- حاج عبد الودود رجل متفائل.. في أحلك المواقف يبسط الأمور.. فإن حدث حادث حركة .. قبل أن يرى شيئاً يردد:- سلامة.. سلامة كبيرة.. وبعد أن يسأل انشاء الله مافي عوجة.. لا بس السواق مات.. سلامة كبيرة.. كان ممكن يموتوا الراكبين معاه.. وإن وقعت امرأة مسنة.. يصيح سلامة.. سلامة كبيرة.. فيحملونها الى المستشفى وبعد صور الأشعة يتضح انها كسرت حوضها ورجلها اليمنى ويدها اليسرى.. فيواصل بعد ذلك سلامة كبيرة.. كان ممكن يحصل ليها ارتجاج في المخ.. وتنشل. - في الخريف وقع حائط منزل حاجة حوا ومات أبو الوليدات وابنه الأصغر إذ كانا جالسان تحت الحيطة فيقول: سلامة.. سلامة كبيرة الما كانت قاعدة العايلة كلها. - مرة جاءت البيت ابنته المتزوجة تسحب أطفالها باكية.. الراجل طلقني.. أخذ يردد: سلامة سلامة كبيرة الما طلقك بالتلاتة.. بين دموعها تقول له: طلقني بالتلاتة يا بوي: يقول سلامة.. سلامة كبيرة.. لانو البطلق بالتلاتة ده معناها منفعل شديد سلامة.. سلامة كبيرة ما مد إيدو عليك.. كان عمل ليك عاهة. - مرة في بكاء حاج(عبد الدايم) قال لولده الكبير بعد أن شال معه الفاتحة.. المرحوم مات بي شنو؟ فقال له: جاتو ذبحة .. فقال له سلامة.. سلامة كبيرة الما مات بالسرطان كان اتعذب. - أضجر تفاؤله ناس الحلة فشكوه لأبنائه فاضطروا للاجتماع به وقالوا له: ناس الحلة شكوا منك.. فقال سلامة.. سلامة كبيرة.. فقال ابنه الأكبر بحسم: سلامة كيف يعني.. سلامة كبيرة يا ابني عشان البقت على ناس الحلة ما شكوا معاهم ناس حلة تانية. - أخيراً قرروا أن يعاملونه بالمثل فإن شكا من الرطوبة قالوا له: سلامة.. سلامة كبيرة الما عندك معاها سكري ولا ضغط.. فما ارعوى قال لهم: صحي والله سلامة كبيرة.. لما أعيت الناس الحيلة تركوه في حاله واستحملوه ولكنهم أصبحوا يسألونه سلامة كيف يعني؟ عسى أن يخونه التعبير فيوضحون له أن نظريته خاطئة. - ذات يوم.. حدث حادث جلل في الشارع الرئيسي حافلة انقلبت ثم اصطدمت بها شاحنة.. فجاء الى الموقع يردد سلامة.. سلامة كبيرة.. فقال أحد الحضور ويبدو انه غريب: سلامة كيف يا حاج.. فقال: ماتو كلهم.. فقالوا: كلهم .. الحافلة انتهت ولا بتتصلح.. فقالوا: الحافلة بقت حديد معجون.. قال سلامة.. سلامة كبيرة.. فقالوا هذه لحظة المجابهة.. فقالوا له: الناس كلهم ماتوا.. والحافلة انتهت فكيف تكون سلامة فرد عليهم: سلامة.. سلامة كبيرة إننا ما كنا راكبين معاهم! آخرة المخيرة قالو ليهو الشعب حزين لأنو الليله نهايه الاقتراع للاستفتاء قال سلامه سلامه كبيره .. الاقتراع انتهى بدون مشاكل .. قالو ليهو كيف الجنوب حينفصل قال سلامه سلامه كبيره الانفصل الجنوب براهو ما انفصلت معاهو دارفور..قالوا ليهو بالطريقه دي دارفور ذاتا حتنفصل .. قال برضو سلامه كبيره الشرق ما حينفصل..قالوا ليهو بالشايفينوا ده الشرق ذاتو ماشي للانفصال قال برضو سلامه سلامه كبيره العاصمه ماحتنفصل قالوا ليهو بالشايفينو ده الخرطوم حتنفصل وامدرمان حتنفصل وبحري حتنفصل قال برضو سلامه سلامه كبيره قالوا ليهو بس دي سلامه كيف!!؟ قال سلامه كبيره اني ما حأحضر بكون سيد الوداعة شال وداعتو .... الصباح..رباح - آخر لحظة [email protected]
