ليس امام الاتحاد العام غير (40) يوماً لانهاء الموسم الرياضي في السودان – والسبب في ذلك الضيق (سيكافا) التى اجلوا ليها الدوري إن شاء الله (جمال فرفور) يبقى ليكم صانع ألعاب يا ناس المريخ ناس معتصم جعفر ومجدي شمس الدين وأسامة عطا المنان – بصرفوا تعليماتهم بالريموت كنترول مجدي عبداللطيف عشان تسجيلو ما صاح مفروض لمن يفوز بنجومية المباراة تمنحوه (كيلو موز) عشان نحددها ليكم مع الجماعة – بي فهم...(نظام شنو؟) نظام نحن فاهمين أي حاجة. حافظنكم حفظ. زي الزول وقت يكون تلفونو بعيد منو يقوم يضرب. يقوم بدون ما يشوف النمرة يقول ليك دي بتكون (المرا). عارفين أي حاجة. حتى التصريحات الشتراء التى يطلع بيها من حين لأخر متوكل احمد علي..بقت لينا (محفوظة). زي مواضيع المطالعة بتاعة سنة تلاتة. السودان دا كلو قراها. زولكم دا (متوكل أحمد علي) كل ما يتذكر انو في مجلس المريخ – بقوم يطلع ليه (تصريح). عشان الناس يتذكروه. عشان ما نعتبر أن متوكل كان في المجلس السابق. عشان نتذكرو ليكم – بقوم يصرح لينا. صاحبكم دا (فاتورة كهربة) بتجهجو – وتخلي المجلس يقدم استقالتو ..وبتكلم عن هيثم مصطفى. كدا يا متوكل سددوا فاتورة الكهربة أولًا – بعدين تعال قارن بين هيثم مصطفى وفيصل العجب. بعدين المواضيع الكبار دي ذاتك ما تتكلموا فيها. المواضيع الكبيرة دي خليها للناس البدفعو. أنت مالك ومالها؟. ما تقعد تقارن لينا ساكت. مقارنة بس في الفاضي. متوكل أحمد تصريحات. جابوا لينا المواضيع دي كلها بما في ذلك تصريحات متوكل – نحن بنعرف الحاصل شنو؟. إن شاء الله ح نوصلها معاكم (جامعة الدول العربية). اصلو ناس جامعة الدول العربية قاعدين ساكت – وما عندهم موضوع. فايقين – وليهم (45) يوماً ما طلعوا ليهم (بيان). فتحنا تحقيق. مشينا مسرح الجريمة – شفنا آثار الجريمة. لبسنا (نضارات) سوداء. نحن الحاجات دي شفوت فيها. نحن صعبين. نحن ما بنلعب – ولا بنجامل في الحاجات دي. قلنا نشوف الحكاية دي وراها منو؟. قالوا وراها مازدا. ايوا. محمد عبدالله مازدا. عرفنا ليك موضوع اختيار المدربين الذين سافروا إلى الولاياتالمتحدةالامريكية وراها محمد عبدالله مازدا. كدا يعني. جيبوا لينا محمد عبدالله مازدا. هاتوا مازدا. جيبوا لينا مازدا من تحت طقاطيق الارض. تهبوا وتغطسوا وتجيبوه لينا. عملنا ليهم شغل (المسلسلات). حالة الفراغ الفني الذي يعاني منه الهلال – سببه الاتحاد العام لكرة القدم السوداني. الاتحاد القاعد لينا بس للخرمجة واللخبطة. شاطرين يا بتوع الاتحاد ..عاوزين تضيعوا الهلال. عاوزين يشغلونا ليكم بي مواضيع جانبية – مبارك سافر – لا ما سافر. البمسك الهلال منو؟. الفاتح النقر!!. لا فوزي المرضي. ابدًا – عاكف ح يتصدى للمهمة. وجماعتنا بي غادي يهندسوا في مواضيعهم. يجيبوا في ناس انصاف مدني وجمال فرفور وصباح. شغالين (حفلات) ساكت. حفلات وصرف ضربات جزاء. ونحن بي جاي مشغلوين في رقبتنا. مشغلوين في نفسنا. البمسك الهلال منو؟. عليكم الله هسع دا ما لعب عيال. البعملوا فيه ناس المريخ دا ما لعب عيال. انصاف مدني ايه؟. وصباح شنو البتجيبوها تغني لي (سيكافا). سيكافا حقتكم دي (حنة) كتيرة عليها. يقولوا ليكم الكلام مية مية. قال ايه؟. قال جابوا جمال فرفور. إن شاء الله (جمال فرفور) يبقى ليكم صانع ألعاب يا ناس المريخ. ناس معتصم جعفر ومجدي شمس الدين واسامة عطا المنان – بصرفوا تعليماتهم بالريموت كنترول. شمال – شمال. يمين – يمين. واسامة عطا المنان قايل نفسو امين خزينة الاتحاد العام. شغالين لينا ب (الشيرنق) عشان كدا ما عندهم قرار – جمال الوالي ماسكهم من (شيرنقهم). الاتحاد العام لن يكون امامه غير ان يحسم الدوري الممتاز وكأس السودان والتأهيلي والسنترليق اضافة إلى مباريات المنتخب في خلال (40) يوماً. ليس امام الاتحاد العام غير (40) يوماً لانهاء الموسم الرياضي في السودان – والسبب في ذلك الضيق (سيكافا) التى اجلوا ليها الدوري. يوقفوا الدوري الممتاز عشان المريخ سجل ليه (13) لاعباً جديداً. وال (13) لاعباً محتاجون ليهم لي (سيكافا) مستعجلة كدا عشان يتجانسوا ويتفاهموا. ما معقول يدخلوا الدوري الممتاز الصعب دا بي (لوري) لاعبين جدد. ديل احسن يفكوا ليهم (خلعتهم) في سيكافا امام بنادير وعزام. ديل ما بجازفوا بيهم في الفاشر وكادوقلي ومدني. احسن اول حاجة يجربوهم في (سيكافا). معتصم جعفر لقى حالة المريخ صعبة – طوالي قام وقف الدوري الممتاز. المريخ سافر عشان يشارك في سيكافا. وقفوا الدوري لمن المريخ رجع ..