أحيانا يحتاج الأزواج للمزاح.. الهظار.. الضحك.. لكن الهظار دا بعد مرات بيبقى سبب مشاكل كتيرة.. وتكبر.. وتدفق وما يتعرف يحوشوها كيفن؟.. عشان كدي اي زوجين دايرين يهظرو مع بعض.. ممكن يهظرو.. بس يعملو حسابهم.. الهظار ما يبقى كتير وما يفوت حدود الاحترام.. يعني ما يتقلوهو.. وخصوصا بين زوجين واحد فيهم عوير.. أو الاتنين عورا. لو مرا بتهظر مع راجلها وقالت ليهو "انت ربنا بيريدك.. اداك مرا سمحة زيي كدي".. زي دي بتدي فرصة لانو يرد وبطريقة بداية مشكلة." أخاف انتي قايلة نفسك هيفاء وهبي؟".. وهي ترد عليهو انتقاما لسخريته بي عوارة مدوعلة" عااااااجبني انت يا راغب علامة".. هو يزعل ويعاين لها ويحمر عيونو" يعني اكنك راغب علامة عاجبك؟.. اهاااااااا.. سمح.. انتي طلقانة وامشي لي راغب علامة يعرسك".. طبعا الزول دا ما بيقيف في حتة انو استفزاها بي هيفاء وهبي.. ويعتمد علي التعدد حتى في خيالو.. وفي الهظار.. ومن حقو.. لكن هي لا.. برضو هي عويرة.. تركز علي هيفاء وتقول ليهو" ها.. احي الليلة.. وحات الله عشرين زي هيفاء ما ساعلة فيهن".. وتشلق وتبحلق وترمش عيونا وتقول ليهو" حسي كدي عاين للعيون دي.. في هيفاء في؟".. ولو دايرة تقارن بينو وبين راغب علامة تقارن في سرها.. واوعى تمشي المتبخ وتنقنق وتقول "عااااجبني انت يا راغب علامة" لأنو ممكن تكون اضانو خفيفة واللا يكون ماشي وراها.. لكن المقارنة في الحالات دي مجحفة.. وكل زول عاجبو الصاريهو.. دا نوع من الهظار كعب.. داير تهظر تعرف نفسية الزول البتهظر معاهو.. عشان ما تدخل في حتة ضيقة.. أما الهظار بالضرب والخلعة دا اخطر انواع الهظار بين الازواج وممكن يودي في ستين داهية.. يعني مافي واحد يلبد لي مرتو ويخلعها.. أو مرا تخلع الراجل لانو ما معروف رد الفعل شكلو كيف.. حكو زوج جا لزوجتو قال يهظر معاها فتح باب الشقة براحة بنسخة مفتاح معاهو كان لابس قناع بلاستيك في وشيهو.. المرا اتلخعت جرت ونطت من الشباك في الطابق التالت وقعت كسرت رقبتها.. وهو من ديك وعيك ركب القصبة.. عروس يمنية متكيفة من العرس ومن راجلها.. الصباح هو نايم شالت البندقية دايرة تهظر معاهو صحتو عشان تشوف ردة فعلو وتقرقر.. قام مخلوع نطا اتخلعت هي وطلقة فلتت من البندقية وجات في راس العريس، والعريس مات!! وعندنا كان عريس ليهو تلاتة شهور.. بيحب يهظر مع عروسو.. كانت في التكل تقطع في بصل.. جا براحة همزها.. نطت وقبلت عليهو وبسرعة طعنتو بالسكين.. لحق اأمات طه وهي لحقت أمات كك.. فأصبحت تسير في الشوارع.. تصفق بيديها وتضرب الواطا برجليها.. طق.. وتردد.. (طق)همزني وبعجتو.. (طق).. همزني و بعجتو.. (طق).. همزني و بعجتو"..." من أراد أن يهظر الهظار العوير دا.. هظار الخلعة عليه باتخاذ ساتر.. أو استعمال ادوات اللمس عن بعد.. قناية مثلا.!! الباب البجيب الريح- صحيفة اليوم التالي