تحدثت صحف الأمس عن الحيرة التي ضربت مواطني مدينة ود مدني أمس حيث عاشت يومها كله تتبادل الأسئلة عن هوية الطائرة التي حلقت في سماء المدينة قبل أن تهبط بميدان يلعب فيه بعض الصبية الكرة بحي (عووضة) وكانت دهشة الجمهور حين هبط طاقم الطائرة و(ركبوا ركشة) غاصت بهم داخل المدينة قبل أن تعود بهم (ذات الركشة) إلى طائرتهم والتي أقلعت مرة أخري (وكأنو ما حصلت حاجة) ! العبد لله وضع الخبر كما هو في موقعه على الفيس بوك www.facebook.com/alfatihgabra وإليكم بعضاً من تعليقات القراء : يكون المعلم قطع سير الأبنص وماشي يجيب (سفة) وجاي ... شيلو الصبر الميدان ده آخر محطة والبيت لى جوه فركبوا ركشة ... عادي يا شباب الجماعة ديل كانوا قاعدين الصباح في الحامية يفطروا قامت الشطة الخدرا نقصت فقالوا يمشوا يجازفوها من سوق مدني .. دي فيها حاجة؟ والله أنا بفتكر إنو الجماعة ديل مشوا يجيبو زيادة .. بس زيادة شنو ... ما عارف ! عادي يا جماعة الطيارة بتنزل في الواطة عاوزنها يعني تنزل وين ؟ وللا يعني تفضل معلقة في السماء؟ يكونوا تعبوا من الطيران قالو نتمها ركشات سااااي فما تظلموهم يا جماعة ! يكونوا بيجربوا في الرادار المنخفض يا ربي؟ا إن شاء الله بس الجمهور يكون شال نمرة الطيارة؟ طبعا دي من ضمن الخطه الخمسيه بتاعتنا تشغيل طيارات ( مواصلات داخليه) بعد ما بقينا دوله نفطيه وبنصنع طيارات وكده ! يكون ياربي دا (عوض الناظر) ومرتعوضية جابوهم راجعين ناس كوكب المريخ؟ يكونوا زهجو من القعاد وجاهم وجع ضهر قالو نريح شوية ... النشوف اخرتا معاهم! تسعة صباحا دي الواطة كاشفة يعني لو كانت تسعة بالليل نقول احتمال الطيارة تكون (طافية نور) والوقت كمان (صلاة عشاء) بس وين المراقبة بالنظر ؟ فتحوا عيونكم ديل كباااار عشان تكشفوا كويس وأي زول جنبو خور يعمل حسابو ما يطلع يوم يلقى ليهو غواصة واقفة وفيها مارينز أو قراصنة . يعني من المستحيل المواطن السوداني ده يكون نافع بي حاجه؟ وللا يقوم بي واجبو كامل؟ نحنا هسسسه دي في موضوع طيارات اسرائيل دي مش قلنا ليكم استخدمو النظر ؟ مش قلنا ليكم ركزووو كويس ؟ عشان نعرف نتصرف؟ اها يعني هسي نحنا نعرف الطياره دي تابعة لي منو ؟؟ الطيارات كتيره ومسيخه ما في زول شاف نمرتها كم ؟؟ عشان نعرفا ترخيص وين ولا موديلا موديل كم ساي؟ غايتو الما قدرت افهمو والمستغرب ليهو بتاع الركشه ده جا من وين فجأتن ؟ غايتو بتاعين الهيلكوبترات ديل بقو يعملوا ليهم في حركات عجيبه خلاص .. المهم الوصيه الاحنا بنقولا للمواطنين اي زول يشوف ليهو طياره وللا طبق طاير يحاول يعرف لينا اوصاف السواق أو حتى بالعدم شكل (الكمساري) عشان نحدد الجهة ونحتفظ (بحق الرد) . الحكاية ومافيها انو الخرطوم بقت زحمة والشوارع ضيقة والعربات كتيرة والناس ديل قررو ا يرفعو الدعم من المحروقات للعربات ( البتمشي (بالواطة ) ويكبوهو كلو كدعم لمحروقات ( الطيارات ) وده كلو عشان يقللو الضغط علي الشوارع وحاتكون تاني المواصلات ( هليكوبترات ) وبي محطات محددة يعني الطيارة تقوم من الموقف الجديد في خط الصحافة وتمشي تعمل كونيكشن في ( نادي الاسرة ) وتقوم تاني وتعمل كونيكشن في ( محطة الغالي ) لحدت ماتصل اخر محطة واللي هي ( الميناء البري ) وطبعا مافي حاجة اسمها ( قرصة) وللا ( نزلني هنا ) والدفع يا شاب قبل ماتركب عشان فوق ماتقول انا طالب وللا نازل قريب (الحنك ده) خلاص انسوهو وممنوع اكل التسالي والنبق والترمس وسف والتدخين وسف التمباك وبرضو تلتزمو بي اماكنكم يعني الحريم قدام والرجال ورا وشماعة ماااااااافي وممنوع فتح الشبابيك وطبعا في ناس بكونو متخوفين من الطيارات دي يعني تكون قديمة ولا مافيها نور وكده لكن احب اطمنكم انو الطيارات دي (منتهية الصلاحية) واهم حاااااااااااااااجة إنو فيها نورين نور طويل ونور قصير والمنشات بتاعتا شغالة (تش) ولساتكها ( تيوبليس ) ومكتوب عليها (هبوط متكرر) ،وطبعا اهم حاجة حاتكون أسعارا مناسبة وفي متناول الجميع وده كلو من اجل المواطن (الصابر) وحكاية(طيارة مدني) دي للمافهمنها انهم عاوزين يعملو ( تستا ) برة العاصمة قبل ماتعمم التجربة داخل العاصمة والمفأجاة انو المشروع ده ح يفتح فرص عمل لأنهم عاوزين 1000 كابتن طيار ( سواق سابقا ) و1000 مضيف ( كمساري سابقا ) وحايعملو ليهم تدريب قبل ماينزلوهم الخط... أنا بفتكر السبب الوحيد الممكن يخلي الطيارة دي تنزل في الحتة دي رغم خطورة المسألة إنو الطيار فجأتن سمع صوت (الكتينة) وخاف إنها تنقطع فقام عمل العملة المهببة دي .. وركب الركشة هو وجماعتو ومشوا المنطقة محلات الأسبيرات وجابو الكتينة وجو .. بس للأسف الشديد ما ممكن يكون ده السبب عشان مافي زول شاف الجماعة ديل لمن رجعوا بالركشة قامو (عفرتو) الطيارة (وغيرو الكتينة) ... الناس ديل ركبوا طوااالي وعملوا إقلاع !!! كسرة : جابت ليها نزول طيارات في الأحياء السكنية وكمان محل الأولاد بيلعبوا ؟ غايتو أخير نسكت ساكت وكت مافي زول ح يهببو لينا ! كسرة ثابتة : أخبار خط هيثرو شنو(ووو ووو)؟ الفاتح جبرا ساخر سبيل [email protected]
