كنت أتابعها في برنامج بنات حواء.. واستمر البرنامج بعد موت المرحومة حواء الطقطاقة.. وما زالت محتفظة بدلوكة حواء وبنيات حواء.. انتشارها السريع والشديد واللهفان خلاني أشفق عليها.. كل ما افتح قناة ألقاها هي مصنقرة وتنضم.. بي عافيتها والله يقدرها.. علا البزار مو سمح.. والدفيق الكتير بيكمل الشي.. أسمعي نضمي واديهو البحر.. أقعدي في حتة واحدة وجوّدي شغلك.. بعدين اليهزك ما يرميكي.. لا أشك في إمكانياتك الحوارية.. وإدارة البرامج.. وبكل إمانة والنصيحة لي الله برنامج بنات حواء كان ناجح.. لدرجة إنو سحب كتير من مشاهدي أشهر البرامج الرمضانية عليهو.. علا داك الليلة شفت ليكي برنامج تنضمي في الكورة.. وجبتي واحد من ناس الكورة.. ولقيت العوا والهرجة والكواريك.. اتلفت في أركان الاستوديو قلت القى لي دلوكة مكسورة واللا شتم مجدوع.. ما لقيت.. شوية أعرف إنو النضم في الكورة.. وحسب ما فهمت إنو الزول القدامك دا.. قام بحركة كعبة وجابتها الصحف الرياضية وإنتي قلتي ليهو الزول يخجل منها وانو الزول ما بيدخل الجريدة بيتو.. الراجل بأمانة دافع عن نفسو دفاع شديد.. وواضح انها كانت مكايدة ليهو وانتي اتجريتي وراها والراجل انتصر نصرا مؤزرا لا تشوبه شائبة وجاب شهودو الواقفين جنبو ساعة الحدث. وأنا شخصيا اقتنعت إنو الراجل برئ مما نسب اليه.. وهو عصر عليكي بالحيل وزعلان ومن حقو.. وأحسست بالحرج الإنتي كنتي فيهو.. وقدر ما قلتي للزول نتجاوز الحتة دي.. هو يقول لك "لا ما نتجاوزها، غايتو نضر شبكة الزول داك ما عترت لي". الأستاذة أم وضاح.. في جحور كدي دايرة زول يكون لابس قفازات حديد.. حتى يمشي عليها ويهابش فيها ويكون عندو الخبرة الكافية في معافرة الدواهي والسواهي. وبعدين تعالوا هنا الموضة دي شنو؟.. كل مقدم برنامج جايب زول وخاتيهو قدامو ويسلخ فيهو؟.. قنواتنا كلها بقت كدي.. قدر ما أفتح قناة القى واحد مزنوق زنقة كلب في طاحونة ومقدم البرنامج مرة ينهزرو ومرة يصر ليهو ومرة يغالطو ومرة.. ومرات اقول حسي الزول دا يقوم يخنق الزول داك ويتخانقو الاتنين.. وبعد مرات في قناة يكون فيها برنامجين بإسمين مختلفين بنفس الطريقة زانق ومزنوق ومشاهدين مزانيق. المحيرني مرات زول واااااحد القاهو مزنوق في قناة بعد يوم مزنوق في قناة تانية تاني ألقاهو مزنوق في قناة تالتة.. الزول دا ما بتوب؟.. غايتو عليكم جنس حكا.. يمرقنا منو الله.. ما تشوفو برنامج نجح في قناة إلا القنوات كلها تستنسخ منو.. وتمسخو علي سيدو الأصلي وعلي المشاهدين وتستهلكو الطريقة لحدي ما يظهر برنامج جديد.. وتتلحوهو.. والغريبة الشركات البترعى البرنامج.. نفس فكرة البرنامج ترعاها في كل القنوات.. ما بيقولو للناس يا جماعة نحن بنرعى فكرة جديدة وفريدة ومميزة عشان نشجع الابداع والابتكار ونقلل من المستنسخين ونحارب لصوص الافكار. لكن يظهر حكاية الرعاية دي زاتا فيها السر والجهر.. واللا ما بعرفو الفهم شنو؟.. عندهم قروش ودايرين يبعزقوها لو اتبرعو بيها لدار المايقوما.. أو دار المسنين.. والله افيد مليون مرة. مرة اخرى أستاذة أم وضاح أنا لا أشك في إمكانياتك ومقدراتك الإعلامية.. بس نشني صاح عشان ما نفقد إعلامية في قامتك!!!! الباب البجيب الريح- صحيفة اليوم التالي
