الطلاق أبغض الحلال.. من أسوأ التجارب الإنسانية.. لكن أحيانا بيكون ضروري بدون ضرر.. وآخر العلاج الكي.. وبتر لإنقاذ ما تبقى من إنسانية من يختار الطلاق.. لو استحالت العيشة والمعايشة.. لابد منه!! لكن في ناس بيطلقو ساكت.. لاتفه الأسباب.. وكل يوم نقرأ واللا نسمع طلاق وقع.. عشان حاجة ما بتستحق.. ولا أظن أنو دا يكون هو السبب.. أكيد في تراكمات كتيرة.. ومدسوسة لحين زهجة أو ساعة شكلة.. نفرين عايشين مع بعض.. ليل نهار.. بيصلو مرحلة يزهجو من بعض أحيانا.. وكل زول يقعد يندب حظو سرا.. ولو خلاص طفح الكيل ممكن علنا.. التنازلات ضرورية.. وتحمّل عيوب الآخر لابد منها لاستمرارية الحياة.. مع محاولة إصلاح العيوب.. ورتق ثقوب توب السترة.. يندب حظه محاولا إسقاط عيوبه على الآخر.. لو قعد مع نفسو وبراااااحة راجعها .. ح يلقى عيوبو الداير يختها فوق شريكو قاعدة هنووووك في ركن قصي من دواخله.. أحيانا نلقى زوج زهجان من مرتو عشان (السرير).. أو إخفاقه هو شخصيا في السرير وقد مس هذا الإخفاق كرامته كفحل فطفق باحثا عن سبب في شريكته يواري فيه سوءته.. أول ما تصبح الواطا وتجيب ليهو كباية الشاي.. ولتعويض ما فاته من (رجالة) يقعد ينقنق في الشاي.. تقيل خفيف.. الكباية ما نضيفة.. لو ما لقى شي يفتش لي لأي حاجة هايفة عشان تكون مدخل لي شكلة تؤدي الي خروجها من حياته.. أها إن ما لقى فيها شي.. يمرق على السهلة ويبداها شكلة من كمساري الحافلة.. مرورا بناس المطعم البياكل عندهم الفول.. معرجا علي ست الشاي.. ثم بزملائه في الشغل.. وهو راجع يقعد ينعل في الشوارع البقت كلها حفر ومايات.. و يمر بسيد الدكان الفي الحلة ابطراريم البقينا نشتغل ونشيل قروشنا كلها نديها ليهو.. وينهِّر ولدو الحالق شعرو زي جز الحمير زمان.. وأحيانا تكون الزوجه النوع الكاواي.. عارفة سبب زهجو ومبسوطة وتقعد تشر في الهدوم وهي تغني "قالو لي إنساهو وأبعد عن طريقو وعن حياتو".. ويستلم الرسالة ويقول ليها في سرو "الغنية دي ما كان تبقى مرا، وتغنيها قبال عشرين سنة؟".. أقول ومن بعد التوكل على الله لابد من مناقشة الأسباب الحقيقة ورا كل أزمة زوجية.. وأبدوها من العنقريب.. والشفافية مهمة.. حتى لو كانت شفافية بدخّل الزول في ضفورو.. من أغرب ما قراْت عن الطلاق:- (نشرت إحدى المجلات الأمريكية مقالا ضم الأسباب الأكثر شيوعا التي من أجلها تطلب الزوجات الطلاق من أزواجهن.. والأسباب العجيبة كثيرة، منها:- أكل الزوج المكسرات في السرير. عدم دعوة الزوج حماته إلى العشاء. إصرار الزوج على أن ينام كلبه في الفراش نفسه الذي تشاركه فيه الزوجة. -وخز الزوج زوجته بالدبوس لأن هذا الوخز يثير ضحكة. -ضرب الزوج كلب زوجته.. بصورة دائمة، وبلا سبب. شفتو الخواجات ديل مستهبلين!.. النضم دا وراهو نضم تاني!! راجل ينوّم كلبو جنبو، دا ما قنعان منها عديل.. ودق الكلب البلا غبينة دا شنو؟!! الباب البجيب الريح- صحيفة اليوم التالي
