- ألو.. "حسين"؟ - لا.. أبداً.. أنا ما "حسين".. أنا "عبد السخي". - آسف.. الرقم خطأ. - لا مافي مشكلة.. يظهر رقمك (سوداني). - يعني شنو؟ - يعني ما تخت رقم (9).. صفر وبعداك الرقم طوالي. - تمام.. أشكرك جداً يا ظريف. - ألو.. هشام؟ - لا والله.. أنا ما "هشام". - منو يعني!؟ - يا أخي إنت الضارب مش أنا.. وعلى أي حال ما مشكلة.. أنا "عبد السخي". - طيب يا "عبد السخي" رقمك كم؟ - رقمي.. لازم يعني؟ - بس لأنو الرقم ده ياهو ذاتو الأداني ليهو "هشام". - رقمك ببدأ بشنو؟ - ما فاهم! - يعني صفر + (9) ولا لا. - ما فيهو (9). - بس خلاص.. ده معناهو إنو الرقم بتاعك (سوداني) مش (حاجة تانية). - كدي أجرب. - يديك العافية. - مشكور يا أبو الشباب. - ألو.. أوعى تقول لي داير "إسماعيل" لأنو أنا "عبد السخي".. وحكاية الرقم ياهو ذاتو دي أنا ما لي علاقة بيها.. الرقم خطأ.. خت (9).. أو شيل (9).. المهم إتصرف بعيد عني. - مالك يا "عبد السخي" بتتكلم براك.. أنا صاحبك "مرتضى".. والنمرة صاح يا أخي. - أنا آسف والله.. بس معظم المكالمات الأخيرة جاية بالغلط.. والسبب حكاية (9). - حكاية (9) دي شنو؟ - دي حكاية طويلة.. وحقو ناس الاتصالات يحلوها سريع.. يعني يا تكون الأرقام كلها ب(9) أو ما تكون ب(9). - برضو ما فاهم. - أنا والله ذاتي ما فاهم حاجة. - خلينا في المهم.. أحوالك كيف. - عال.. العال. - طيب الحمد لله. - بالمناسبة دي إنت رقم تلفونك شنو. - ليه؟! - يعني ب(9) ولا من غير (9). - تاني يا "عبد السخي"!!