زمان ما بقولوا ليك الزول دا (ماسورة)...زمان كانت الحقيقة شوية كدا بلطفوها – وبعملوا ليها (حليب). .تمشي تقول لبتاع الخضار عاوز لي (سلطة)..يشيلك مع (السلطة) بطيخة. .بدون مناسبة كدا. .فنجرية بس. .البطيخة ولا بتكون في برنامجك ..ولا موضوعة ضمن القائمة. .الحياة كانت خفيفة كانوا بخففوا (اللام)...ويعطشوا (الجيم). .هسع يشددوها ليك لمن يعملوا ليها (رسوم). .يشددوها ليك لمن يطلعوا ليك عينها. .واحد طالع جديد من علبو ..قابلو ليك واحد (قرفان) وقافلة معاه...وعندو رأي واضح في ناس الجرايد. .بقول ليك ناس الجرايد ديل ما عندهم موضوع ...وبكتبوا ساكت..وعاوزين يولعوها بس. .الزول الطالع من علبو ...قال للزول القافلة معاه ..اسمع القميص دا (شدة). .الزول القافلة معاه قال ليه أبداً (الشدة) في الميم بس...ما في القميص كلو. .أي واحد بي فهمو. .واحد زهجان ..وعندو حيرقان وراقد في الحوادث ..الدكتور عاوز يتظارف معاه قال ليه اسمع ملاريتك دي (خبيثة). .زولكم الزهجان قال ليه أبداً (الخبيثة) الممرضة الواقفة في الباب ديك – عاملة كدا زي الصومعة. .الممرضة ما كان عندها أي ذنب..بس ساعة تركيب الجملة دي كانت واقفة في الباب. .أنا ما عارف ليه في المستشفيات ..يغلطوا الدكاترة ..يقوموا يشتموا الممرضات. .الممرضات ذنبن شنو؟. .مرات بقابلوك ناس بدون ذنب كدا تلقاهم (قافلة) معاهم. .الواحد روحو محرقاه. .خاصة يوم 27 من الشهر. .وعندو (ضيق) في البنكرياس. .طبعاً (بنكرياسات) الزمن دا زي كراب العناقريب. .اتغيرت (الفلسفة)..ودخلت حاجات جديدة في الحياة. .اللاعب الماسورة زمان كانوا بقولوا عليه (كيشه). .واللاعب (الكيشه) بتعرفو في الدافوري بتلقاه لابس أحسن لبس ..كدارة (اديدس)...وفانلة شعار اليوفي ..وشنكار ..وشرابات ملونة. .تعاين للزول كدا ...تقول دا أخطر زول في الدنيا. .في الدافوري يعزلوه ليك أول واحد. .ووقت تجي تلعبو .. بتقول ليه : (أنت تلعب صانع ألعاب)...ومع الهجمة تبقى (رأس حربة)..ورأس الحربة الأصلي يرجع ورا (يلعب باك). .وزولكم دا وقت يقيف براهو ..لو متسلل الحكم ما يحسب ليك التسلل. .عندو ثقة عجيبة في نفسو. .المدرجات كلها تكورك للحكم : (مشي). .لكن سرعان ما تكتشف انو الزول دا ما عندو علاقة بالكورة ...وانو (اللبس) خداع. .لبسو لبس بكهام ..وكورتو كورة بله. .هسع بمناسبة بله دا ...قالوا المريخ عاوز يشطب ليه (5) كباتن. .عاوزين يشطبوا أكرم الهادي سليم وموسى الزومة وبله جابر وسعيد السعودي والطاهر سادومبا. .يعني عاوزين ليكم (دفار). .دفار للكباتن ديل. .دفار كباتن جت. .دفار الشطب. .السنة دي الشطب بالدفار. .والله أنا من سافروا عطبرة بالقطر ..عرفت ليك الشطب ح يكون بالدفار. .بحسبها أنا كدا ..ناس بسافروا بالقطر أكيد يشطبوا بالدفار. .الهلال بقى يشطب بالركشة. .بخت ناس النيل الحصاحيصا ..السنة دي ح يسجلوا ليهم (كباتن) كبيرة شديد. .لكن يا جماعة منو الكان بتخيل ...الجماعة اللعبوا أمام بايرن ميونخ ..كلهم ح يتشطبوا. .دي لعنة. .الهلالاب ذاتو لمن ينقوا ليك في حاجة ..تاني ما بتنفع. .قالوا ليك قائمة الشطب التى خرجت من الجهاز الفني للمريخ ...فيها أي لاعب شارك أمام بايرن ميونخ مشطوب. .مشطوب مشطوب..ما في أي كلام. .بداية من أكرم الهادي سليم ..