الاتحاد العام ..الشغال لينا بفقه (الحنوط) عندما يصرح اداري من مجلس الهلال وينتقد الاتحاد العام ...يتحدث مجدي شمس الدين عن (القواعد العامة). بتكلموا عن (القواعد العامة). مجدي بتحدث عن (القواعد العامة). مجدي مين؟. مجدي (القواعد العامة). يعجبك حديثهم عن (القواعد العامة) التى لا وجود لها إلا عندما يكون هناك تجميد نشاط اداري او مدرب هاجم الاتحاد من الهلال. قواعدهم العامة ..مثل لائحة اسعار الحلاقة التى يضعها الحلاق على جدار الصالون ولا يعمل بها. ولا يشتغل بيها الشغلة. بلوا (قواعدكم العامة) دي في موية (سعف) ، او موية (سخنة) ..واشربوها عليكم الله الصباح مع (الريق). قواعد عامة بتاعت ايه؟. هو لو عندكم (قواعد عامة) نوع البحصل دا ..بيحصل. قال قواعد عامة قال. قواعدكم العامة دي (حصين) ما بتقبل بيها. اين كانت هذه القواعد عندما كان الامين العام لمجلس المريخ الفريق طارق بمسح بالاتحاد الارض. اكيد مجدي شمس الدين بستمع لتصريحات الفريق طارق على انها اغنية من اغنيات الفنان محمد وردي. فاكرها حاجة كويسة. اين هذه القواعد؟..ومتوكل أحمد علي (بنتف) سلك الكهربة من عربة التلفزة ..من (عرقوبو). ولا في زول قال ليه حاجة. ولا حولوا مباراة المريخ الي ملعب اخر. ناس مجدي شمس الدين ديل ما قدروا يقولوا اي حاجة. كأنهم كانوا بيشاهدوا في (فيلم هندي) كل الذي يستطيعوا ان يفعلوه ..هو ان (يمدغوا) المزيد من الترمس والفول السوداني. دا كلو البقدروا عليه. اين كانت (تنوم) قواعدكم تلك يا مجدي؟ ..وهي اضعف من ان تنظم حركة سير عربة كارو. انها (قواعد) اهون حتى من ضبط مركز الرسائل. قوموا روحوا. انتوا فاكرين عندكم (اتحاد). انتوا قاعدين تصدقوا نفسكم يا مجدي. قوم لف. اتحاد شنو؟..(حليل شداد). هسع ناس اسامة عطا المنان بظهروا في (الاكاديمية) في الشهر مرة. بل بظهروا من رمضان لي رمضان. قواعدكم العامة دي بتقول ليكم حاربوا الهلال .. بتقول ليكم اوقفوه بكل السبل وكل الطرق. اين كانت هذه القواعد عندما حرمتوا المنتخب السوداني من ثلاث نقاط امام زامبيا بسبب مشاركة سيف الدين مساوي الموقوف. قواعدكم دي ما درسوكم فيها ان اللاعب الموقوف لا يحق له المشاركة. قواعدكم العامة دي ..قالت ليكم ....الهلال الفريق الوحيد الذي يمثل السودان تعاملوا معه بهذه الطريقة (المقرفة). ديل ما فاضل ليهم إلّا يشيلوا ليهم (مدفع) على الهلال. انت يا مجدي شمس الدين نزّلت (ام دوم) الدرجة الثالثة ...كمان عاوز تنزل الهلال من الممتاز. قواعدكم العامة ..انتوا بتعرفوا ليها شنو؟...عشان تجوا تطبقوها فقط في الهلال. بلا قواعد عامة ..بلا (بامية مفروكة) معاكم. انتوا (قاعدة) واحدة كتيرة عليكم ..مع الفوضى البتعملوا فيها دي. قدر ما نقول نسكت ..وما نقول حاجة ..ونركز في الكورة. تجوا تلخبطوا لينا الحاجات. انتوا يا جماعة جايبنكم من وين؟. لو مشيتوا شفتوا ليكم (سمسم) زرعتوه احسن من البتعملوا فيه دا. لو زرعتوا (بصل) ما ح تفيدوا السودان بي (بصلة) واحدة ..