في صفحة الباب البجيب الريح علي الفيس بوك.. كتبت:- (من علامات الخرف تكون شايل موبايلك في يدك وتقلب البيت فوق تحت كايس ليهو.. ومن علامات التعمّق في الخرف تتصل منو على مرتك العند ناس أبوها:- "الو.. هناء.. يا اخي أنا مليون مرة قلت ليكي لما تجي تضايري البيت دا.. حاجاتي ما تهبشيها.. ساعة كاملة كايس لي موبايلي وما لاقيهو؟") تفاعل أصدقاء الصفحة مع الحدث عالية.. وقعد كل واحد يحكي.. عن ما أصابه أو أصاب قريب له أو أحد معارفه مما أصابه من داء الخرف.. الغريبة لقيت أن الخرف لا يصيب كبار السن فقط.. برضو شباب في ريعان الصبى والشباب مخرفين.. واليكم بعض حكاوى المخرفين الشباب.. .:- (ود عمتي ماشي يلحق صلاة العيد بالاستعجال داير يخت الشال في كتفو ختا سروال طويل.. قال الناس العيّد ليهم كلهم يعاينو فيهو باستغراب) دي من أم مهند (هههه بالمناسبة قاعد في البيت والوقت ضايق ماشي لي رفع عزاء شلت الريموت قايلو تلفوني ووصلت بيت العزا بعد صلاة المغرب حتى دخلت ايدي ف جيبي.. افوو) دا المخرف/ الريح نميري. أما نادر رستم، فحكى عن واقعة ولحظات خرف جماعي كتب:- "ذكرتني القصة الحصلت لينا مع أبوي الله يرحمو لابس النضارة وبفتش عليها ونحن كمان كنا بنفتش معاهو". أما زكريا إبراهيم ذكر انو في لحظات خرف عابرة "دخل السندوتش في جيبو.. وقرم الموبايل".. هنيئاً!! (دي جد جد واحد صاحبي شرب في سبيل وشال غطاية السبيل في ايدو ومشي ركب المواصلات والجماعه يعاينوا ليهو زول نضم معاهو مافي الكمساري جاء داير حقو صاحبي لقى نفسو شايل صينية مصقرة وحاضنها فكاها ضحكة عالية الناس ما استغربوا لانو صنفوهو مجنون من قبل ما يركب) من جمال عثمان للزوجة والإخوان والأخوات مع الأمنيات الطيبة! أما الصديقة/ بت الطيب تتحدث عن التدريب على الخرف للأطفال كتبت "أنا خرفي ظنيتو بعادي لأنو مافي زول جمبي بنبهني يعني بأكل ولدي الرضيع بدل أدي اخوهو الأكبر منو.. وألبس بتي هدوم أخوها وألبس أخوها هدوما والغريبة بقومو جارين عادي ولا في واحد ماخد بالو". وخديجة آدم كتبت عن خرف النعلات "ولامؤاخذة واحدة صحبتي لابسة فردة جزمتها وحدة والتانية شايلاها في ايدا وبتضرب بيها أخوها وتقول ليهو هسي كنت عاملها عربية وسايقها".. كنت أتوقع أخوها يرد يقول ليها ّحجزوها ناس المرور. نور العين صالح كتبت:- "مره بعمل في الفطور كسرت البيض في سلة القمامة وختيت القشر في الطوة وعااادي بشيل الحلة أكون عاوزه ادخلا التلاجة أدخل بيها الأوضة، والقي نفسي بكابس في باب الدولاب".. المشكلة تفتح الدولاب تلقاهو مسخن تقول التلاجة بااااااظت!! دي عينات من الخرف.. والصفحة مليانة مخرفين.. والسهلة برضو كلها مخرفين.. الله يكون في العون بس!!! الباب البجيب الريح- صحيفة اليوم التالي