ثم بله جابر والطاهر سادومبا وموسى الزومة وسعيد السعودي. .بل إن قائمة الشطب شملت حتى باسيرو وشيلميس (الذين لم يشفع لهما تبديل القمصان مع لاعبي بايرن ميونخ). .والشطب شمل أيضاً مالك اسحق ولن يجدد المريخ مع اوليفيه. .حتى عنكبة الشات ليه كورة في الكشافات في مباراة بايرن ميونخ ..أيضاً ح يشطبوه. .يعني التشكيلة كلها ح تروح فيها. .لعنة بايرن ميونخ أصابت الجميع. .كروجر وابراهومة برضو ..المريخ انهى التعاقد معهما ..كل واحد مشى ليه حتة. .كروجر أنبي المصري. .ابراهومة الأهلي الخرطوم. .في (لعنة) اكتر من كدا. .نحن من لعبتوا قدام بايرن ميونخ ..قلنا ليكم الكلام دا ..قلنا ليكم بنشبكم (بايرن ميونخ) لمن تفهموا حاجة. .قعدتوا تغالطوا فينا. .وتشيلوا وتكبوا في (الزيت) في الفول. .طبعاً الزيت في الفول ما عندو أي دخل بالموضوع دا. .زمان كان عندنا فنان في الحلة ..عامل لينا فيها محمد الأمين. .قدر ما تمشى ليه يقول ليك للأسف الشديد أنا اليوم دا مرتبط. .فنان فاكيها في نفسو ..وأغنية واحدة حقتو ما عندو. .ولا غنية ..شغال لي زي الام بي ثري...يغني في غنا الناس. .الفنان دا كان وقت يبدأ لينا الحفلة بي (الفارقنا أعز الناس) بنعرفو ليك طوالي عاوز ليه (شية جمر). .بنجيب ليه (شية الجمر). .وقت كمان يبدأ الحفلة ب (اقابلك) بنعرفو ليك عاوز ليه (باسطة). .لو بدأ بي (لو عارف عيونك) ..معناتها الليلة ما عاوز عشا. .لو غنى (قلنا ما ممكن تسافر) بنجري نجيب ليه (بيبيسي). .فهمناه ليك فهم شديد. .يوم الفنان دا ..جاء بدأ لينا الحفلة ب (زيدني عشقا زيدني)..قلنا الزول دا الليلة مالو؟. .ما عرفنا قصدو. .في واحد قاعد ورا ..نقش ليك الحكاية ..قال لينا فنانكم دا عاوز ليه (اسكراتش). .طلعنا جبنا ليه الاسكراتش. .الحياة كدا ..الناس لازم تفهمها طايرة ..الزمن دا بقت ما في حاجة قاعدة. .يا تفهمها طايرة..يا تروح عليك. .لكن الليلة ح نختها ليكم عديل كدا. .نختها ليكم واضحة. .برازيلي الهلال سيرجيو دا قالوا (ماسورة). .يعني دا (وارغو) البرازيل. .سيرجيو دا قالوا ليك في تمارين الهلال الكورة وقت يلعبوها ليه بقول ليهم أنا (كرتي) لسع ما وصل. .والله اللاعب المطوفش ..بتعرف من (كرتو). .مجلس الهلال دا طلع ما عندو موضوع ..قاعدين يعملوا لي في الاجتماعات ..والمؤتمرات الصحفية ..وكرت لاعب ما قادرين يحسموه. .كرت شنو؟. .جايبين لينا لاعب زامل كامبوس في رابطة حلة حمد حقت البرازيل. .الهلال الان يلعب في مرحلة المجموعات ..وهي مرحلة حساسة ..وما عاوزه ليها تنظير. .يجب أن يدخل لكشوفات الهلال لاعبين بمستوى عالي. .أي لاعب مستواه مشكوك فيه أو كبير في السن ما عاوزنو. .الهلال لو أضاف لكشفه لاعبين على مستوى عالي ..وحسب احتياجات الفريق يمكن أن يفوز ببطولة الأندية الافريقية. .ناس سيرجيو ديل ما بجيبوا ليهم بطولة. .بعدين الزول دا كل سنة بيلعب ليه في فريق تقول (طباخ). .في لاعب كبير ..بفرطو فيه بالسهولة دي. .أي نادي عندما ينجح لاعب فيه ..يعمل المستحيل من أجل التجديد له. .وبما أن أي نادي لعب فيه سيرجيو ما كان حريص على التجديد له ..فإن ذلك يعني أن اللاعب (كيشه). .أو ماسورة عديل. .نحن ما عاوزين نظلم اللاعب ..لكن المستوى الذي أظهره في تمارين الهلال غير مبشر. .