شاهدت كما شاهد معظم الناس.. صور أحشاء وجلود وكدارين حمير مضبوحة في منطقة سوبا.. علا أنا عديت الكدارين لقيتن ستة.. وأكيد المضبوحات حمارين والحمارين عندهن تمانية كرعين.. في جوز كدارين مافي؟ مشى وين؟.. يا اخوانا عليكم الله ما تاكلونا وتخمونا ساكت قبال كل شي تشوفو الجوز دا مشى وين؟.. وبعدين نجي ننضم في اللحمة مشت وين؟.. هذه هي المرة التانية خلال سنتين تتلقى حمير مضبوحة.. طبعا دي الاتقبضت والما اتقبضت ديك باقي لي.. زماااااان شبعنا فيها.. تعتبِر منظمة الصحة العالمية ان لحوم الحمير داخلة من ضمن اللحوم الممكن يتغذى عليها الإنسان.. قبال فترة اعترف مسعول كبير في الخطوط الجوية السعودية أن لحوم الحمير قدموها في وجبات على رحلات الخطوط السعودية.. تعتبر لحوم الحمير في تونس من اللحوم الاساسية وعندها زبائن.. وتستهلك العاصمة تونس نحو 800طن من لحوم الحمير سنويا.. دي البتضبح رسمي تحت اشراف السلطات.. غير البينضبحن كيري.. وباقي لي نحن بالطريقة دي أن فتشنا بنلقى اننا بنستهلك أقل شي 500 طن من لحوم الحمير من غير علمنا.. في أوربا اكتشفو أن مصانع اللحوم تقوم باضافة لحم الحمير والخيل للهمبيرغر.. والهوتدوغ.. وبعض المنتجات الأخرى.. ونحن هنا في ناس بياكلو الهوت دوغ ما عشان عاجبهم.. بس عشان اسمو عاجبهم "يا جنا أدنا سندوشتي اللليل هوتدوغ".. ويقعد يمدغ.. ويدشا.. ويمشي يغسيل ايدو لو ما لقى صابونة في المغسلة يهرج فوق ناس المطعم "دا مطعم شنو دا؟.. صويبينة يغسلو بيها الليدين ما عندهم".ويكون هو ماكل لحم حمير ومن الحتة القاعدين يشدو فوقها السرج.. واللا بنيات متفلهمات يمشن بعد مشاورة" بري يا انتي الفول دا اصلو ما قاعدة اكلو لا هو لا الطعمية.. يا همبيرغر.. يا هوتدوغ" ويمشن ويكونن لابسات نضارات شمشية كبااااار ويقدلّن.. ويقعدن ويمرقن الجلكسيات ويدخلن الواتساب.. وياكلن في همبيرغر الحمير.. ويتبسمّن.. ويمرقن يلبسن نضاراتن ويقدلن تاني "المحيرني البنات القاعدات يريدن الهمبيرغر والهوتدوغ ديل.. طواااااالي لابسات نضارات شمشية كبار لشنو؟.. الواحدة تلاتة أرباع وشيها نضارة، والباقي شلاليف"!! ختامة (بُشارة الرخمة):- ظهور تلاتة تماسيح وقرنتية في خزان جبل أولياء.. ضبط الفين جدادة من جداد المزارع النافق بغرض تسويقو وبيعو للناس تلوث مياه الشرب في العاصمة.. وناس الولاية مرة يسكتونا يقولو في تلوث.. ومرة ينهرونا ويقولو كضب مافي تلوث.. تلوث هواء الخرطوم بدخاخين العربيات والمصانع.. كمية من الادوية المغشوشة في السوق.. وناس حماية المستهلك يا كافي البلا، نضم بس.. يجو في التلفزيون ويرفعو ايدهم ويداعو في المسعولين.. لكن برضو مجهود! ازدحام المقابر بالموتى.. والخطط الإسكانية خالية من أي مقابر.. المقابر القديمة الميت عشان يدفنوهو يضايرو ليهو اتنين تلاتة ويدفسوهو في نصهم!! وعلى مواطني الأقاليم المقيمين في الخرطوم الداير يموت يمشي يموت هنااااك عند أهلو!! يضمن قبرو.. وإن كمان بقى داير الدفسيبة دي، اليقعد!!! الباب البجيب الريح- صحيفة اليوم التالي
