والقلب قد يدخلك في علاقات ومطبات إن دلت فهي تدل على ضعف عضلته وهشاشة إحساسه. والله جد.. أحياناً بعد موجة ودوامة علاقات فاشلة وعقيمة وبلا نكهة، يبيع القلب القضية العاطفية في عوالم اللا مبالاة وفقاً لحركة تبادل سهام الريد، فيعلن عن قراره بإطلاق أداة التعويم الكلي للوجدان والأحاسيس والمشاعر. تعويم المشاعر يجعلك تائهاً في الحكاوي وفي الغناوي وفي العيون.. ما فاهم حاجة عنك وعنهم.. الشوق في السوق السوداء لن يراعي حال المشتاق، ف هو غالباً حليف المشتاق إليه. وطبعاً أكيد ما في لهفة كلو كلو.. إلا من جانبك، فتعويم المشاعر يجلب المماطلة.. لابس رمادي.. في حركة تعويم المشاعر يسمح البني آدم لنفسه أن يعيش في قلق وعدم اتزان وحالة غير مستقرة إطلاقاً ك من يتنفس بجهاز والجهاز ما جهازو.. بتعيش عاطفة عشوائية، وبتشتري ريدة زول بموية حياتك وصحتك.. بتسمح لهذا الزول أن يشغل حيزاً كبيراً من فكرك وتفكيرك، بدون ما الزول دا يعبر ليك ويوضح ليك رتبتك في قلبو وتصنيفك الاجتماعي بالنسبة ليهو. ولا بخطرك عن موضعك العاطفي من إعراب الحواس.. عايش مجهجه وما عارف العليك.. وبما أنك تقيم بمنطقة ريد عشوائية وأرض غير صالحة للحب، ممكن في أي لحظة يكلم محلية قلبو تجي تشيلك من مخطط حياتو لصالح ريد أجنبي والقانون لا يحمي المهملين وكان الله يحب المحسنين.. وعشان تكون عارف، لا توجد منظمة إغاثة تعمل في هذا المجال. هو ما غلطان لأنو ما وعدك بحاجة، انت ال رضيت تعيش الحالة الما فيها إضاءات دي.. حالة بلا ماء، بلا نور وبلا انترنت.. فمن حقو يرفع عليك سعرو ويعز عليك قلبو. المشكلة أن قلباً بهذا الوضع الصحي المتدهور الذي أوصله إلى العوم في أسوأ مناطق الإحساس، قلب مؤهل للغرق في القيف. أهلو ما علموه السباحة وقالوا ليهو يلا عوم. وبعدين يجوا يسألوك مالو غرق.. غرق عشان ما بعرف يسوق.. قلب منتهي.. وراقد ونسة. والله جد.. على صعيد ما بعيد، تقول حبوبة جيرانا: لما يجي زول يعمل توصيلة مواسير بشكل خاطئ، انت لو بتفهم ما بتجيبو هو ذاتو يصلح الخطأ دا.. بتجيب سباك تاني يحاول يعالج إشكالياتو والأشياء التي (هببها).. لأنو ببساطة لو بعرف كان عرف. زمان لما نجيب غلط في مسألة ما، فإننا نبحث عن من يستطيع حلها ليساعدنا في الحصول على صاح في المرة القادمة. لو بنعرف نحلها ما كنا جبناها غلط.. بالعقل كدا.. أكيد ما معجبين بي x أقول قولي هذا من باب تعويم المشاعر في بحر العشق وأنهارو. وعموماً يا ناسيني كلياً: عملت خير و........ نمشي وين وبي وين؟!
