يا ريس شوف لينا محترف مع (اطلاق الحريات) دي قعدنا نتلخبط في بعض. يا ربي نحن غلطانين. يمكن دا الشارع التاني ..في تشابه شوارع. وإلّا الشاي كان تقيل حبتين؟. من حقنا نسأل. بن سبورت دي قلبت النيلين؟. انتوا لفيتوا (الطبق) على وين يا الاعيسر ..جبتوا لينا مباراة من المجموعات. هو نحن ناقصين. المجموعات دي نحن والله هسع لا جاهزين ليها ولا حاجة. ولا بنكضب عليكم. ما تشبكونا (زيارات) ساكت. المباراة دي شكلها ..مجموعات مجموعات. ما عارف الهلال كان ما كويس ..وإلّا الخرطوم الوطني كان جيد. وإلّا كمان دي حاجة تانية. ما عاوز اتكلم ليكم عن الحاجة التانية. المهم طلعنا بالنقاط الثلاثة. بقينا نفكر تفكير تجاري ..(وقت نشيل نقاطنا الفرحة تكتلنا). انتوا استاد الخرطوم دا بقى (نقعة). مالوا قاعد (يتناقع) فينا كدا. كمان جايبن لينا (النقعة) في الخرطوم. هو نحن ناقصين يا عالم. مرات الزول بتلخبط في نفسو ..خاصة لو لبست ليك قميص ما قميصك. تقوم تفكر في نفسك ..يا ربي دا انا وإلّا ما انا؟. لو دا انا القميص دا مالو كبير كدا. تتلخبط في روحك. موش مرات بتلبس (قميص) اخوك ..تقوم تطلع من البيت على انك (اخوك). واخوك يكون نايم جوة. يقوم يلاقيك زول في الشارع يقول ليك وين انت؟. تقول ليه دا ما انا. يقول ليك خلاص عليك الله لمن انت تبقى انت..ابقى اظهر. الناس ديل يلخبطونا في نفسنا. هو قصدو لما ترّجع (القميص) لي صاحبو ..ابقى اظهر علينا. هسع في مباراة الامس ..نحن الهلالاب قربنا ما نكون الهلالاب. زي كأننا نحن ناس تانية. او هلالاب اخرين. غايتو ديل ما نحن. يمكن يكون ديل (هلالاب) اخر. هلال كادوقلي. هلال الفاشر. هلال شندي ذاتو. معقولة ..مسكتنا ليكم (شفقة)..المباراة كلها واقفين ..يالله تعادل ..يا الله تعادل. وممكن ناس الخرطوم الوطني يخطفوا هدف في اي لحظة. اي كورة كانت بتشكل (خطورة) على الهلال. مباراة الهلال امس امام الخرطوم الوطني كانت نسخة طبق الاصل عن مباراة برشلونة الاخيرة. برشلونة كانت خسرانة بي هدف. برشلونة حتى الدقيقة (60) كانت خسرانة ..عادلت ..وانتصرت بعد الدقيقة (70). برشلونة دخلت في تجربة قاسية في اخر مباراة. ونحن ذاتو دخلنا في تجربة صعبة. الشوط الاول كان الهلال يستحق (الخسارة)..الاداء لم يكن جيدا ..واخطاء التمرير وصلت الى (84) كورة مقطوعة. بربكم هل يعقل ان يخطيء لاعبي الهلال في (84) تمريرة. اذا اراد الهلال ان ينتصر وان يتأهل في مرحلة المجموعات عليه ان يتخلص من هذه الاخطاء. نسبة الكور المقطوعة الكثيرة في مباريات الهلال اضحت ظاهرة واضحة في كل مباريات الهلال. بل ان كل الاهداف التى تستقبلها شباك الهلال تأتي من كور مقطوعة. واظن ان افضل دليل على ذلك الكورة المقطوعة من (اتير توماس) والتى جاء منها هدف الخرطوم الوطني. واهداف الاهلي شندي كانت ايضا من كور مقطوعة. وكل الاهداف التى تسجل في الهلال تأتي من اخطاء وكور مقطوعة من لاعبي الهلال. لا يعقل ان يكرر لاعبو الهلال هذه الاخطاء في كل المباريات. اذا استمرت هذه الاخطاء من لاعبي الهلال في مرحلة المجموعات ، بهذا المعدل فان الهلال لن يحقق نقطة واحدة. لذلك يجب ان يجتهد مدرب الهلال في تصحيح مثل هذه الاخطاء ..كما يجب ان يكون الحذر والحرص اكبر من لاعبي الهلال. يجب ان تكون هناك (محاسبات) لمثل هذه الاخطاء ...