صاحب الخرفان لمن قال السعر.. (الخروف) في حد ذاتو نطه – اخد ليه نطة لي فوق الخروف وقت تشتريه – يمين مع (الرسوم) دي لو طلعت بالجلد ما قصرت ناس قناة النيلين ديل وقت ما بدفعوا (القروش) بخلونا نحول في (الطبق) ليه؟ قاعدين نحول في (الطبق) زي الشافع العاوزين يفطموه ...نشيل فيه من حتة لي حتة حسن تعسيمة – الايامات دي لا فاضي للمريخ ولا فاضي للهلال. قالوا ليه جمال سالم بلع لسانو. قال ليهم يكون حاشي اللسان طعمية. اصلو الزول دا ما ببلع لسانو ساكت. حسن تعسيمة الايامات دي باقى في رقبتو. الناس ارتاحو من (نقتو) الكتيرة. صاحبكم كان من الصباح قاعد ينق ليك تقول بالع ليه (مفرمة) ملوخية. ما مريح ليه زول. لكن هسع (اتبرم) شوية. ضعف وصحتو نزلت. ما عارف يتصرف كيف؟. قالوا ليه العيد يوم السبت. عشمان في (التأجيل). زولكم ما عارف يجيب (الخروف) من وين؟. قدر ما قعد يحسب فيها – ما قدر يطلع حق الخروف. قال لو اتعصر شديد بتمها ب (الموبايل). او بودي (المرا) لي اهلها. حسن تعسيمة اول يوم قال يطلع يعمل حملة استكشافية – يشوف اسعار الخرفان كيف؟. عشان يكون عارف اي حاجة. عشان ما يغشوه. زولكم مشى جبد ليه (خروف) مطرف كدا...وقال لبتاع الخرفان – اسمع الخروف دا بي كم؟. بتاع الخرفان قال ليه ياتو خروف فيهن؟. حسن تعسيمة غضب ليك من استفسار بتاع الخرفان – الزول وقت يكون ما عاوز يبيع بكون ظاهر. بعدين بتاعين الخرفان ديل ذاتهم (شفوت) بعرفو ليك الزول البشتري من الزول الما بشتري. عشان كدا بتاع الخرفان قال لي حسن تعسيمة بي طرف نخرتو : (ياتو خروف في الخرفان ديل). حسن تعسيمة قال ليه يعني لو قلت ليك الخروف اللابس نضارات داك – ح تفهم حاجة – عينك لي ماسك لي خروف في ايدي ..تقول لي ياتو خروف. تفتكر الخروف الماسكو دا عاوز اتصور معاه. بتاع الخرفان عاوز يختصرو ..قال ليه خروفك دا مليون و750 الف جنيه. صاحب الخرفان لمن قال السعر دا ..لمن (الخروف) في حد ذاتو نطه – اخد ليه نطة لي فوق. تتخيلوا حالة حسن تعسيمة تكون كيف؟. يا زول خبارو ب (مليون) و750 الف جنيه ..اصلو خروفك دا خريج الجامعة الامريكية. قاري بيطره. بعدين عليك الله الواحد لو دفع السعر دا – الضحية بكون منو؟. انا وإلّا الخروف. عامل عيونك ديل العاملات كدا زي (سويتر) البرد. وسيوتر البرد ما عندو اي علاقة بالموضوع دا. انتوا بتقطعوا لينا (اسعار) من رأسكم. حسن تعسيمة فك الخروف الاول ومسك ليه خروف (قليّل) كدا – وقال لبتاع الخرفان – اها والخروف دا سعرو كيف؟. بتاع الخرفان قال ليه مليون و 600 الف جنيه. يا زول انت خرفانك دي (شهادة عربية). ليه مليون و (600) الف جنيه ..نحن عاوزين نضحي بيه وإلّا عاوزين (نعقد) ليه. والله انت خرفانك غالية. بتاع الخرفان قال ليه خرفاني دي كلها (بلدية) ولحمتها رخوة كدا. حسن تعسيمة مسك ليه خروف تالت ..لو ما لابس ليك (نضارة) ما بتشوفو. وحسن تعسيمة ذاتو ..انتظر ليك الخروف دا لمن قال (باع) – عشان يتأكد يمكن يكون كديسة (معدلة) او (عتود) دبلوم عالي. احسن الواحد يتأكد. الخروف قال باع – حسن تعسيمة مشي عليه وقال لبتاع الخرفان – اسمع الخروف الما بشاف دا بي كم؟. بتاع الخرفان قال ليه ب (مليون) و300 الف جنيه. ليه يا اخوى ..انت خروفك دا في الاساس عاوز ليه (4) يشهدوا عليه. عاوز ليه (4) يثبتوا انو خروف. مليون و300 الف جنيه ليه؟. محترف هو. ودا عليك الله لو اشتريتو منك ...ح اسجلو بي اورنيك عادي وإلا اورنيك المحترفين. خروفك دا يا اخوى عندو (وكيل لاعبين). انتوا مالكم طيرتو الحكاية كدا؟. بتاع الخرفان قال ليه ابدا – والله الخروف دا لمن يصل مرحلة (الضبح) بنكون دافعين عليه (29) ايصال. يعني الخروف دا قبل ما ينضبح بتكونوا انتوا انضبحتو. الخروف الشايفو قدامك دا عليه (29) ايصالات رسوم. ناس المحلية عندهم دفتر كامل طالع قصاد الخروف دا. رسوم محلية – رسوم ترحيل – رسوم صحة – رسوم نفايات – رسوم دايات. ورسوم الدايات الدخلها هنا شنو؟. دخلتها الحالة العليكم دي. بتاع الخرفان شفق على (حسن تعسيمة) ولقى ليك ضغطو ارتفع وحالتو بقت (تلاتين عشرة). عشان كدا قال يخفف على الزول شوية. قال ليه تعرف الجماعة ديل ما فاضل ليهم في (الخروف) دا – إلا يطلعوا ليه (شهادة ميلاد) عشان يحاسبونا عليه بالساعة. ديل على باليمين الخروف الواقف قدامك دا عندهم فوقو اكتر ما عندنا فوقو. وانت ذاتك وقت تشتريه – يمين مع (الرسوم) دي لو طلعت بالجلد ما قصرت. زمان الواحد كان بسوّق ليه (جزار) عشان يضبح ليه. الجزار كان بشيل الجلد والرأس..