اي شي يعملوا ليهو راس وقعر زمان في حاجة اسمها خطوبة بجوا اهل الولد يقدموا انفسهم ويتقدموا للبت اسي بقت تعارف طبعاً ما تعارف بين الولد والبت ديل بالذات بكونوا بعرفوا بعض شدييييييييييد والله يبارك العرفة التعارف بكون بين اهل الولد واهل البت يتعارفوا ويعرفوا الحاصل الما كانوا عارفنوا الاهل آخر من يعرف زمان البت بقولوا ليها جاك عريس تقول اسمو منو وشغال شنو شكلو كيف ولونو شنو اسي بتكون ناقشة ليك حنانو ذاتو الزمن اتطور والبت بقت تجيب عريسها بي روحها المهم الاهل يتعارفوا وبعد داك يدوهم في ناس في التعارف بعقدوا اهل العروس بخافوا الزوغة يقولوا ليك خال العروس ده مربيها من زمان ومسافر قلنا نحضرو عشان ما بحضر العرس اي سبب المهم الولد يتوكر ولانو في تعارف بقوم ناس كتار بتعارفوا وبنكروا العرفة كان قابلتهم في المواصلات ينسوا ليك الكيك والبيبسي الطفحوهوا عندك عادي يكون ولدهم قام فوق اليومين دي كلنا محتاجين تعارف الواحد يكون صاحبك ولا قريبك تكونوا ليكم ستة سنين ما اتقابلتوا محتاجين تعارف اخوك يمشي امريكا يقعد تسعة سنين عشان يعمل ورق زي ده لما يرجع موش محتاج تعارف مع ناس البيت ؟؟؟ المهم مع موضة التعارف الهلال عندو الليلة تعارف وليهم حق يعملوا تعارف كل زول من بلد ديل بعرفوا بعضهم من وين عاد غايتو في التعارف حقو يكون بدل الاسماء ارقام المشكلة الا يجيبوا عمك قوقل يترجم ستة لغات واربعين رطانة ديل يتفاهموا كيف بس !!! الغريبة قالوا حا يأدوا القسم قسم بي محيك البدري ؟؟؟ يعني كلو زول يقسم براهو اولاد البلد يحلفوا بالله العظيم وكتابه الكريم والمسيحيين يقسموا بالكتاب المقدس دحين ما بكون فيهم ناس تانين بقسموا بي اكتل امي وابوي ؟؟ ولو في زول بحلف بالمساير والشعر الضفاير والنور الجهر وناس ما تستغربوا لو حلفوا بي هبل كلو شي جائز الجنسيات كتيرة ومختلفة وحرية الاديان مكفولة في البلد دي حقوا حكاية القسم دي تخلوها يا روشا خلوا الموضوع تعارف لكن اعقدوا طوالي اسي بكري المدينة موش قعد معاكم في بيت كردنة تعارف وقام فوق ؟؟؟ خليهو بكري المدينة كروز ده دحين ما قعد معاكم تعارف في الواتس وقام فوق لما شاف بت باب سويقة ؟؟؟ كان تعقدوا ليهم كان تقولوا ليهم كردنة خالنا ده بسافر ولا زم يحضر العقد المهم كان صحي هلالاب اعملوا التعارف في بيتكم في ناديكم ناديكم يناديكم وعاملين طرش فصيل عبدالواحد قال عرس هنا مافي تعارف تم كهيه كرتا والقائد الميداني ماجد اسماعيل جااااااهز وفتش جنودوا قال ليهم جاهزين قالوا ليهو جهاد نصر شهادة اقول ليكم طالما بتجتمعوا بالواتس اتعارفوا بالواتس واعقدوا في النت الشبكة تخرخر كروز يمرق في المريخ المهم شفت كبير رسل نكتة حلوة قال حلمان في مؤتمر صحفي روشا سأل جمال يا جيمي انت دولاراتك كم ؟؟؟ الوالي قال ليهو قبل السؤال ولا بعد السؤال ما قلتوا فلس ؟؟؟؟ فطومة مستني جبنتك في ناديكم ومعاي روشا ايها الناس لماذا رفض قادة التحالف اللقاء بالشروق ؟؟؟ وهل فعلاً وضعوا شروط منها عدم تداخل اسماء معينة ؟؟؟ وهل فعلاً اشترطوا الاتصال بي ناس معينين كمداخلات ؟؟؟ وهل فعلاً وهل فعلاً وهل فعلاً؟ المنهجية والعلمية موش بتتطلب شفافية ؟ حتى محاربة الدكتاتورية بتطلب شفافية فكيف ننادي بالمنهجية والعلمية والديمقراطية ونشترط شروطاً معينة لاجراء حوار من ضمنها اسقاط حق البعض في المداخلات ؟؟؟ هل الكلام ده ماشي مع بعضو؟؟؟ هل فعلاً وهل فعلاً ؟؟؟؟ سيد الغبينة بقابلك في اي مكان في اي زمان بقول ليك طالعني الخلا يبقى الشروط ما كان حبابها ونادر وقريش ما اظن بعجزوا عن الرد على اي مداخلة طالما تبنوا فكراً أو كما حدثونا أيها الناس إذا أراد عبدالصمد السفر لمصر والاشراف على البعثة يبقى مافي داعي من اساسو لي سفر حاتم ذاتو كان يمشي عبدالصمد من اول يوم وخيراً فعل صديق بابتعاده وخيراً يفعل لو تفرغ للعمل التنفيذي الذي عرف به أيها الناس أخبرنا الأخ رمضان عوض علي فجعنا افتقدنا اول امس مريخياً شريفاً نزيهاً قوياً في حبه للمريخ انتقل في ريعان شبابه من ابناء غرب كردفان قرية ابو راي محلية غبيش كان يتابع اخبار الزعيم يومياً برغم بعد المسافة فالمريخ في قلبه بالداخل قريباً الى نفسه رحل وهو يبحث عن اخبار المريخ كان يمني نفسه بموسم استثنائي انه الشاب الخلوق يحيى إدريس محمد أسألكم بالله ان تسألوا الله له الرحمة في هذا اليوم المبارك ولن نقول إلا ما يرضي الله «إنا لله وإنا إليه راجعون» أيها الناس إن تنصروا الله ينصركم اها نجي لي شمارات والي الخرتوم يا والينا انا خايف يجي يوم نندم كهربا دفع مقدم موية دفع مقدم القراية دفع مقدم الايجار دفع مقدم التلفونات دفع مقدم الكمساري قبل تركب يطقطق ليك دفع مقدم الحج دفع مقدم العرس دفع مقدم الولادة دفع مقدم هو ذاتو المفلس الولادة ليهو شنو المفلهم حتى العربات بقت دفع امامي مقدم كمان العلاج بقى دفع مقدم ؟؟ سلك كهربا ننساك كيف ومع مقدم ما بتتقدم ولا بنتقدم حرم تندم والى لقاء. سلك
