يقولوا ليك الزول دا هسع كان واقف هنا دخل فيه (لوري) لحقو ليك الأخبار العالمية في لحظة """"""""""""""""""""""""""""""" لكن الشيء البأكدوا ليكم والدنيا صيام ..أن الموضوع التاني (سر) """"""""""""""""""""""""""""""" أي زول عندو (مصلحة) في فكرة ..بتنتهي من الفكرة ..عشان الأفكار ما بتعرف المصالح """"""""""""""""""""""""""" المخ البشري يحتوي على 15000 مليون خلية عصبية ، كل خلية بتعمل بقوة واحد على ألف مليون من (الوات) """"""""""""""""""""""""""" .ناسنا ديل ..أبو جلاليب (مزركشة) مثل ملاح (الخضرة) البصلتو مطفحة ..بتسحروا ..وما بخلوا حاجة - وما بصوموا. .عندهم أهم حاجة (السحور). .بقولوا ليك (السحور) بركة ..وبكره تلقاهم واقفين بي قفاهم يقرشوا في (البصل)..ويمصمصوا في الصحانة. .الواحد وقت تشيلو نومة يقوم ليك زعلان (محنبك)..ويقول ليك ما اتسحرت. .تقول ليه : أنت صايم؟. .يقول ليك : أبدًا ...لكن الواحد تبقى ثقالة منو – لا يصوم ولا يتحسر كمان. .الواحد فينا وقت ما صام ...أخير ليه يتسحر. .ثم يتفتح فيك نصائح ومثل وقيّم – عليك الله هي الدنيا دي فيها شنو؟. .وشن طعمها. .ونحن ذاتو قاعدين للمتين. .الواحد بدون ما يلملم حاجاتو يمكن يفوت. .يطلع (فجأة). .يقولوا ليك الزول دا هسع كان واقف هنا دخل فيه (لوري) لحقو ليك الأخبار العالمية في لحظة. .دنيا. .بقيت خبر عالمي. .أو يقولوا ليك : (المرحوم كان الباب دا ما بدخلو). .ما عارف علاقة الموت بالباب شنو؟. .قول الباب ما دخلو. .ليه الناس بتقول كدا...(الفلسفة شنو من الحكاية دي). .أفرض الباب ما دخلو– يعني ما يموت. .كلام عجيب ...وتنظيرات بتخترعوها لينا من رأسكم....والله الكلام دا ما في ليه أي داعي هسع دي. .بعدين يا جماعة انتوا ما بتعتبروا من الحكاية دي ..زول الباب ما بدخلو - وبدفنوه في (شبر). .شبر بس. .أمس واقف ..بعاين في العيون وقت تتوارى في (جك اللبن)..بتتخلق علاقة من الحتة دي. .وبقوم فجأة كدا يطلع ليك زول من مافي. .موش مرات في ناس بظهروا ليك كدا من فراغ. .تشيل وتقطع في الذكرى. .يا ربي أنا الزول دا شايفو وين؟. .قدر ما تحفر في ذاتك ..ما تلقى ليك (طرف خيط). .طرف الخيط ذاتو هنا الدخلو شنو؟..لو أنت ما عاوز تشرع لينا ساكت. .ما عاوز أشرع والله – عاوز أقول ليكم كلام علمي ..صادفني في الحتة دي. .انتوا اسمعوه..ولو ما نفع معاكم ارموه في البحر. .البحر فتر من الحاجات دي. .نشيل ونرمي فيه. .كنت واقف ..اداخلت عليّ الحاجات. .لا عرفت أوصل ليكم في الموضوع العاوز أحكي ليكم ..ولا عرفت أوصل ليكم في الموضوع التاني. .طبعاً انتوا ما ح تقولوا لي واصل لينا في الموضوع العاوز تحكي لينا عنو دا ..عشان أنتوا ما عارفين الموضوع شنو؟. .ولا ح تقولوا لي واصل لينا في الموضوع التاني – لأنكم بي بساطة كدا أنتوا ما عارفين الموضوع الأول شنو؟. .زول ما عارف الموضوع الأول – تفتكرو بعرف الموضوع التاني. .ممكن أحكي ليكم عن الموضوع التاني – وأقول ليكم دا الموضوع الأول. .وممكن أحكي ليكم عن الموضوع الأول – وأقول ليكم دا الموضوع التاني. .علي كيفي. .أنا حر في المواضيع دي. .لكن الشيء البأكدوا ليكم والدنيا صيام ..أن الموضوع التاني (سر). .سري للغاية. .