فكل كور خليفة امس كانت مقطوعة. وكذلك عمر بخيت ونزار حامد في شوط اللعب الاول. بل اننا في كثير من اجزاء المباراة كنا نشعر ان لاعبي الهلال اضحوا جزء من فريق الخرطوم الوطني فهم يتبادلون معهم (الكور) كأنهم بينهم معاهدة تبادل كور. فريق الخرطوم الوطني لم يكن لاعبيه يقع في مثل هذه الاخطاء التى يقع فيها لاعبي الهلال. اذا لم تنته مثل هذه الاخطاء فان الهلال موعود بان يفقد الكثير ..ليس في المجموعات وحدها ..وانما في الدوري الممتاز ايضا. مع هذا لا نغفل للاعبي الهلال الجهد الكبير الذي كان منهم في الشوط التاني. فقد تحرك لاعبو الهلال بجدية وكانت رغبتهم للتسجيل والانتصار على الخرطوم الوطني كبيرا. وكان التركيز والهدوء اكبر رغم الخسارة. تحرك نزار حامد في الشوط الثاني بفعالية واستطاع ان يغطي فراغات الوسط. وارتفع عمر بخيت لمستوى المباراة بعد ان كان مستوى عمر بخيت في الشوط الاول ضعيفا. كذلك (هندّس) سيدي بيه المباراة ..وجعل تمريرات الهلال اكثر فعالية. مالك ايضا كان من نجوم المباراة. محمد احمد بشه بفكره المختلف ..رؤيته الجيدة صنع الهدفين. لكن دعونا نقول هجوم الهلال واضح انه يفتقد لحساسية الشباك ..فقد اصبح تسجيل الاهداف لصالح الهلال امر في غاية الصعوبة. ونحسب لولا مشاركة صلاح الجزولي القناص لخرج الهلال بنقطة واحدة من هذه المباراة. المسؤولية الكبرى تقع على نصرالدين النابي والذي كان (صراخه) طوال المباراة يوضح توتره الذي نقله للاعبي الهلال وللمشاهدين للمباراة والحاضرين لها داخل الاستاد. اخطاء نصرالدين النابي الواضحة ..والتى لا تحتاج حتى الى خبرة او متابعة لتعرفها تتمثل في انه ابعد اكثر من لاعب جيد من تشكيلة الهلال. النابي ظل يلعب بتشكيلة واحدة ..ولم يشرك لاعبا جديدا في تشكيلة الهلال إلّا مجبورا. مثلا اشرك مدافع الهلال (مالك) بعد اصابة اتير توماس ...وعندما يشرك المدرب لاعبا مجبورا فانه بذلك يفقده الثقة. جاء النابي واشرك ايضا سامي عبدالله بعد توقف مساوي ..وكان بسبب ابتعاد سامي عبدالله من المشاركة ان تعرض للاصابة. لو كان النابي يشرك سامي لبعض دقائق في مباريات الهلال السابقة لاكتسب اللاعب حساسية المباريات ولما تعرض لشد عضلى بعد اول (3) دقائق من عمر المباراة ليفقد الهلال (غيار) كان يحتاج له في مباراة خسرها في الشوط الاول. ابعاد النابي ايضا لمهاجم الهلال صلاح الجزولي كان خطأ كبير منه ..كان يجب ان يشركه في مباريات الهلال الماضية من اجل إلا يتسرب الاحباط لصلاح الجزولي كما ظهر منه بعد ان سجل هدف الهلال الثاني. واضح ان اللاعب كان (محبطا)..وهذا الاحباط سربه المدرب لمهاجم لاختلاف حوله. صلاح الجزولي كسب الرهان امس عندما سجل من اول لمسة رغم من انه كان مبعد من المشاركة لمدة (4) شهور. المؤسف ان مشاركة صلاح الجزولي نفسها جاءت بعد ان اصيب بكري المدينة. اي لولا اصابة بكري المدينة ..لكان صلاح الجزولي حتى وقتنا هذا يجلس في (الكنبة). ايضا اشرك النابي (خليفة) بعد الاصابة التى تعرض لها اللاعب عبداللطيف بويا. المدرب الذي يشرك لاعبا بسبب اصابة لاعب او غيابه بسبب الايقاف هو مدرب لا يمتلك (جرأة) ان يضع لاعب اساسي في الاحتياطي ويشرك بديله. هذا خلل في المدرب. مطلوب من نصرالدين النابي ان يتعامل مع اللاعبين بمرونة ..وعليه ان يجهّز اكبر قدر من اللاعبين ..والجهازية تأتي عبر المشاركة في المباريات. لقد افتقد الهلال وليد علاءالدين والذي كان يمكن ان يكون له (بصمة) واضحة في وسط الهلال لو اتاح له المدرب فرصا للمشاركة. كذلك اقصاء وارغو بهذه الصورة يفقدنا لاعبا له خبرات عريضة في المنافسات الافريقية ويتملك القدرة الكبيرة على الحلول الفردية. مدافع الهلال ديفيد سبمو ايضا مدافع جيد ..