الواحد فيهم كان لو عملت ليه ملعقة سكر زيادة تلقى فاتح خشمو (مندهش) """""""""""""""""""""""""""""""""" نحن الواحد فينا لو طلع ليه في (دومة) بكون ما خلي حاجة – الناس طلعوا (القمر) """"""""""""""""""""""""""""" لو مشيت تسأل من الماهية ولقيت الماهية طلعت بتقعد تندهش قدام الصراف لمن يهم حاجة """"""""""""""""""""""""""" انتوا يا ناس المريخ ما عندكم ناس يخجلوا ليكم – بعد العمر دا بتلعبوا في سيكافا """"""""""""""""""""""""" . قبل ايام تساءل احد نجوم المجتمع عبر صفحته في (الفيس بوك) وقال هل قابلكم في هذه الايام زول مندهش؟. . الاندهاشة راحت وين؟. . منو الشال (الدهشة)؟. . السؤال كان عميقا فقد غابت (الدهشة) من حواس الناس وتلاشت ، وبقى ما في زول قاعد يندهش في البلد دي. . ولا فاضيين للحاجات دي. . ولا عندهم وقت. . الواحد لو (كلكلتو) ما بندهش. . الدهشة في البلد دي بقت اصعب من (الفيزا). . ديل ما بندهشوا بي (سهولة). . احساسهم بقى ميت. . وشعورهم جامد. . ودمهم (بقري) كمان – خلينا (الدهشة) رسمي. . تقول للواحد فيهم – حصل جربت (الدهشة)؟. . يقول ليك : والله لو لقيت لي (كيلو ضان) بندهش ليك. . اندهاش مصالح بس. . عليكم الله هسع القاعد يندهش في البلد دي شنو؟...(في شنو ذاتو بدهش؟). . ولا حاجة. . قاعدين في الصقيعة. . السيول ، والامطار ، والفيضانات هي ذاتها بقت ما بتدهش. . فقدنا الاحساس بالمطر. . زمان المطرة دي لو (نقنقت) ساكت تلقانا قاعدين في (الشباك) في حالة اندهاش تام. . عاوزين (نتفقع) من الدهشة. . مستغربين جنس استغراب. . هسع الموية تصل للركب ما بتلقى ليك زول مندهش. . ولا بتعنينا بي حاجة. . الناس خايضة في الموية بدون اي اعتراض – زي كأنو من الطبيعي ، والتلقائي انك تصل السوق العربي (خايض). . كتلو في الناس الدهشة. . الناس ولا بندهشوا. . شوفتوا ليكم (شافع) في الزمن دا سمع ليه صوت (رعدة) قام جاري ودخل جوة. . شفع زمان لو شافوا ليهم (برق) ساكت تلقاهم كلهم عملوا (ساتر) تحت السراير. . اتذكر (لو الجماعة ديل ما حظروا التذكر) بتذكر كانت وقت (الجدادة) تبيض ليها (بيضة) بنقعد نندهش من ذلك. . شفتوا البساطة دي؟. . عليكم الله في طيبة اكتر من كدا. . الجدادة لو باضت بنندهش. . شوفوا الشفع الزمن دا – (الجدادة) لو جابت ليها (عتود) ما بشتغلوا بالموضوع دا. . المسلسلات ذاتها خربت طبع (الشفع). . شغالين لي حروبات في الكواكب...البهدشهم بي حاجاتنا شنو؟. . حاجاتنا ابعد شيء فيها (البامية المفروكة). . انت (البامية المفروكة) الماسك لينا فيها الايامات دي شنو؟. . انا عارف – في حاجات بتدخل غلط براها. . بدون ما تشعر تلقى (السطر) تلب في العمود. . خلاصة الكلام (الدهشة) انتهت. . هسع غابت (الدهشة)...وتراجع على اثر ذلك الغياب الخوف والخجل ، والشعور بصورة عامة. . بقى لا في خجل – ولا في خوف. . هسع في شافع بخوفوه ب (البعاتي). . او في شافع بخوفوه ب (السحار). . نحن زمان ساكت زحمونا بالحاجات دي. . حاجات قاطعنها من رأسهم – لا وجود لها. . الليلة الشافع لو حبت ليه سيرة (البعاتي) بقول ليك : (داخل واتس آب). . غابت الدهشة – حتى في الخريف. . يمكن غياب (الدهشة) من الناس خلى الحكومة تتعامل مع الخريف على هذا النحو من عدم اللا مبالاة. . زي كأنو الخريف دا – والاحداث والكوارث الحصلت دي حصلت في دولة تانية. . تقول حصلت في اندونسيا. . بنغلاديش. . كوريا الجنوبية. . بقينا (السودان) ذاتو ما قاعدين نشعر بيه – (الناس جارية)..