والموضوع الأول ..برضو (سر). .سري للغاية. .عشان ما في موضوع يطلع من العمود دا بره. .حدنا هنا يا جماعة. .الكلام البتسمعوه دا...ادفنوه قبلو. .واقف كدا – بفكر في الموضوعين ..وأنا لمن أفكر كتير بقفل (شباك) الشارع. .عشان ما يكون في تداخل. .يكون تفكير صر. .وتقوم مع الحركة (القفلية) دي ..تفصل كهربة (المصلحة) عشان الحكاية ما تضرب. .أي زول عندو (مصلحة) في فكرة ..بتنهي من الفكرة ..عشان الأفكار ما بتعرف المصالح. .والمصالح وقت تدخل على الشيء بتنتهي منو. .لو المصلحة دي دخلت ليك في الفول (دي فيها حاجة)..بتعمل ليك تسمم. .ونحن ما فاضيين للحاجات دي ..وجرى المستشفيات ..وتلقى ليك زول (لديح) كدا واقف في الباب قدر ما تشرح ليه الموقف ما يفهمو ليك. .يقول ليك ما في أي طريقة. .تقوم تجبر على أنك تكضب ليك (120) كضبة صغيرة كدا ..عشان تدخل للمريض جوه المستشفى. .شفتوا الناس ديل بعلموا الناس (الكضب) من وين؟. .من بوابات المستشفيات. .الواحد يكون جاي (صادق) وأمين ومخلص عشان يدخل المستشفى. .تقوم تكتشف كدا ...أنو (الصدق) في البلد دي ..(مستشفى) ما بدخلك. .عشان كدا بتكضب. .لو عاوز تدخل الجامعة إلّا تغش. .لو عاوز تتعين في وظيفة إلّا تكضب..ويكون خالك وزير. .لو عاوز تسافر بره البلد محتاج ليك ل (1500) كضبة. .أول كضبة بتقولها لي خالك البره ...(والله أنا هنا ما قادر أعمل أي حاجة فصلوني من 9 مؤسسات). .يقوم يقول ليك رسل الورق. .ترسل ليه ورق كلو مضروب. .طيب يا ود الناس أنت وقت عندك الورق دا كلو ..والشهادات العالية دي ..والخبرات الطويلة دي ..مسافر لي شنو؟. .علمتوا الناس (الكضب). .لكن برضو ممكن تعمل من (الكضبة) فلسفة خفيفة كدا. .أي حاجة لو عملتوا منها (فلسفة) ممكن ترجع إلى الحالة الصحيحة فيها. .يعني ممكن نرجع للصدق من تاني. .الناس هنا اتفلسفوا ليك حتى في (الكضب). .الواحد فيهم يقول ليك : (يا أخي كضبة صغيرة كدا ما فيها حاجة). .أو يلونوا ليك الكضب ..ويقولوا ليك (كضبة بيضا). .كضبة بيضا ولّا كضبة (فرخة) كلها واحد. .ما في أي فرق. .بعدين الواحد من يقعد يلون ليك في (الكضب) أبعد منو؟. .وإذا كان هناك كضبة بيضاء ..ببقى أكيد هناك كضبة حمراء وكضبة سوداء. .لونتوا لينا (الكضب) وقعدتوا لينا. .هسع دا ما موضوعنا – وأنا ولا عاوز اتكلم ليكم في الحتة دي ..الكلام (اتسورف) منا ساكت. .موش مرات بقولوا ليك الموية كسرت. .أها أنا مواضيعي دي مرات بتكسر. .ما تستغربوا لو لقيتوا الموضوع في حتة ..والعنوان في حتة. .الموضوع مرات بطلع من العنوان. .والعنوان ذاتو مرات بكون (تمويه) ساكت. .زمان نحن في المدرسة بقولوا لينا (ت) تمر ..و(ج) جرس. .لمن اتخرجنا من الجامعة (ت) تمر دي ما قابلتنا. .والجرس ذاتو آخر مرة شفناه كان في الثانوي العالي. .يعني العناوين دي بختوها ساكت. .على العموم يا جماعة دا لا الموضوع الأول ..ولا هو كمان الموضوع التاني. .والظاهر كدا ...(وما طالبني حليفة)...لا حليفة ولا خليفة ..أني ما ح أقدر (انتشر) ليكم في الموضوع التاني ..عشان الكلام كتر...ومفروض بعد كدا أدخل على (الهوامش)...وأنا الموضوع الأول ما اتكلمت ليكم عنو. .يا جماعة اتكلم ليكم كيف؟..وأنا قلت ليكم الموضوع الأول (سري للغاية). .