الشتاء خشه علينا ما بنشوف لمة يا والينا الا لما الشتاء يجينا بنتلملم كلنا تحت فرد بطانية يا والينا لا الجوع بقدر يدفينا ولا سيد البطانية بالقسط بدينا وقصة نشتري مافي زول بقدر فينا سلك كهربا ننساك كيف والبرد لو قرضنا حانبقى شهداء سقطنا والى لقاء سلك