برضو وقعت فوق خبرن زي الزفت.. الخبر جايي من تالا أمريكا.. أصلها أمريكا دي.. إن ما قلبت الواطا وقوّمت القيامة لوموني.. وبعدين ماها ساعلة ومافي زول قادر يسعلا واللاّ يلوما ساكت!.. وأنا من هنا بقول لها يا أمريكا النضم دا عيب الدنيا دي فيها ناس قاعدين معاكي فيها يا بت الناس وانتي يا أمريكا مشتحة فوق الكرة الأرضية كراع في الشرق وكراع في الغرب وتصوطي؟ خسمتك بالذي خلقك تخلي الهباشة والشلاقة والكعوبية وتقعدي في واطة الله دي.. حسي كدي عايني لنا نحن ديل.. ساكتين! خشُمنا وعندنا الواحد فينا يقوم من الصباح ويباري الحيطة لحدي بكان شغلو ويرجع في الليل أهلو ويقفل عليهو بابو وتاني يوم نفس المشوار وكان نلقى طريقة نمشي جوا الحيطة لحدي ما سيد الوداعة ياخد وداعتو أبداً سمعتي يوم زول لامنا ليكي ساكت؟.. نحن حكومتنا دي ما قاعدة تلومنا ومبسوطة مننا.. حسي اللسعار دي تراها ماشة لي فوق بي وشيها مافينا زول نضم، الخمسة فوق الاتنين!.. إن زول أكلنا ما بنلومو.. وعارفين السترة والفضيحة متباريات.. وعندنا الفضيحة شايلة السترة فوق ضهرها وحايمة بيها.. تلومينا أنتي براكي بلا سبب! وتحرشي الناس يلومونا.. الأيام دي طالقة ليكي علماء يصوطو ويجوطو في الدنيا دي لحدي ما يوم يجيبو لينا نصيبة تودينا كلنا في ستين داهية.. سمعت إنهم قاعدين يسوو في جينات صناعية.. جينات صناعية عشان يسوو مخلوق صناعي.. نحن عارفين شفرة خلق الله دي كلها ياها الجينات دي!. يا عاجبلكم! نضم قدر دا بي نعرفو.. انتو مشيتو عليها وبقيتو تلخبتو فيها.. ودايرين تسوو مخلوق راسو عديل كدي؟.. النضم دا بعدين بجيب لوم.. ولوم كبير.. أها نفرض في شغلتكم دي قمتو غلطو غلطة صغيرونة.. والمخلوق دا فلت من إيديكم.. ومرق على السهلة.. وبدأ يقتل وياكل في خلق الله لا يخلي زول لا شُدرة.. لا كديسة لا فار.. لا حمار.. أها بعدين شن الراي؟.. انتو باقي لي ناوين تسولينا المسيح الدجال "مع إني لي قريب دا كنت قايل الموبايل ياهو المسيح الدجال".. واللاّ تسوو لينا الدابة القالو بتجي آخر الزمن.. الدابة القالو بتمرق من الواطة وتقعد تساكك في الناس.. والناس جارية كحت قدامها لحدي ما القيامة تقوم.. وأنا باقي لي الدابة ياكي انتي أمريكا دي.. غايتو يا أمريكا أنا بنده الله ورسلو.. وبركة الشيخ الجعلي وسيدي الحسن وبركة ود أم مريوم.. وحامد أبعصا وود حسونة.. والمكاشفي.. وصايم ديمة.. والصابونابي.. والكباشي.. وراجل الزريبة.. وبلاّع الرجال.. ونضّام اللحم في الدكّة.. وشيخي فتاح العمايا أب دقنن ضوايا.. ربنا يهديكي يا هادي أمريكا وتخلي البتسوي فيهو دا!! د. عادل الصادق مكي الباب البجيب الريح- صحيفة اليوم التالي