وباقي الخروف بشيلو صاحب الخروف. الزول الاشتراه يعني. هسع صاحب الخروف بقى لو طلع ب (الجلد) براهو – ما قصر. بقى ما عندنا اي حاجة في الخروف. بس بندفع (الثمن)..ونطلع على ذلك. زي لمن تلاقى ليك زول في مطعم...تقوم تنزل ليه (5) طلبات. صاحبكم يضرب (الطلبات) كلها وقت يمشي للحساب يقولوا ليه خالص..الزول ابو شعر داك دفع ليك. طبعا ما في زول ابو صلعة بدفع. الغريبة كل الناس البتدفع الناس العندها شعر. عشان كدا مفروض اصحاب الصلع ديل يراجعوا موقفهم. ما يبقى دمهم بارد كدا. حسن تعسيمة بعد (المحاضرة) القوية السمعها دي من صاحب الخرفان ..مشي بطنو طامة. بطنو مقلوبة. نفسو مارقة من الدنيا. لاقتو ليك ام العيال في الباب ..قالت ليه اها ان شاءالله خير – مالك ما جبت الخروف؟. حسن تعسيمة اتفتح ليك فيها. قال ليها ..خروف شنو؟..السنة دي الخروف إلا نحصل عليه عبر التقديم للجامعات. السنة دي الخرفان دي ما بتتهبش. والله (الفول) رحمة. الفول دا عمرو ما غلط على زول. سمعتوا ليكم زول قالوا خنقتو فولة. سمعتوا ليكم زول جرحتو (فولة). اللحمة دي مشاكلها كتيرة. نحن ناس فول ساكت. بقينا على (الفول). حسن تعسيمة خلى الواطة عصرت شوية ..شال ليه مفك وزردية وطلع فوق رأس البيت. قال عاوز (يظبط) الطبق. الحاجة تحت قالت ليه قناة النيلين الليلة فيها شنو؟..عاوز تظبط ليها (الطبق) من بدري كدا. حسن تعسيمة عندو عراقي قديم ..ونضارة من (الاستقلال) ما غيرها ...قال ليها (نيلين) شنو يا حاجة ؟..انا عاوز (اظبط) الطبق لحاجة اكبر من كدا. الحاجة فاهمه ليك – قالت ليه عليك الله يا حسن تعسيمة انزل- ما تجيب لينا مشاكل ساكت. الناس ديل الايامات دي حايمين. وسمهم فاير. كمان يقولوا عاوز (تظبط) الطبق عشان تجيب الصادق المهدي. والصادق المهدي تاني ما بجي. حسن تعسيمة قال ليها الموضوع اكبر من كدا. وتعسيمة شغال – يلف في الطبق جنوب شرق البنك المركزي. يا زول انت عاوز تجيب شنو؟. يا ولية عاوز اجيب (الخروف). الولية قالت ليه لو (الخروف) بجي بالطريقة دي ..رجال الحلة ديل كلهم كانوا بكونوا الان فوق البيوت بظبطوا في الاطباق. الشيء المحيراني وما لاقي ليها فهامة. ما واقعة لي اصلو. ناس قناة النيلين ديل وقت ما بدفعوا (القروش) بخلونا نحول في (الطبق) ليه؟. قالوا ليك نحن ناقصين تحويل. وجعتو ايدينا ساكت. قاعدين نحول في (الطبق) زي الشافع العاوزين يفطموه ...نشيل فيه من حتة لي حتة. فترتونا ساكت. لو كنا عارفنها كدا – كنا (نتفنا) الطبق زي متوكل أحمد علي. ..... ملحوظة : الكورة كم؟..اقصد الخروف كم؟. هوامش الهلال يلعب غدا امام الاولاد. والخرطوم الوطني بقت زي الاهلي شندي دائما عاملة عنقاد للهلال. لذلك الحذر واجب. المريخ سوف يتجه نحو كادوقلي. لو عاوزين تكرموا المريخ يا ناس هلال الجبال ..شوفوا ليكم سلك التلفزة لي متوكل. عشان متوكل ينتف ليك السلك من الكهربة. بلا تلفزة – بلا كلام فارغ معاكم. التلفزة بي حالتها دي خلوها. بتوجعوا لينا رأسنا في الفاضي. ونحن بقينا الحاجات دي ما قاعدين نستحملها. ولا عندنا ليها صبر. ولا فايقين ليها. عليكم الله اتخارجوا لينا. خلونا مع (الخروف). الكورة السودانية دي قنعنا منها. غايتو خرفان الزمن دا طبعها غريب ..تقول قاعد تشرب عصير تفاح. مفلهمة جنس فلهمة. انا ما عارف الفلهمة على شنو؟. ان شاءالله تجي مطرة. عشان نشوف فصاحتكم دي حدها وين؟. السنة كلها تتفاصحو. ........ عاجل : الخروف السنة دي كلو (مرارة). وإن طال السفر - محمد عبد الماجد صحيفة قوون