شتارتو واضحة من (كرتو). .في واحد قال لي أنت تعال هنا ..ليه كرت سيرجيو إلي الان ما وصل. .قلت ليه الزول دا كبير في السن ..كرتو طبيعي يتأخر كدا. .عموماً اللاعب الافريقي أفضل للهلال ..خاصة أن الهلال يلعب في مرحلة المجموعات ..ويحتاج للاعبين أقوياء ..وقادرون على التأقلم على أجواء وملاعب أفريقيا. .سيرجيو دا برازيلي. .ومع برازيلي ..كبير في السن. .يعني لو راجينو يجيب ليكم (قون) إلا تحولوا ليكم رصيد لي عبداللطيف بويا. .الزول دا براهو كدا..ما أظن بجيب ليه لاعب. .نرجع ونلوم مجلس الهلال (الفارغ)..والذي لم يحسم إلى الان أمر لاعب رغم أن باب التسجيلات فتح قبل (6) أيام. .لقد لعب الهلال أمام مازيمبي دون أن يضيف لاعب لكشوفاته بشكل رسمي. .ويبدو أن الهلال سوف يلعب أمام الزمالك أيضاً دون إضافة لاعب. .وهذا يعتبر قصور من المجلس ..وضعف. .كان يفترض أن يقدم هذا المجلس شيء للهلال ..بدلاً من الاعتماد على انتصارات الهلال من أجل تغطية قصور المجلس. .وزارة الشباب والرياضة عادت وكررت نفس الشيء ...وهي تترك الأمور (معلقة) هكذا في الهلال دون أن تحسمها بالانتخابات أو التعيين. .وكأننا كتب علينا أن نكون في هذا الوضع ..عند مقدم أي تسجيلات. .انتوا الحاجات دي بتقصدوها ..ولّا بتحصل صدفة؟. .نكرر ونكرر أن الهلال إذا أضاف لكشوفاته ثلاثة أجانب على مستوى عالي يمكنه الفوز بالبطولة الافريقية. .مع ذلك يتمهل المجلس ويتعامل مع الأمور بهذا (السهو) الذي يصل لمرحلة (الاستهتار). .يا جماعة ..ما تغشوا الناس ساكت بي هدف صلاح الجزولي. .اعملوا ليكم حاجة. .اتحركوا. .والله نحن بقينا ما قادرين نتحمل هذا المجلس ..الذي يتصارع الأعضاء فيه سرًا وعلناً. .اعملوا ليكم (همة). .مجلس المريخ همتو في دورة حوض النيل ..أفضل من همتكم وانتوا بتلعبوا في المجموعات. .ملحوظة : هسع تلقاهم بقطعوا في التذاكر ..بس دي البتعرفوا ليها. هوامش .مهند الطاهر أحسن من يلعب أمام العرب. .في كل مباريات الهلال أمام الأندية العربية تألق مهند الطاهر وسجل أهدافاً. .لذلك فإن مهند الطاهر ..هو اللاعب المناسب في تشكيلة الهلال أمام الزمالك المصري. .المباراة بدون جمهور ..والزمالك أسلوبه خالي من الضغط والخشونة..وتلك عوامل مساعدة لتألق مهند الطاهر. .أضف إلى كل ذلك أن هنالك مساحات وفراغات يتركها لاعبو الزمالك. .فريق الزمالك الحالي يعتمد على المهارات ..وتنقصهم القوة والخبرة..ومهند الطاهر قادر على مجاراة مهارة لاعبي الزمالك. .مهم جدًا مهند الطاهر أمام الزمالك. .غياب بشه ..سوف يتيح الفرصة لمهند الطاهر ..وأن كان هنالك أيضاً سيدي بيه ..وهو أيضاً قادر على الإبداع والتألق في مباراة السبت. .يمكن شوط سيدي بيه ..وشوط مهند الطاهر ..كدا ناس الزمالك ما بكونوا فاهمين أي حاجة. .راحت عليهم. .التفريط في كوليبالي أمر خطير ..بعد أن لعب 6 شهور في السودان ...وجاء بديلاً له البرازيلي سيرجيو. .وسيرجيو ..بطيخة مقفولة. .اللاعب الافريقي أفضل للهلال. .خاصة في المجموعات. .يقولوا ليكم الكلام ألف مرة. ...... .عاجل : دورة حوض النيل قبل كأس العالم زي الزول البقلعو ليه أول حاجة (الضرس) ورابع يوم يعملوا ليه (بنج). وإن طال السفر - محمد عبد الماجد صحيفة قوون
