* أيها الناس. * أمس انتصرنا على ارتريا فى سيكافا. * ولكن هل اقنع الأداء والشكل والتشكيل أهل الرياضة؟؟؟؟ * وهل انتصرنا لأننا الأجدر ام لأن ارتريا زى الصومال؟؟؟؟ * وهل بهذه الصور سنؤدى الأداء المقنع والمشرف فى بقية المباريات؟؟؟؟ * نتمنى ان نكون مخطئين فى تقديراتنا وأن يشنقل قندول البلد ريكة البطولة. * المهم. * أخبار تحدثنا عن أنهاء الوالى لصفقة المحترفين بمن فيهم كلتشى. * وأخبار عن مفاوضات بين كلتشى وجهات أجنبية. * هذا التناقض يكشف مدى الشتل الذى اعتدنا عليه. * ننقل الشمار دون ان نستوثق منه. * الشمار محتاج يضروهو شوية. * عشان يبقى ناعم. * لكن كلو قش كدة ما بجيب حقو. * جنى وجن الكلو قش. * بكون مغشوش. * نكهة ما فيهو. * أيها الناس. * رؤية الجهاز الفنى أعتقد هى التى يفترض ان تحدد مسار كلتشى وغيره. * وتنفيذ توصيات المدرب من عدمها هى التى تعبر عن عقلية الأدارة. * ونود ان نستوثق من عقلية مجلسنا فى هذه الفترة. * فترة التسجيلات الرئيسة. * المهم. * فاز شباب المريخ على شباب الموردة. * وحققوا المركز الثانى. * مركز لا يشبههم أطلاقاً. * ولكن ضاعت نقاط كان يمكن أن لا تضيع. * ولكن توليف فى الخانات وتشكيل يتغيير فى كل المباريات أعتقد هو ما دحرج الشباب للمركز الثانى. * وقد تكون هناك اسباب مقنعة للجهاز الفنى. * وقد يكون فى الأمر أشياء أخرى. * على كل نتمنى ان نستفيد من التجربة. * لأن فريق الشباب من دون فرق المريخ الأخرى هو الوحيد الذى كنا نضمن بطولته. * بالذات بعد ان حقق الرديف كاس بطولة اول منافسة رديف فى السودان. * وضمن الرديف كان ستة من الأشبال. * يبقى ما ممكن تشيل كاس الرديف بلاعبين هم نفسهم يخفقوا فى أحراز بطولة الشباب. * أملنا كبير فى كابتن محمد موسى. * فالرجل واضح جداً. * والعلاج بيده. * أيها الناس. * مبروك النيل وهاردلك للسوكرتا. * ومدينة كبورتسودان حرام ان لا يكون لها فريق على الأقل فى الممتاز. * فبورتسودان فى عهد ايلا وعصر المليك. * أضحت واجهة سياحية ثقافة مشرقة ومشرفة. * والتهنئة لحكومة الشرق التى صنعت من بورتسودان مدينة للجمال والخيال والثقافة والقيافة. * يا ربى مدرب الولاة ما بولف فى الخانات السنة دى؟ * وبمناسبة مدرب الولاة. * أستحضر قصة طريفة جمعتنى وجدى عليه رحمة الله مكى عبدالقادر. * كنت أسكن معه. * له نظرية. * فى سن معينة يجب ان يسكن معه أحفاده. * ليحسن تربيتهم ومراقبتهم وتقوية عودهم. * وقد كان. * كنت أحبه جداً برغم انه صعب جداً. * يحبنى جداً برغم اننى لم اكن المميز بين أقرانى فى الأسرة ولا المريخ بالنسبة له. * ولكن آلف الله بين قلبينا. * المهم. * أول أسبوع من رحولى للسكن مع جدى. * عملت قفص كبير. * جدى سأل بتاع مين القفص ده. * قالوا ليهو بتاع سلك. * عاوز يعمل بيهو أيه. * قالوا ليهو يربى فيهو عصافير. * وجبت العصافير. * بعدها جدى وجد قفص جديد. * وسأل نفس السؤال ووجد نفس الأجابة وعرف انو سلك جايب حمام يربيهو. * وهكذا الجداد ثم الكلب البوليسى الضخم ثم البط والكدايس. * يوم عاد جدى من عمله ووجد قرداً جميلاً مربوطاً على مدخل البيت. * ما سأل. * قال لى ناس البيت نادو لى الولد ده. * ودخل الى غرفته. * جيتو. * نعم يا جدى. * ألتفت على وقال بسخريته المعهودة. * لما تجى تجيب الفيل كلمنا عشان نفضى ليهو الأوضة. * القصة دى ذكرنى ليها الجندب الحايم فينا الأيام دى. * الليل كلو يصفر. * وكترت الجندب كترت علينا الضبوب. * وجندب قدر ده تماسيح ما بتقدر عليهو. * عشان كدة بقول لوالينا زى كلام جدى. * جابت ليها جندب كمان. * لما تجوا تجيبوا الأسد يا والينا قولوا لينا عشان نفضى ليكم البلد دى. * وبمناسبة والينا. * نجى لى شمارات والى الخرتوم. * أكان شفت يا والينا. * فى ناس كانوا بتونسوا. * بفخروا بانفسهم. * محور الفخر كان انو اى زول فيهم بقول انو ما بخاف من المرة. * أنو مخوف مرتو. * أنو الرجالة يا حليلا. * ينفخوا ساى. * وفيهم البطبخ وداسيها. * وفيهم اليدينوا اتشققن من الصابون فى غسيل العدة وعامل انو الموضوع طفح جلدى. * والبقول ليك انا امى كباية موية ما بديها ليها اترسل لى مرتى. * ويتنفخ. * والله يا هو الفضل. * المهم. * جاهم صاحبهم بتاع البحر. * سلم عليهم. * واحد قال ليهو اذا امك قالت كلام ومتك قالت كلام يمشى كلام منو فيهن. * بتاع البحر قال ليهم. * البتقولو امى ان شاء الله ما يبقى والبتقولو مرتى ان شاء الله يبقى. * الناس استغربوا يا والينا. * واحد قال ليهو يمشى كلام مرتك ويبقى على كلام امك. * بتاع البحر قال ليهو ايوة. * قالوا ليعو انت ما راجل. * قال ليهم انا اذا اتاخرت ساعة ساعتين. * امى بتقول سجمى دقشتو عربية,كتلوهوا,ودوهو البوليس,يمكن اعتقلوهو,طعنوهو الحرامية. * لكن مرتى لما اتاخر بتقول شنو؟ * وواصل. * بتقول هسى تلقاهو فى امواج بياكل فى فراخ. * يكون فى هوليدى معاهو واحدة بحضروا فى حفلة النصرى. * يكون حابى ليهو واحدة بت عز اهلها عازمنو الشاى بالكيك فى فيلتهم فى المنشية. * وأتلفت على الباقين. * يبقى كلام امى ولا كلام ملاتى؟؟؟ سلك كهربا *ننساك كيف والجندب قاعد بين العين ورمش العين. واللللللللللللللللللى لقاء سللللللللللللللللللللللك في السلك - بابكر سلك