بطلتنا تموت في الحكا حباً.. كبقية افراد شعبنا البطل.. اكتر شعوب الارض محاكاة.. لا فرق بين ذكر وانثى.. وشافع وزول كبير.. في هواية المحاكاة والتقليد.. .. نشوف زول سوا شي لازمن نسوي زيو.. وتلقى الواحد فينا قلقان يسهر الليالي.. ويسعى سعيا حثيث.. عشان يحاكي الزول دا.. بطلتنا.. حاكاية من الطراز الممتاز.. والنخب الأول.. إن قعدت جنب مرا في المستشفى ومستنيات الدكتور وهي ضرسها وارم وقايم عليها شافت المرا خلفت كراعها.. تنسى الضرس تخلف كراعا زيها.. "يعني احسن مني بشنو؟ تخلف كراعا؟".. ولو شافت واحدة اشترت توب جديد.. تقعد تزّن وتنبح في الراجل "دايرة لي توب تركوازي وفيهو شخوت شخوت.. ما غالي وحات الله باتين مليون بس وبالأقساط".. متأزمة جدا من النسوان العندهن شغالات وهي ما عندها.. أي مناسبة تمشي تلقى المرا جاية ووراها شغالة شايلة ليها شنطة هدوم الشفع.. أو يقعدن ربات الشغالات يتونسن "حلاااااااتا، شغالتك الجديدة ديك غيرتيها؟".. ترد عليها صاحبة الشغالة وهي تنزل التوب من رقبتها عشان يبين كل الكشكوش الفي الرقبة.. "بري يا يمه.. ديك غيرتها.. وحاااات الله غيرتها.. ديك يا يمه قاعدة في المتبخ النهار كلو.. تاكل تاكل تاكل.. في اليوم تلاتة اكياس عيش تاكلن.. و بعدين يا هناية، من الله خلقني ما شفت زول ياكل محشي اللسود لقمة واحدة؟.. تحشر اللسوداية كلها في خشمها.. أفة أفة.. أفة.. اضانك طرشا.. مرقتها جبت دي طيبة وظريفة.. ونضيييييفة.. أن زنقتها عطسة ساكت.. ما بتعطس قدامنا.. انتي قايلاها بتعطس قدامنا؟.. بري.. تمرق الشارع تعطس وتجي داخلة".. كل هذا المدح والثناء.. للشغالة وبطلتنا قاعدة وقد أضمرت نبيح في راجلها أن يجيب ليها شغالة.. وتقعد تتبوبر بها قدام النسوان.. وتتونس معاهن بدل ما النسوان يتونسن وهي كاضمة.. تعاين لهن.. فأخذت تطارده بالحاح لمدة ستة شهور.. أن يجيب شغالة.. وكان يتزاوغ.. ويتعضر بقلة القروش وما بيقدر.. والبيت ما محتاج لشغالة.. هي براها قادرة عليهو.. لكن برضها كانت مصرة اصرار شديد.. وملّحة الحاح بالحاح أخيرا رضخ لطلبه .. بعد شهر من قدوم الشغالة.. تفرغت.. ومشت ناس أمها أخدت ليها يومين ورا بعض.. جات.. لقت الشغالة متشنقلة وراقدة فوق العنقريب وسماعات الموبايل في اضنيها وشبه مغمضة تبين على ملامح وجهها الرومانسية .. قالت لها"عليكي الله ناولني موية". لم ترد الشغالة.. عاينت ليها وسالتها "أمير وين؟".. ردت الشغالة بعد أن قلعت السماعات من اضانا وتنهدت تنهيدة ومعاها تسبيل عيون "أمير هبيبي.؟.. أمير هبيبي في شغل".. انفلعت وقالت لها "حباكي بلا يخمك" ردت الشغالة بهدوء وبابتسامة "يخمنا اللتنين" ثم ناولتها قسيمة الزواج مروّسة بماسورة عشرين بوصة!! الباب البجيب الريح- صحيفة اليوم التالي