والموضوع التاني برضو (سري للغاية). .مفروض المواضيع دي تفهموها براكم. .جاتكم ..ما جاتكم. .ظهرت ..ما ظهرت. .مفروض تقع ليكم. .موش مرات بتكون واقف كدا ..يقوم زول يحكي ليك موضوع عن زول يفترض أنك بتعرفو. .يقول ليك (عباس). .تقول ليه عباس منو؟. .يقول ليك معقولة ..ما بتعرف عباس – عباس يا أخي ..(على طريقة شفيق يا راجل). .المهم في النهاية عشان تتجاوز الاحراجات دي ..واللوم الشديد دا ..بتقوم تقول ليه : عباس ..طيب ما تقول كدا من الصباح. .وعلى طريقة شفيق يا راجل ..بيقول ليك عباس الكان لمن يمشي بوقف. .عباس. .عباس الكان لمن يجوع بياكل. .عباس. .وأنت مع المحاصرة دي مجبور تقول ليه خليه عرفتو ..(كتلتو تب). .وهو ذاتو ما بكون بعرف عباس. .أقول ليكم موضوع تالت. .مرات في زول بلغي ليك مخ الزول التاني. .يقوم فجأة كدا يقول ليه : أنت ما عندك مخ. .الكلام دا غلط يا جماعة. .حاجة بتفيدكم بدل النقة الكتيرة دي. .عشان ما تطلعوا ساكت من العمود دا. .الدكتور جوهانس شالربه عالم الأبحاث البيولوجية في معهد كلفورنيا التكنلوجي قبل عشرات السنوات أكد أن المخ البشري يحتوي على 15000 مليون خلية عصبية ، كل خلية بتعمل بقوة واحد على ألف مليون من (الوات) ويعمل المخ كله بقوة تبلغ حوالي عشرة وات...وعندما يؤدي المخ عمله ويولد تيارات كهربائية مباشرة ومتغيرة ، فإنه يعمل بقوة تتراوح بين واحد على الفين وواحد على 200 ألف من الفولت ، بذبذبة تتراوح بين 8 إلى 14 في الثانية. .لكن الحاجة البأكدها ليكم أنا. .وبي بحوثي الخاصة ..وتجاربي ...أن الجماعة ديل شغالين ب (3) خلايات فقط...يعني ما عندهم 15000 مليون خلية عصبية. .نعمل بيها شنو (الخلايا) الكتيرة دي. .بي خلية واحدة ممكن يدوروا العملية. .ونأكل سمك كمان. .الله – أنا قلت (سمك) في الحتة دي ..مفروض ما أقول (سمك) مع السخانة دي. .بكره يمكن نرجع لموضوع (المخ) دا. .ويمكن لا – علي كيفي. .ودا يا جماعة هو الموضوع التاني – عشان نبقى خالصين...الموضوع الأول انسوه. ...... .ملحوظة : قال سري قال. هوامش .الهوامش ضاقت عليّ. .قالوا ليك المريخ يعسكر في كينيا استعدادًا لي سيكافا. .انتوا (شاي). .شنو كل (15) يوم تعسكروا في كينيا. .الشاي ما بعمل كدا. .مجلس الهلال المنتخب مطلوب منه أن يوفر (الثقة) للآخرين ..حتى تزول مخاوف الهلالاب. .ومطلوب كذلك من المجلس أن لا يكون ردة فعل للمعارضة الهلالية. .ما تباروا المعارضة كتير ..اشتغلوا شغلكم. .لو باريتو صلاح إدريس دا بطلعكم بي قعر القفة. .هسع قعر القفة الدخلها هنا شنو؟. .انتوا مجلس منتخب. .عاوزين صورة جيدة لمجلس الهلال. .تجاوزوا أخطاء صلاح إدريس ..وأخطاء البرير ..وكل المجالس السابقة وقدموا لنا تجربة نحتفي بها. .مجلس جاء بالانتخاب جدير بالاحترام. .ويجب أن يمنح الفرصة كاملة ثم من بعد يحكموا عليه بعد ثلاث سنوات. .لا نريد استقالات في المجلس ولا انشقاقات ..خلوا كلمتكم واحدة ..ما بتجيكم الحبة. .تأهل الهلال لدور الأربعة إن شاء الله سوف يدفع المجلس كثيرًا إلى الأمام. .لذا ركزوا الآن في مباريات الكنغو. .تاني الحاجات براها بتكمل. ....... .عاجل : صلاح إدريس قام تاني جاب سيرة (الديون). وإن طال السفر - محمد عبد الماجد صحيفة قوون