وما شاعرة بي حاجة. . المسلسلات التركية (شتت) شعور الناس. . اتلخبطنا في حواسنا – وادخلت علينا الاشياء. . الواحد تقول ليه السيول هدمت ليها (3000) بيت – يعاين ليك بدون دهشة ويقول ليك : (بالله). . ويرجع يواصل في شغلتو. . كأنو البيوت دا بيوت (عنكبوت)..ليه بقينا ما بنحس بمعاناة الاخرين؟ - (عشان الدهشة غابت). . يقولوا ليكم الكلام الف مرة. . تقول للزول تتخيل في الخريف دا ماتوا (39) شخص. . يقول ليك بدون ما يرفع رأسو – (اصلو ما معقول). . وين في الساحة الخضراء – (ولا مركز معاك). . ولا شغال بيك. . ويرجع تاني يتصفح في رسائل (الواتس آب). . وينتهي الكلام على كدا. . الناس اتجمدوا في شعورهم. . بقوا جامدين اي حاجة ما بتحركهم...ما بحسوا (جلدهم تخين). . اتعطلت فيهم (الدهشة). . بعدين الناس تندهش كيف؟..هم فاضيين للدهشة – اليوم كلو في (الواتس آب). . الواتس آب دا كتل الدهشة. . عادي جدا الواحد يقول ليك في (21) نفر اتوفوا في حادث حركة في شارع مدني. . تقول ليه الكلام دا جبتو من وين؟. . يقول ليك من الواتس آب. . البشوفوه في الواتس آب بعطل فيهم الاحساس بي اي حاجة. . الواتس آب ما كتل (الدهشة) بس – الواتس آب كتل (الخيال) ذاتو. . الواقع بقى اعرض من الخيال. . تتخيلوا خيالنا بقى محدود ..الحاجات القاعدين نتخيل فيها الان – كلها في دول العالم الاول اصبحت واقع. . نتخيل شنو تاني؟. . احلامنا صارت اقل من الحاجات البتحصل برة. . ديل فاتوا (احلامنا) بي غادي. . نحن الواحد فينا لو طلع ليه في (دومة) ما خلي حاجة – الناس طلعوا (القمر). . واقفين على الدومة. . هسع من الله خلقكم كدا شفتوا ليكم روسي قاعد (يكد) ليه في (دومة). . نحن بنعملها. . سمعتوا ليكم (فرنسي) قال عندو (وجع بطن). . ابدا. . الحاجات دي برة ما بتحصل. . ما تقعدوا تغالطوا ساكت. . تغالطوا زي (العجور). . اول العجور بيغالط. . بتجيب ليك حاجات من برة رأسك – ونحن ما فاضيين للحاجات دي. . نحن اي حاجة عندنا بي نظام. . انت وين الكلام دا؟. . لو عملتوا ليكم بحوث سوف تجدوا ان سبب ضياع الكثير من الاشياء ناتج من اننا بقينا ما بنندهش. . ولا بنجامل في الحتة دي. . حليل زمن كانت (الدهشة) تنتج لاقل الاسباب – الناس من طيبتهم كانوا بندهشوا لأقل حاجة. . لو لي حلة ملاح حرقت – تلقى الناس اندهشت. . الواحد فيهم كان لو عملت ليه ملعقة سكر زيادة تلقى فاتح خشمو (مندهش). . ما قادر يقيف من (الدهشة). . ابسط حاجة بتدهشهم. . الان بقت في حرب على (ملاعق السكر). . اي واحد يقول ليك بشرب شاي من غير سكر – (مسيخ). . والبشرب شاي بي سكر – بقول ليك ما تسوط لي السكر. . تعال شوف زمان. . كباية الشاي لي نصها بتكون سكر. . غياب السكر دا يمكن يكون عندو علاقة بغياب (الدهشة). . اي حاجة بقيت (مسيخة). . حتى (الشاي) القاعدين نشرب فيه...