لم يشاهده الجمهور ..رغم ان كل الذين شاهدوا اللاعب في التمارين والمباريات التجريبية اكدوا موهبة هذا اللاعب وعقليته الكبيرة. ولعلي اعتبر بشهادة الزملاء خالد عزالدين وحسن فاروق اصحاب القدرة الكبيرة في تقدير امكانيات اللاعبين ومواهبهم. نسأل ايضا عن محمد عبدالرحمن والذي كان نجما كبيرا مع صلاح محمد آدم ليأتي ويغيب اللاعب من الظهور مع نصرالدين النابي. ايضا غاب من تشكيلة الهلال الاعب الكبير المعز محجوب ..وهو بامكانياته اولا ومن اجل الحفاظ على روحه المعنوية وجاهزيته البدنية ثانيا يجب ان تتاح له فرص للمشاركة ..ولو في اجزاء قليلة من زمن المباراة. لا سيما وان خبرة المعز محجوب تؤهله لذلك ..كما ان اللاعب ظل يقوم بادوار عظيمة وكبيرة وهو في كنبة الاحتياطي. ايضا نسأل عن مهند الطاهر ..الذي لا نستبعد ان اصاباته الكثيرة سببها افتقاده لحساسية المباريات ..مما عرضه ذلك لتلك الاصابات الكثيرة. لقد قدم فريق الخرطوم الوطني امس مباراة كبيرة امام الهلال وكان الخرطوم الوطني قريبا من الانتصار او الخروج على الاقل بنقطة من مباراة الامس. مما يجعلنا ندق ناقوس الخطر على الهلال في مرحلة المجموعات. علما ان فريق الخرطوم الوطني ظل في كل مبارياته مع الهلال يتقدم بالهدف الاول ثم يأتي الهلال وينتصر بهدفين مقابل هدف. في الموسم الماضي تعادل الهلال والخرطوم الوطني في مباراة الذهاب في الممتاز. ثم جاء فريق الخرطوم الوطني وتقدم على الهلال بهدف صلاح الجزولي ثم عادل الهلال وانتصر في الاياب. قبل ذلك نذكر المباراة الشهيرة بين الهلال والخرطوم الوطني عندما تقدم الاخير على الهلال عن طريق الكورة المرجوعة من ريتشارد لحارس الهلال ليقطعها مهاجم الخرطوم ويسجل هدفا في الهلال. الهلال عادل النتيجة ثم انتصر. اذن كل مباريات الهلال امام الخرطوم الوطني محفوفة بالمخاطر ..ويغلب عليها ذلك السيناريو. ملحوظة : مع كل هذا فقد استمتعنا بالمباراة رغم من انها كتمت الانفاس. هوامش فريق الاهلي شندي فقد صدارته سريعا في عطبرة امام امل الحديد والنار. وكما جرد الامل فريق الاهلي من صدارته فان الامل قادر على ان يجرد المريخ اذا ذهب اليه وهو متصدرا. اليوم يمكن هلال كادوقلي يكون عندو كلام. اندية الممتاز بقت ما ساهلة. وما بتسأل في القمة. النيل الحصاحيصا ..جاء وخسر سريعا امام النسور في الحصاحيصا بعد المباراة الكبيرة التى قدمها امام المريخ. شيلسي طلع تعادل ثمين امام اتلتيكو مدريد في مدريد. والكورة الصعبة الليلة ..الريال وبارين ميونخ. النهائي ربما يكون الريال وشيلسي. وهذا اقرب الي ان يحدث. صلاح الجزولي اثبت انه مهاجم قناص ..سجل من اول لمسة. كيف كان سوف يكون حال صلاح الجزولي لو انه كان يشارك بصورة مستمرة. اصابة سامي عبدالله مسؤول منها نصرالدين النابي. لو كان يشركه لما تعرض اللاعب لشد عضلي. نخشى كل كنبة الهلال من الشد العضلي. فريق الخرطوم الوطني امس عندما كان متقدما على الهلال عملوا بصورة مستفزة على اضاعة الزمن. حارس الخرطوم الوطني اضاع لوحده خمس دقائق ..ولم يقم الحكم بتوجيه تحذير له. جمعة جينارو في اول ثانية بعد تقدم الهلال ..قام الحكم بمنحه بطاقة صفراء. الحكم تعامل بمرونة غريبة مع لاعبي الخرطوم وهم يهدرون في وقت المباراة وفريقهم متقدم. لمن فهموا حاجة. ناس الخرطوم الوطني ..والحكم نفسه. .... عاجل : غايتو (3) نقاط قربت تروح مننا شمار في مرقة. وإن طال السفر - محمد عبد الماجد صحيفة قوون
