أكتر مجتمع عل وجه الأرض.. يغتال الإبداع.. المبدع من هو شافع يبدا المجتمع في محاربتو لو كان مبدع.. ومتميز في حاجة.. أولك بالتبادي من ناحية تربية ومسؤولية.. تلقى كل من له صلة رحم أو جوار أو معرفة ساكت من بعيد لي بعيد بالشافع بيعتبر نفسو مسعول منو.. لو شافع رسام.. وجا زول من الناس ديل ولقاهو بيرسم.. طوالي ينهرو ويقول ليهو( يا ولد قوم من تفينتك دي وخلي النضم الفاضي البتسوي فيهو دا وشوفك لك قراية تنفعك.. عشان كدي انت ديمة مطفش في المدرسة).. أو شافع قاعد قدام خشم بابهم وقاعد يلعب بالطين ويرسم.. أها دا قيامتو تربط.. أول حاجة تجي مرة الجيران ماشة وتقعد تكورك فيهو (يا ولد المقعدتك في خشم الباب شنو؟.. وب علي وب علي.. وكمان تلعب بالطين وجربنتا هدومك بالطين.. أمك وينا؟.. غايتو النسوان ديل يلدن ويطلقن في الشارع.. الشوارع كلها مليانة شفع؟ بري يا يمة.. إن رفعتي حجر ساكت تلقي تحتو شافع.. بري يا يمة نحن زمان أصلنا ما كنا ولادات كدي؟.) يكون عندها تسعة بطون.. الشافع يتلخبط ويطلع من المود.. ولحدي ما يرجع تاني يكون داير ليهو ربع ساعة.. يرجع يرسم تاني يجي جارهم ماشي ويشوفو قاعد يرسم وينهرو وينهزرو (يا ولد قوم.. قامت قيامتك.. قوم أدخل جوا قوم).. يخلي الشافع طينو في محلو ويدخل يلبد ورا الباب لحدي ما يختفي راجل الجيران ويطلع تاني ويقعد يرسم تاني ، تجي حبوبتو ام ابوهو مارقة من جوا.. وتقلاهو قاعد في الواطا وشغال بالطين تقعد تويببب (الليلة وب علي.. قاعد في الشارع في الواطا؟ وفي الشمش (يكون قاعد في الضل).. يا عفاف.. يا عفاف.. تعالي لمي وليدك دا).. وتنقنق (نان انتي فايقة لوليداتك من النضم الفي الموبايل؟.. دا قاعد في الشمش والبنية الصغيرونة تصرخ نجر نجر نجر من صباح الرحمن وانتي يا عفاف شايلة الموبايل وتنضمي.. غايتو عبد الرعوف ولدي وقع وما سما.. يحنن، يحنن وحات الله.. قلت لو قلت لو.. نان هو بيسمع نضمي؟.. أها اليخم و يصر).. وتنهز الولد من اباطو وتجرو وهو مدلدل لحدي ما تدخلو جوا.. وترزعو في اقرب عنقريب.. وتمرق وهي برضو تنقنق.. الشافع يخلي حبوبتو تمشي شوية يرجع لي شغل الطين حقو.. ويبدا من أول وجديد.. ويجي سيد الدكان وينهر الشافع.. ويقومو ويدق الباب ويكورك لأمو(ياناس البيت.. مافي زول؟.. ولدكم دا دخلوهو جوا.. ومليان طين. أبوهو مافي؟.. عليك الله قولي لأبوهو مالو المرة دي طول ما دفع القروش؟.. الليلة يوم عشرين في الشهر الجديد).. كلنا كنا أطفال ومعظمنا كانت تبدو عليه ملامح إبداع في مجال أو آخر.. ولكن تكالب عليه المجتمع.. واجهض كل ما بداخله من إبداع.. وما زال!! الباب البجيب الريح- صحيفة اليوم التالي
