الحكم السموأل محمد الفاتح إلى الان شغال ب (التقريشة) بشه وصل القمر ..وديل لسع حايمين لي في شارع واحد قالوا ليك علاء الدين يوسف سألوه قالوا ليه أغنيتك المفضلة شنو؟ قال ليهم أغنية الفنان الراحل سيد خليفة : (جاري وأنا جارو) دورتكم دي (كشافة) واحدة كتيرة عليهاماتخسروا فيها كهربة،دوروها ب (رتينة) .عندنا زول مفتح ..عندو (نظرية) قاطعها من رأسو (ونضارة نظر) من النكسة العربية ما غيرها– بقول ليك الصينية من تلقى فيها صحن بيض ...أعرف طوالي انو الجماعة ديل تامين الحكاية موية. .دي نظرية (هندية) مرات بنشتغل بيها في الحالات الطارئة. .من الحكم الاغريقية القديمة جدًا ..(برضو مقطوعة من الرأس دا) – فتة العدس مقدمة طبيعية لإلغاء العشاء. .عشاء مافي. .العدس بنفخ يخليك بدون ما تشعر تمشي تفتح الباب وترجع تقفلو تاني. .حركة غير إرادية. .موش مرات بدون ما تشعر بتركب التلفون في الشاحن أول ما تدخل البيت ..(الحكاية تعويدة). .زي بكري المدينة ...علاء الدين يوسف جارى وراه ..لمن دخل منطقة الجزاء ولعب الكورة لي نزار حامد وجاءت قون ..والحكم صفر واحتسب الحكم ..والشوط الأول انتهى...والاستراحة انتهت وبدأ الشوط التاني ..والمباراة انتهت ..وعلاء الدين يوسف جاري. .علاء الدين يوسف علق. .أمس في ناس شافوا علاء الدين جاري في كبري المنشية ..(الزول دا فات بي عدلو). .قالوا ليك علاء الدين يوسف سألوه قالوا ليه أغنيتك المفضلة شنو؟. .قال ليهم أغنية الفنان الراحل سيد خليفة : (جاري وأنا جارو). .تجري بس. .نحن (شفوت) بنفهمها طايرة قلنا ليه تجري اكتر من كدا تمشي وين؟. .الموضوع السخن حصل في هدف بشه. .بشه جاب ليه هدف برندة وغرفتين معكوسات ...الحكم ما احتسب الهدف. .هدف (الكشافات) صفقت ليه. .باسكال (صنقع)..رفع رأسو لقى الكورة في القون ...الحكم ما استوعب (سرعة) بشه...احتسب الهدف (تسلل). .هدف زي دا ما بكون درسوه في القوانين المن زمن (التقريشة) لحارس المرمى. .قوانينكم دي أكيد من زمن (الغراب النبيه)...ومريم الشجاعة ..وكلب عبد الجليل. .ناس قديمة. .زمن البسكويت بشربوا بيه الشاي. .هسع البسكويت بعملوا بيه شنو؟. .السموأل دا حكم قديم شديد ..ما متابع التحديثات التى حصلت في قوانين كورة القدم. .الزول دا (تقريشة) باسكال لي إيهاب زغبير ما احتسبها مخالفة. .الحكم السموأل محمد الفاتح إلى الان شغال بالتقريشة. .التقريشة عندو عادي ...(في حكم أقدم من كدا). .نحن عشان تحسبوا لينا أهدافنا دي نعمل شنو؟. .نتصرف كيف؟. .عندنا ناس (سريعة) خالص ...يجيبوا في الأقوان ...والحكم ينقضها. .مرة نقضوا لينا أهداف بكري المدينة في الأهلي شندي. .هسع نقضوا لينا هدف بشه في المريخ. .يعني لو عاوزين الحكام ديل يستعدلوا إلا نسجل ناس عنكبة ومحمد موسى والصادق النور. .نموت بالتقلة. .الحكام في السودان بي صراحة إلى الان ما وصلوا مرحلة (بشه). .بشه وصل القمر ..