في مهابشتي في النت والكتب والكواسة.. متوكد أني يوم ح اقع لي فوق كُبة.. تركبني القصبة.. ومن ثمّ الظلط.. ومن ثم أقرب صينية.. واقعد أمرر في العربيات.. وانزل من الصينية.. واتوجه إلى الكوّش.. ثم إلى مقابر أحمد شرفي.. لقيت زول عندو دكتوراة في الهندسة.. وفي الهندسة في سلاح الإشارة.. وفي سلاح الإشارة في الرادار.. وفي الرادار.. في استنباط الإشارات الرادارية الصحيحة من أوساط الشوشرة الصناعية والطبيعية.. أها عاينو الزول دا الدكتوراة اللتو في شنو؟.. في الصنيّت.. يلبد ويقعد يصنّت.. أها أنا ماعندي شغلة بي صنيّتو.. بي عافيتو، اليصنت زي ما داير.. الزول دا قال أسامي الفراعنة كلها من القرآن.. (ناس توت عنخ آمون، وأمنحتب وحتشبسوت...إلخ).. والخواجات غشونا وكضبو علينا وقعطوا أسامي من ريسينهم وقالوها لينا.. وهو وضع نظرية اسمها نظرية أسامة السعداوي للهيروغلوفية.. د. أسامة قال: لا في لغة هيروغلوفية ولا يحزنون.. اللغة المصرية يا ها ذااااااتا من زمن الفراعنة لي حسي.. وعلماء المصريات الأجانب ديل عاوزين يضيعونا ساكت.. وقال للمصريين: يلا بينا نفضح المؤامرة ونرجع لمصر البسمة التي انتزعت منها.. ونبدأ ببعض أسماء الفراعنة.. أول حاجة الملك (مينا) من الأسرة الأولى.. قال أصلاً اسمو (أمين).. من العبارة (إني لكم رسول أمين).. الملك (ذكرى) من الأسرة التانية.. والسموهو علماء الآثار(نفركا) فاسمه ذكرى من العبارة (فاذكر ربك كثيراً).. أما أحد ملوك الأسرة التالتة وهو الملك (نتر خت) وترجمتها(كرش الله).. فإن الملك اختار اسمه من العبارة (وكان الله شاكراً عليماً).. وسمى نفسو شاكر.. والملك (سنفرو).. قال اسمو أصلاً نظير.. وهو من الجملة (قل سيروا في الأرض فانظروا).. والملك (مري رع) اسمو الحقيقي (مرسي).. اختار اسمو من العبارة (إنا كنا مرسلين).. والملك (سمن كا) اسمو مسلم.. واختار اسمو من (ربنا واجعلنا مسلمين لك).. أما الملك الأشهر (خوفو) قال أصلاً اسمو خيري.. ومرة يقول اسمو غنيم لأنو خنوم أو خنم.. إشارة إلى علامة الخروف.. ومنها اشتق اسم قطيع الخرفان(غنم).. وقال نضم كتير في النهاية.. قال لينا أصلاً خوفو اسمو محسن.. ولأنو الملك محسن دا كان ذكي ذكاء شديد.. فاختار اسمو من الآية (من آمن بالله واليوم الآخر وعمل صالحاً فلهم أجرهم عند ربهم ولا خوف عليهم ولا هم يحزنون).. أها خوفٌ دي ياها الجا منها اسم خوفو.. عِلا والله ما شايفو جا على ناسانا ( تهراقا وبعانخي.. الكنداكة) لكن بطريقتو دي ح يوصلنا ويصوطنا برضو.. أنا ما عارف الناس ديل بيدخلو القرآن في أي حاجة ليه؟.. وبعدين القرآن دا نزل متين.. وناس خوفو ديل كانوا متين؟.. وبعدين بيقول اللغة المصرية القديمة ياها ذاااااتا اللغة الحسعتية دي.. أصلو ما سمع نوبة مصر بتكلموا كيف؟.. وربنا ما هداهو أصلو يربط بين لغتهم ولغة الفراعنة الزماااااان ديك؟.. غايتو نضم الزول دا ياها الاندراوة بت أمها وأبوها..!! الباب البجيب الريح- صحيفة اليوم التالي