واتضحت الرؤية. وبعد رجوع المريخ ادوهم (اسبوع) للاحتفالات والكلام الفارغ. والدوري واقف. دا كلو عشان شنو؟. عشان ناس مجدي عبداللطيف المسجلنو بي (اثر رجعي) داك يتجانس مع ناس بله جابر. عشان كورتهم كلها تمشي (الكشافات). ويبقى في تفاهم بين كشافات بله جابر ونجومية مجدي عبداللطيف. مجدي عبداللطيف عشان تسجيلو ما صاح مفروض لمن يفوز بنجومية المباراة تمنحوه (كيلو موز). دا بتسجيلو دا – كيلو موز كتير عليه. كفاية عليه ربع كيلو موز. وبفرح ليكم بي ذلك. كلام. نحن عشان الحركات دي. وعشان الاتحاد العام. وعشان مازدا بالتحديد ..قررنا أي مباراة في الولايات نفوز بيها بي تلاتة اهداف. بدينا ليك التلاتات من الفاشر. ومشينا ليك على الشمال. تلاتة في الفاشر. وتلاتة في عطبرة. اها كدا إن شاء الله يا مازدا الموضوع يكون وقع ليك. إن شاء الله الرسالة تكون وصلتكم يا ناس الاتحاد العام. باقى انتوا فهمكم تقيل. الحكاية بعد ما يكتبوها ليهم ما بفهموها. تلقى هسع مجدي شمس الدين بضرب لبتاع (الشيرنق) يقول ليه الجماعة ديل قاصدين شنو بالتلاتات دي. يكونوا ما فهموا (التلاتة) الاخيرة. لو فهموها ممكن ناس النيل الحصاحيصا يقدموا شكوى. وممكن الاتحاد بي (مريخيتو) دي ...يخلي ليك النيل الحصاحيصا يكسب الشكوى. اصلهم ناس الاتحاد العام ديل من بدري قالوا ما عاوزين فوز بي (تلاتة) اهداف. التلاتة بتجيب ليهم (نفسيات). عاملة ليهم (عقدة) رسمية كدا. وعشان عقدتكم دي ..نحن قررنا من الليلة ولي غادي – أي فريق نقابلو نضربو تلاتة. جوه الخرطوم أو بره العاصمة. تلاتة بس. إن شاء الله بعد دا تكون وقعت ليكم. بعد الكتابة دي – والوصف دا ..إن شاء الله تكونوا فهمتوها. تلاتة بي فهم كدا. عشان (الرد) يكون من نفس العمل. اقصد من نفس النتيجة. باقى أنا قلت ليكم زمان – نحن أي حاجة عندنا بي نظام. اصلو حاجاتنا دي ما فيها (صدفة). كلها منظمة ومرتبة – ومقصودة كمان. بس إن شاء الله بعد دا تكونوا فهمتوا حاجة. إن شاء الله بعد دا الموضوع يكون وقع ليكم. المحيرني والشيء الما قادر افهمو إلى الان (نيلسون) دا الخبرو شنو بالتلاتة. الفهمو منو؟. ناس بشه شفوت. بكونوا شرحوا ليه (التلاتة). عشان كدا وقعت ليه. وتلت لينا النتيجة. .......... ملحوظة : باقى تلاتة شندي..ونقفل على كدا. هوامش قالوا مازدا سأل من النتيجة. قالوا ليه تلاتة. قال ليهم لا – موش معقولة – دي حاجة فظيعة – دي حاجة مقصودة. ناس الهلال ديل قاصدنها. ما اصلهم قاصدنها يا مازدا – أول نحن من الصباح بنقول ليك في شنو؟. بعد كدا بس ركزوا لينا في شندي. عاوزين النقاط التلاتة من شندي. عشان نرفع القزاز. لو فاز الهلال إن شاء الله في شندي – مفروض كأس الممتاز دا تسلمونا ليه في مصفاة الجيلي, ما بننتظر بيه نوفمبر. بعد الانتصار في شندي إن شاء الله ..تسلمونا كاسنا طوالي. جماعتنا البغلبوا بي هدف. وبي الحكام ديل ...في روليت واحد ما تخلوهم معانا. ما فايقين ليهم. ما عندنا ليهم وقت. الهلال بقى صعب. بفوز في الفاشر تلاتة. وفي عطبرة تلاتة. وفي انتظار تلاتة شندي. قولوا يا رب. أنا شايف هدف الفاشر بتاع المريخ وهدف مدني ما محتاج ليه برهان. ولا عاوز ليه محسن سيد. نحن مواضيعنا دي – تلاتاتنا دي ...بي مساعد مدرب بنجيبها. بي عاكف عطا بس. والله يا عاكف طلعت ما ساهل. أنا خايف ناس الاتحاد العام يطلعوا ليهم قرار مستعجل. قرار اضافي...يقوموا يضموا ليك عاكف للبعثة المغادرة إلى الولاياتالمتحدة. ما عندكم طريقة يا مازدا – غير انكم تسفروا عاكف امريكا. لحقوه مبارك. .... عاجل : خلاص (أمل) المريخ اتبخر. وإن طال السفر - محمد عبد الماجد صحيفة قوون