وديل لسع حايمين لي في شارع واحد. .يا بشه تاني لو عاوز تجيب ليك (قون) عليك الله أول حاجة افتح ليك محضر ..أثبت فيه أنك ما متسلل. .وشهِّد ليك (13) زول على وجود (غاندي) النايم هناك. .وباسكال الما جايب خبر. .ولو كمان خليت ناس بله جابر يوقعوا ليك في دفتر الحضور ..يكون أحسن. .عشان الحكام ديل ..ما كلو مرة يحرمونا من هدف. .امسك باسكال من اضانو يا بشه قبل ما تجيب ليك هدف ...وخليه يشهد ليك قدام الحكم ..من ثم سجل. .ما في زول بسألك. .جايبين لي حكم (التقريشة) عندو ما فيها مخالفة. .بمناسبة هدف بشه دا ..عندنا زول دخل فيه (قلاب). .الزول دا غير الزول الكلمتكم عنو قبل كدا. .شلناه وجري على المستشفى. .الدكتور عاين ليه كدا ..قال لينا جيبوا لي صورة للرأس ..وكيلو باسطة. .قلنا ليه يا دكتور ..صورة الرأس عرفناها ...كيلو الباسطة عاوز بيه شنو؟. .الدكتور قال لينا ..أنا عندي كيلو الباسطة أهم من صورة الرأس. .مشينا لقينا المعمل قافل ..وكشك الباسطة فاتح. .جبنا الباسطة ..ودخلنا على الدكتور. .الدكتور وقت شافنا جنب الباسطة قال لينا (الصورة) ما مشكلة ..بس إن شاء الله باسطتكم دي بالسمنة. .هسع الحكم عاوز يعمل نفس الشيء...احتسب هدف نزار حامد ..ونقض هدف بشه. .طبعاً لو الحكم احتسب هدف بشه...صلاح الجزولي كان جاب هدف. .اصلو الأيامات دي الأهداف في الهلال بتسجل بالنوتة الموسيقية بشه – نزار حامد - صلاح الجزولي. .نزار حامد ضايق ..خرب (الرصة)..سجل أول أهداف الهلال في المباراة. .والنظام نحن عندنا يسجل في الأول (بشه). .عشان كدا بشه لمن سجل الهدف الثاني ..الحكم ما احتسب الهدف. .يحتسب الهدف كيف ؟..وإعلام المريخ بهاجم في الحكام ليه شهر. .من الهجوم عليه الحكم (التقريشة) ما عاوز يعتبرها لينا مخالفة غير مباشرة. .زول ما احتسب ليكم مخالفة (التقريشة) يحسب ليكم هدف بشه. .طبعاً حكم الراية الذي اعتبر (بشه) متسلل اسمه (شطة). .وشطة طلع فلفل أخضر ساكت. .انتوا راجيين ليكم عمار من شطة. .دي شطة (حمراء) يعني اقنعوا منها. .لو بتقنعوا. .الجميل والممتع والرائع جدًا. .أمس قرعة دورة حوض النيل ظهرت – (نحن الضحك شرطنا). .الناس عملوا ليهم قرعة المجموعات ..والفضائيات كلها نقلت (القرعة). .والجماعة قعدوا يحسبوا فيها ..وينظروا ..ويحللوا. .قرعة المجموعات كانت منقولة في القنوات مباشر. .قرعة مع منو؟. .قرعة مع أندية محترمة وكبيرة الترجي والصفاقسي والزمالك ومازيمبي ووفاق اسطيف. .قرعة ..قرعة. .ما زي قرعتكم بتاعة (البطيخ) دي. .أمس جاء في الأخبار القرعة دي : (سحب إتحاد شرق ووسط إفريقيا (سيكافا) اليوم قرعة بطولة دول حوض النيل في الثانية بملعب نيابو الكبير بنيروبي والتى يستضيفها السودان في الفترة من الثاني والعشرون من مايو الحالي إلى الرابع من يونيو المقبل في ثلاث مدن وهى: الخرطوموبورتسودان وشندي ويمثل السودان فيها كل من: المريخ والأهلي شندي ومريخ الفاشر وحى العرب على أن تكون هنالك مجموعتان في الخرطوم وأسفرت القرعة عن المجموعات الآتية ..