علمياً يقول الأطباء إن هناك بعض الأزواج عندما يعلم أن زوجته حاملا.. يصاب بحالة تشبه حالة الوحم عند المرأة الحامل: جا راجع من الدكتور يرقد فوق عنقريب في الحوش.. ويبدو عليه الإعياء.. أمو جات وقعدت جنب كرعيهو.. قالت وهي تعصر ليهو في كرعيهو"أها الدكتور قال لك مراريا.. واللا تيفويد.؟".. قال لها" لا مراريا.. ولا تايفويد.. قال لي دا وحم".. وقفت العصير وهي ماسكة كرعيهو.. رفعت إيديها وعلى وجهها ضحكة ساخرة.. قالت ليهو" الدكتور دا كشف عليك واللا على المرا.؟".. قال لها بعد ما قبل على الحيطة وبصق".. كشف علي أنا يا يمة.. قال دي حالة نفسية بتجي للراجل البريد مرتو ريدة شديدة.. أول ما يعرف إنو مرتو حامل.. تحصل ليهو أعراض زي دي.. يعني.. يقعد يتوحم معاها.. حالة نفسية وبتعدي يا يمة".. عاينت ليهو قووووووووي وقالت ليهو".. وحم راسو عديل كدي؟".. سكتت مسافة، ثم قعدت تصفق في إيديها بين حجرها.. وقال بحسرة قريبة للبكا.. "ما بتستاهل يا خالد.. وووووووا خسارة تربيتنا فيك.. وا خسارة تعبنا.. وا خسارة جرينا وراك.. تتوحم يا خالد؟.. حسي كان عرستّ بت عمك ما كان أخير ليك؟.. تعرس المرا دي.. وتستلمك ولي عند الوحم تتوحمو ليها؟.. غايتو أبوك ما يسمع.. ما يسمع.. ما يسمع.. أبوك إن سمع.. يا كتلك.. يا وقع ساكت ميت.. تتوحم يا خالد؟.. الليلة وب علي.. و وااا خجلتي.. أودي وشي وين؟.. "ثم قامت ولبست نعلاتها ومشت على خشم باب الشارع.. كورك لها خالد" يمة.. يمة.. ماشة وين؟".. قالت لو وهي ما بتتلفت عليهو" ماشة أهلي.. وقت تبقى على الولادة بجيك.. ياكا ولدي عاد.. ومجبورة عليك.." ثم أردفت وهي تنقنق بحسرة".. أريتو خبر السواد والرماد"!! ثم جاطت عليها الأمور في رأسها.. وقفت.. اتلفتت عليهو" لا.. يا خالد.. الشي دا من زمااااان إنت كدي؟.. واللاّ شيتن جديد؟".. أما عزيزي الزوج.. هاك بعض الأمثلة التي تدل على حب زوجتك ليك: * لما تجي تطلع تكون هي مصنقرة فوق السرير وتعاين ليك من ورا.. وتقول ليك".. وووووب علي قعدت فوق شنو؟"!! كان بإمكانها أن تطنشك ..وتمشي إنت كدي.!! *لما تكون إنت واقف جنب التلاجة وهي قاعدة محننة تقول ليك.. "سامر أديني معاك موية".. تكون عاوزة تشرب من يدك عشان الحنة تشيل.. ما تفسرها أي حاجة تانية..!! *لما تجي داخل من برا تلاقيك شايلة وليدها في صفحتها تفتح ليك الباب وفي وشيك تعاين ليك وتقول ليك "جيت؟" خليك رومانسي ما تقول لها "لا لسه".!! *لما تجيب ليك الشاي.. والكباية قدامك وإنت تكون مشغول بي حاجة.. تقول ليك بكل حنية "يا عوض أشرب الشاي دا بيبرد".. عاوزاك تستمتع بنكهة الشاي وهو سخن.. أوعى تفكر إنها مستعجلة عشان إنتو مارقين..!!! الباب البجيب الريح- صحيفة اليوم التالي