لكن ح تكونوا قدمتوا خدمة كبيرة للكورة السودانية وذلك بابتعادكم عنها. ابعدوا...(هذا كل ما يمكن ان تقدموه للكورة السودانية). لو عاوزين تعملوا خير في الكورة السودانية ..شوفوا ليكم (دكان ود البصير) واقعدوا فيه. قال قواعد عامة قال. انت القواعد العامة بتعرف ليها شنو يا مجدي؟. انت فاكر القواعد العامة دي ..(بدلة فل فوت). فاكرها (كارفيتة)..وشوية كلام كدا. قايلها شنو؟. لو سألوك منها (القواعد العامة) دي شنو؟. ح تقول شنو؟. شنو كل ما تكون عاوز تعاقب ليكم زول من الهلال تقولوا (القواعد العامة). لو دي (قواعدكم)..احسن من هسع تشوفوا ليكم (بالة قطن)..برضو تبلوها وتشربوا مويتها. الاتحاد العام عبر (حكامه) حرم الهلال من (3) اهداف في مباراة الفريق امام الاهلي شندي. وبتكلموا عن (القواعد العامة). حرموه عن (3) اهداف. وزادوا على ذلك بان جعلوا الهلال يلعب في الكاملين. نلعب في الكاملين ليه؟. وبالعصر كمان. ونحن عندنا (مجموعات). اذا اعتبرنا ان هذا الشيء عقوبة منطقية لما حدث في مباراة الهلال والاهلي شندي ..من قبل احد (المشجعين). اذا سلمنا بالعقوبة. لو قبلنا بالكلام الفارغ دا. وقلنا دي (قواعد عامة). ما هي عقوبة حكام المباراة والذين حرموا الهلال من ثلاثة اهداف وجعلوه يخرج خاسرا للمباراة ...محروما من ثلاث نقاط كان احق بها. من يعاقب اولئك الحكام الذين تسببوا في ان يخسر الهلال رقمه العالمي الذي حافظ عليه ..وابقاه في اصعب الظروف. تعاقبوا (مشجع)....وتتركوا (الحكم) بعد كل هذه الفضائح. حكام مباراة الهلال والاهلي شندي ..منعوا الهلال من رقم عالمي كان يذهب فيه الهلال بعيدا. اولئك الذين تسببوا في هذا الامر ..من الذي يعاقبهم ..ومن هو الذي يحاسبهم؟. قواعدكم العامة ما فيها حاجة بالشكل دا. قواعد عامة زي (شوربة الكوارع) ما فيها اي قاعدة. بس قالوا ليكم اركبوا ..ركبتوا. ماشين على وين؟. ما عارفين. عاوزين تعملوا شنو؟. ما عارفين. حاسبوا الهلال (الضحية)..ثم خرج مجدي شمس الدين الذي يجيد دور القيام بدور (الجلاد) ليقول انهم جمدوا نشاط نائب رئيس نادي الهلال لأنه هاجم اعضاء الاتحاد العام المهمون بوكالاتهم الخاصة ...والباحثين عن (نثريات) الاتحاد الافريقي في سفرياتهم الخارجية. شاطر يا مجدي. ممتاز يا مجدي. ح تأخذ جائزة عالمية يا مجدي. فريق يحرموه من (3) اهداف ..ويلعبوه في (الكاملين). طيب لو كان حرمتوه من هدف واحد ..كان عملتوا شنو؟. اكيد كانوا ح يخلي الهلال يلعب في حلفا القديمة. انتوا يا جماعة ما سودانيين. انتوا الهلال البمثلكم في المجموعات دي هلال القدس. فالحين لي كل مرة ..تجيبوا لي مسؤول يزور معسكر الهلال ويتصور مع الفريق ..وبكرة الجرايد تطلع تتكلم عن الموضوع. تاني ما عاوزين اي مسؤول. ما تسجلوا للهلال اي زيارة. تبرعاتكم دي ما عاوزنها. امشوا خلوا المريخ ينفعكم. امشوا سجلوا زيارة للنيل الحصاحيصا. ما تجونا. ما تصوروا معانا. ما تتبرعوا لينا. وقت انتوا بتعملوا في الهلال كل هذه الاشياء. جايبين ليكم اتحاد كورة ...