المجموعة الأولى: بالخرطوم وتضم المريخ السوداني , فكتوريا الأوغندي, الملكية الجنوب سوداني والبوليس الزنزباري..المجموعة الثانية: تلعب مبارياتها بالعاصمة الخرطوم أيضاً وتضم كل من: مريخ الفاشر السوداني, ليوباردز الكيني , امبيا التنزاني وإلمان الصومالي. وضمت المجموعة الثالثة الأهلي شندي والدفاع الاثيوبي وبديكيليو والمصري البورسعيدي فيما ضمت المجموعة الرابعة حي العرب بورتسودان وبطل بورندي واتلينكس روندا). .ناس المريخ من بايرن ميونخ الذي لعبوا معه في مرحلة الإعداد ودفعوا له (12) مليار جنيه من أجل مباراة واحدة سوف يلعبوا أمام المان الصومالي. .شفتوا الدينا دي رضاية كيف؟. .المريخ ح يلعب مع ناس فكتوريا اليوغندي والملكية جوبا وحي العرب بورتسودان الذي يلعب في الدرجة الأولى في بورتسودان. .يعني الدوري الممتاز ذاتو ما بيلعب فيه. .المريخ من بايرن موينخ وزينت الروسي وريد بول النمساوي سوف يلعب امام البوليس الزنزباري وبديكيليو امبيا التنزاني. .يا جماعة في زول سمع بالأسماء دي. .دي (أندية) أم أبراج حمام؟. .عاوزين نعرف. .عاوزين نفهم. .دورة حوض النيل دا ..فيها كشافات. .سؤال (منطقي). .يقولوا ليكم الكلام ألف مرة. .الدورة دي في ملعب رئيسي أم أنها سوف تلعب في (حوش) ساكت. .الأندية الجايبنها لينا دي زي تلاجات الموز. .زي تلاجات البطاطس. .بعدين نحن ذاتو نقول شنو؟. .وقت الهلال يكون بيلعب في المجموعات ...انتوا ح تكونوا مع ناس المان الصومالي ديل. .لمن نسأل من ناس بله جابر ..يقولوا لينا في دورة حوض النيل. .وسعيد السعودي. .سعيد السعودي مالو؟. .سعيد السعودي دا ح يكون (كنبة) برضو أمام المان الصومالي. .ولاعب المان الصومالي دا ممكن يبدل قميصه مع تراوري. .دي هيثم مصطفى ما بقبلها ليكم. .ولا بجاملكم فيها. .معقولة هيثم مصطفى يلعب أمام المان الصومالي. .علاء الدين يوسف ذاتو ..مفروض ما يقبل بالحكاية دي. .المان شنو كمان؟. .معقولة من بايرن ميونخ الالماني إلى المان الصومالي. .حكم. .حارة دي عليكم. .والله بدل الدورة دي ..كان أحسن تعملوا ليكم (طابق) تالت. .لو نزلتوا ليكم قلاب طوب ..أفضل ليكم من دورة حوض النيل. .نحن مازيمبي ح يصل إلى السودان بطائرة خاصة. .انتوا ناس المان الصومالي ديل ح يصلوا بي شنو؟. .ديل رئيس دولتهم ذاتو بجي بالباصات. .بجي بالميناء البري. .يا رب هم بصلوا بي شنو؟. .خلاص ..نحن نخصص (برمجة) خاصة لهذه الدورة. .وح نوافيكم من خلال هذا العمود بالأخبار أول بي أول. .اصبروا انتوا بس ..وما تفتحوا لينا خشومكم كدا. .الغريق قدام ..موش بتلعبوا في دورة حوض النيل. .الله يستر الدورة دي ما تجيب لينا (تسمم). .أوعكم تجيبوها لينا في التلفزيون. .دي (104) كتيرة عليها. .