بقى بدون (سكر). . الدهشة زمان كانت ساهلة ومتوفرة. . علبة زبادي ممكن تدهشك – خاصة لو كانت ساقطة. . طحنية (دردومة) كدا – ممكن تتدهشك للاخر. . الكهربة لو قطعت وقامت جات تاني بتندهش. . لو مشيت تسأل من الماهية ولقيت الماهية طلعت بتقعد تندهش قدام الصراف لمن يقهم حاجة. . لو لبست ليك قميص جديد ..ممكن الحلة كلها تندهش بي قميصك دا. . هسع لو لبست ليك (شيلة) كاملة ما في زول بندهش. . ولا بشتغلوا بيك. . يحضروا لي في الفضائيات دي من فيلم اجنبي الي فيلم اجنبي – عاوزهم يندهشوا ليكم كيف؟. . بعدين احسن اقول ليكم حاجة واقعية. . احسن اقول ليكم الحقيقة. . بدل ما اقعد الف ليكم كدا. . سيكافا دي كتلت في المريخاب الدهشة. . بقوا ما بستوعبوا الحاجات. . حدهم بس سيكافا. . عليك الله انت لو ما ساكت – الدخل (سيكافا) في موضوع (الدهشة) شنو؟. . انتوا مالكم يا جماعة انا ادخل اي حاجة في العمود دا علي كيفي – سيكافا – بامية مفروكة – طحنية. . في زول عندو اعتراض. . الحاجات دي ما تفتكروها بتدخل ساكت. . الحاجات دي بتدخل بي نظام. . نظام شنو؟. . نظام نحن اي حاجة عندنا بي نظام. . زمان (الكلام دا بدري) عشان ما تقعدوا تغالطوا ساكت. . زمان نحن كان عندنا (كديسة). . الكديسة دي كانت (ديمقراطية) للاخر. . ديمقراطية كيف يعني؟. . ديمقراطية يعني (الكديسة) دي كانت بترصد ليك (الفأر) وتقعد تتباعو وتكون ليه لجنة الى ان (تقبضو). . عارفين من ديمقراطية الكديسة دي كانت بتعمل شنو؟. . الكديسة دي كانت اول حاجة بتحقق مع (الفأر) – بعد داك بتضرب ليك (الفأر). . ما زي كدايس الزمن (الشموليات) ديل ..الفأر يقبضوه وياكلوه بدون ما يحققوا معاه. . ........ . ملحوظة : هسع تلقاكم قعدتوا تشرعوا في موضوع الكديسة دي – اوعى تشرعوا لي من رأسكم. هوامش . الهلالاب متفائلين شديد بمباراة مازمبي. . وناس الهلال تفاؤلهم ما قاعد يكون من فراغ. . ناس المريخ في (سيكافا). . انتوا يا ناس المريخ ما عندكم ناس يخجلوا ليكم – بعد العمر دا بتلعبوا في سيكافا. . ديل سيكافا عندهم زي (تحويل الرصيد). . لكن ناس المريخ ديل عندهم (حارس). . حارس مشكل كدا – الكورة يمكسها على (5) دفع. . تقول عاوز يخرجها (كتيبة). . اظن كل مؤهلات حارسكم دا تتمثل في ان اسمو (جمال). . يكونوا الجماعة كسارين التلج دي سجلوه عشان اسمو (جمال). . اصلو ما شفنا لينا ليه موهبة اكتر من كدا. . حارسكم البفك الكورة براهو دا – ممكن يعيد لينا (الدهشة). . غايتو حارسكم دا لو لقاهو سادومبا بفرتكو ليكم حرف – حرف. . يخليه ليكم زي عصيدة الدخن. . كمان قولوا ما بتعرفوا (عصيدة الدخن). . قاعدين لي تقطعوا من رأسكم. . في احساس (صداع) كدا. . انتوا معاي في الاحساس دا. . وإلّا الاحساس دا غريب عليكم. . الجو ملخبط مرة يكتم ومرة يفتح ..ومرة ناس الحكومة يقولوا ليكم مسيطرين تماما على الوضع. . سيطرتكم دي زي سيطرة ناس اكرم وضفر على سادومبا وكاريكا. . .... . عاجل : الناس البفهموا شديد – بعملوا فيها ما فاهمين حاجة (الحكاية واضحة شديد). وإن طال السفر - محمد عبد الماجد صحيفة قوون