(علبة ساردين) لا يصلح ان يديرها. اتحاد مسكوه ليك في عصاية (القواعد العامة)..ومسك ليك في الموضوع. وهم ما فاهمين اي حاجة في (القواعد العامة). ما عارفين اي شيء. يجب ان يضع الهلال حدا لهذا (الاتحاد) المهزلة ..اذا لم يستطع المجلس ان يحسم مثل هذه (الخرمجة)..فان امثال مجدي شمس الدين سوف يصبحوا الف مجدي شمس الدين. اسامة عطا المنان ..لو لقى الهلال في النار بزيدوا (حطب). ديل تلاعبوا في القواعد العامة ..وعملوا كل شيء من اجل المريخ. حتى هيثم مصطفى لعب اسامة عطا المنان دور كبير في ان يتحول من الهلال الي المريخ. وفعلوا نفس الشيء عندما جعلوا هيثم طمبل يلعب في المريخ. بل حتى منتصر فرج الله ..كي لا يلعب في الهلال ...اجبروه على اللعب في النيل الحصاحيصا. الاتحاد العام بصورته تلك ..لن يمضى الهلال الي الامام ..حتى البطولة الخارجية سوف يتراجع فيها الهلال في ظل هذا الاستهداف الواضح. احسموا هذا (العبث). احسموا هذا الاتحاد. فقد بلغ السيل الزبي. ملحوظة : يا مجدي شمس الدين قواعدكم العامة دي ما فيها (باسطة). هوامش الامين العام للمريخ اظنه الفريق طارق قال انهم لن يقبلوا ان يكونوا جزءا من موازنات اللجنة المنظمة. الزول دا مالو؟. الزول دا مع شنو؟. وبقول في ايه؟. يا زول شوف (تمهيدك) وين؟. انت وقت ما بتقبل تكون جزء من موازنات اللجنة المنظمة بتدخل ليها ..وتصرح. انت كدا اصبحت (الكل) وليس جزء. قوم روح. كمان نحن ناقصين ..زول ما بظهر إلا وقت يكون عاوز يهاجم الهلال. انت عبدالصمد ما غلطان عليكم. الحمدلله ظهر ليك حس. نحن كنا افتكرناه استقال مع ناس عصام الحاج. انت يا الفريق طارق الي الان شغال. كنت قاعد وين؟. اي نتيجة سلبية للهلال اليوم لا قدر الله يتحملها مجدي شمس الدين. يا ربي الحكم سوف ينقد كم هدف للهلال اليوم. اوعكم تدونا (ضربة جزاء). حركاتكم البتعملوها للمريخ ..ما تعملوها للهلال. يا ناس الهلال لو (الحكم) منحكم ضربة جزاء شوتوها برة المرمى. ما عاوزين معاكم اي (كسير تلج). الاتحاد العام والذي يدعي احترامه للقواعد العامة ..جعل مباراة الهلال اليوم امام الامل عطبرة في الكاملين في الوقت الذي تنظر فيه لجنة الاستئنافات استئناف الهلال. بربكم هل هنالك عدل في هذا. اذا قبلت لجنة الاستئنافات استئناف الهلال ..كيف سيتصرف الاتحاد العام؟. هل سوف يتم تأجيل المباراة؟. ام ان هذا هو اجبار رسمي للجنة الاستئنافات لرفض الاستئناف؟. ننصح مجدي شمس الدين ان يراجع (القواعد العامة) وينظر الي هذا الخلل تحاشيا لهذا (العك). الانسحاب كان افضل من تلك (الهرجلة). .... عاجل : مجدي شمس الدين عندو مشكلة واضحة في (القواعد العامة)..الظاهر عليه شغال ب (القواعد العامة) حقت (سبق الخيل). وإن طال السفر - محمد عبد الماجد صحيفة قوون