خلونا نسمع أخبار نتائج مباراتها تاني يوم في الجرايد. .ناس اتلينكس رونداديل ..أوعكم تجيبوهم لينا في التلفزيون. .بالمطار ذاتو ما يدخلوا لينا البلد دي. .نحن عندنا مهمة كبيرة ..ومشوار عريض. .عندنا مازيمبي والزمالك ..ما تضرسونا بي فرقكم دي. .لو كان جبتوا ليكم فريق من (جياد)..كان أحسن ليكم من (التلتلة) البتعملوا فيها دي. .هسع ناس سلك بكرة يقولوا ليك المريخ يتألق أمام اتلينكس روندا. .ونحن الضحك يشرطنا. .وناس مزمل تاني ح ينسوا كلامهم البكتبوا فيه دا ..ويعملوا لينا دورة حوض النيل دي (بطولة). .دورتكم دي (كشافة) واحدة كتيرة عليها. .ما تخسروا فيها كهربة. .دوروها ب (رتينة). .أو فانوس كبير. .ملحوظة : هسع ديل ح ينزلوا في فندق ..ولاَّ ح ينزلوا في استراحة السكة حديد. هوامش .المهاجم البرازيلي نتوقع أن يحقق نجاحاً كبيراً مع الهلال. .طالما هو اختيار كامبوس ..يبقى ما في مشكلة. .اعطوه الفرصة ..وامنحوه الوقت ..ووفروا له المناخ الملائم. .التسجيلات تنطلق غدًا ..ونريد من الهلال أن يحسم صفقاته مبكرًا حتى يتمكنوا من تقديم شيء للهلال في مرحلة المجموعات. .الكنغو قالوا فيها قتل عديل كدا. .لذلك يفترض من الهلال أن يحسم مبارياته في الخرطوم. .نريد تسجيلات مدروسة ..وصحيحة ..وتنفع الهلال ..تسد احتياجاته. .لاعب هلال الفاشر محمد حسن نتمناه في الهلال. .ونتمنى فارس أيضاً في الهلال ..عشان يكون عندنا في اليمين سيسيه وفي الشمال فارس. .تاني البقيف قدام الهلال منو؟. .ونوصى كذلك بجوكر الأهلي شندي مجاهد. .الهلال يحتاج إلى إضافات قوية. .الأهلي المصري الان في مرحلة فقدان الوزن ..لأنه لم يكن يسجل ..حتى انهار الفريق فجأة. .لا نريد أن يصل الهلال لتلك المرحلة. .لا بد من إحداث إضافات مؤثرة في كل فترة تسجيلات. .يحفظ للأمين البرير أنه في كل فترة تسجيلات كان يضيف لاعب (درة). .نزار حامد كان إضافة حقيقية للهلال. .وسيسيه لو لم نخرج في التسجيلات الماضية بلاعب غيره ..لكفانا ذلك. .الكم ليس مهم. .المهم ضم لاعب مؤثر. .ضم لاعب جيد ...أفضل من ضم 10 نص مستوى. .مجلس الهلال يفترض أن يحسم أمور التسجيلات مبكراً ..حتى ينصرف كلياً نحو مباريات مرحلة المجموعات. .وليعطي الجهاز الفني بعض الوقت في ترميم الفريق. .كابتن المريخ أصبح بله جابر. .يا بله. .الحكاية دي ما صعبة عليك. .كابتن مرة واحدة. .طول ما المريخ بيلعب في دورة حوض النيل ..ما غريبة عليه يكون كابتنه بله جابر. .نحن مالنا. .خلاص يا جماعة نحن اتشفرنا. .آخر مباراة كانت لينا في طبقكم دا كانت مع المريخ. .بعد كدا دخلنا لينا مرحلة ..ما بتشوفونا ساكت. .إلّا تدفعوا. .بالكرت. .انتوا (الكرت) عندكم ..إلا يعطوه فيصل موسى. .شفتوا الفرق. ...... .عاجل : لو طلعتوا من دور ال (64) في دورة حوض النيل إلّا تمشوا (الدهب)...تاني يا معلم ..نحن الدهب دا فترنا منو؟. وإن طال السفر - محمد عبد الماجد صحيفة قوون
