* سبقني الحبيب تكعيب هيثم كابو للتطرق إلى حرب البيانات الشرسة التي اندلعت في ديار الوصيف خلال الأيام الماضية! * البيانات هينة يا كابو، المصيبة في المسيرات والاعتصامات ومحاولات اعتلاء أبراج الكشافات! * مطلوب من الشرطة حراسة أبراج المعبرة هذه الأيام! * لو رفض كردنة إعادة البرنس فقد تحدث كارثة! * كذلك ننصح قوات الدفاع المدني بقص فروع الأشجار المجاورة لموقف أم بدة! * بيانات روابط الوصيف وتحركاتها أصبحت أخطر من بيانات وتحركات حركة داعش! * يوم أمس الأول استقبلت دار الكاردينال مسيرتين ليليتين! * واحدة مضادة للدروع، أقصد للبرنس، والأخرى مؤيدة له! * كردنة ما قصر! * خاطب المسيرتين! * سمعت خطابه لجماعة أبو سياف.. أقصد جماعة مولانا ماجد ولم أفهم منه شيئاً! * الحكاية طبعاً يا كابو ما وقفت علي البيانات! * هناك لافتات ضخمة وأعلام بكل الأشكال والأحجام! * أمس قرأت لافتة تحوي صورة هيثم وعبارة (أعيدوا الروح للجسد)! * يعني يا كابو الهلال ده في السنتين المضوا كان عايش بدون روح؟ * يا أنة المجروح.. ويا روح ما بعدك روح! * أتاريهو عنتر قاعد سنتين جسد بدون روح يا هيثم؟ * يعني لما كتلنا عنتر بالتلاتة كان عدمان الروح؟ * عنترهم أصلو ده مات كم مرة؟ * كردنة خطب في جماعة قائلاً: (الأمر ده يتم وللا ما يتم، وحا يكون قرارانا وفق اجتماع نحن حا نعلمو.. الكلام الانتو بتعلموهو وللا هم بعملوهو كلام أعتقد أنو هو ظاهرة صحية.. انتو موالين لي هيثم أو هم ضد هيثم، أي حاجة في الدنيا دي عندها السلبي والإيجابي، يبقى القرار النحن نتحمل مسئوليتو كمجلس منتخب وفق رؤيتنا نحن مع مراعاة كل شيء نحن ممكن وتاريخ الهلال، يبقى هيثم يرجع وللا ما يرجع لا كبلو لا إنت يا مولانا لا الناس الجوا مع كبلو ولا انتوا الجيتوا مع المجموعة دي، بكرر شكري ليكم ومطالبكم وصلت)! * غايتو كبلو ما بعرفو، وماجد ما عارف فهم وللا لا.. لكن أنا شخصياً ما فهمت من كلام كردنة أي حاجة! * كان فهمت حاجة يا كابو كلمني! * كردنة ده مع عودة الروح للجسد أم مع خروج الروح من جسد عنتر الكتلو أيمن؟ * خطاب كردنة ما في زول بفك شفرتو إلا سعاد سادومبا! * بانت سعاد فقلبي اليوم متبول! * نحنا كنا فاكرين إنو الهلال مسيطرة عليه المستشارة فطومة، طلع الفيلم كلو في يد سعاد سادومبا!! * سادومبا قالت ما بتعترف بالرابطة المركزية! * وقالت إنها ذكرت رأيها في كبلو من قبل! * ألحقنا بي بيان سادومبا الأول سريع يا كابو.. ما قريناهو! * يبدو أن هناك تعتيم إعلامي مقصود على بيانات سعاد سادمبا! * المريخاب مشغولين بإعادة الطاهر سادومبا والهلال مشغول ببيانات سعاد سادومبا!! * الجماعة عايزين يرجعوا هيثم عشان يحل ليهم مشكلة صناعة اللعب.. حلّ الرابطة المركزية! * نناشد البرنس أن يعيد معه القيصر والمعلم وديدا! * المساكين ديل مافي رابطة واحدة عملت ليهم مسيرة! * ولا سادومبا طلعت ليهم بيان! * ولا زول رفع ليهم لافتة! * مطلوب من سادومبا وبقية الروابط المتناحرة في ديار الوصيف إصدار بيان مساند للمعز رمز العز! * ديدا قال عندو مؤتمر صحفي! * يا كابو مؤتمر خليفة متين؟ * هاليفا ده باين عليهو راقد ليهو فوق بيان! * على صحف الهلال ألا تغفل نشر بيانات ديدا وهاليفا والقيصر! * وما صاح منكم يا الرشيد تعتموا علي بيانات سعاد سادومبا! * هل للناطقة الرسمية أي يد في إخفاء بيانات سادومبا؟ * كان جرايد الوصيف رفضت نشر بيانات سعاد سادومبا فنحن أولى بها! * بيانات سعاد سادومبا في الهلال أقوى من بيانات سعاد الفاتح في البرلمان! آخر الحقائق * العرضة الشمالية أصبحت أخطر من دير الزور والقامشلي وريفي حلب وغربي إدلب!! * لا نستبعد صدور بيان جديد من (جماعة النصرة الهلالية) في موضوع عودة هيثم للوصيف! * هناك إرهاصات بخروج مسيرة مساندة لهيثم من (جماعة أنصار البرنس)! * ومن المتوقع أن تصدر (جماعة جيش البرير) بياناً تستنكر فيه محاولات إعادة البرنس! * ما نعلمه أن بيان (الجيش الوصيفابي الحر) ما زال تحت الطبع! * الخوف كل الخوف من بيانات (جبهة صقور الوصيف، ولواء البرنس، وجيش المعلم الصغير، والجبهة المهندية الوصيفابية)! * كذلك لا نستبعد صدور بيان معارض من تنظيم (جبهة حركة أحرار ديدا) المساندة لعودة المعز! * لا أحد يستطيع إغفال بيانات (تجمع أنصار الأرباب) طبعاً! * أخطر البيانات سيصدر من (وحدات حماية هاليفا)!! * هناك لافتة حملت عبارة (أعيدوا الروح للجسد)! * ولافتة أخرى حملت عبارة (عودة هيثم تعني أدب وقيم الهلال)! * اللافتة دي بالذات ما مقبولة نهائي! * لافتة مسيئة للنادي الكبير! * يعني كردنة لو ما رجّع هيثم أدب الهلال وقيمه ما حا ترجع؟ * هناك لافتة ثالثة حملت عبارة (أعيدوا للهلال رونقه)! * يعني الهلال ده ليهو سنتين لا روح لا رونق؟ * سنتين رونقكم معانا ونحن ما عارفين؟ * طيب نحن الرونق ده عندنا شكوى ضدو! * طالبنو 250 مليون وغرامات إضافية! * الرونق قبض مننا القروش وأبى يلعب لينا! * قال مصاب، عمركم شفتوا ليكم رونق مصاب؟ * سنة كاملة ما ورانا أي رونق! * عشان كدة نحن زعلنا واشتكينا الرونق للاتحاد! * الاتحاد طنشنا ستة شهور ورفض يعاقب الرونق! * آخر حاجة كون لجنة ثلاثية للبت في شكوى الزعيم ضد الرونق!! * يا ريت سعاد سادومبا تورينا رأيها شنو في حكاية الرونق دي! * في رونق الصبح الجميل.. قوم يا حمام.. حيي الغمام! * أمس سجل الهلال أربعة محترفين أجانب رونق كل واحد فيهم أضعف من التاني!! * لو سجل جمعة جيطارو وأتير الغرام الوصيف حا يبقى عندو عشرة روانق أجنبية!! * الموسم القادم الأزرق حا يكتسب رونق الأمم المتحدة!! * المصيبة بعد الروانق دي كلها يحافظ على مركز الوصيف ويحتضن الصفر المخيف!! * آخر خبر: انتهى البيان! مزمل ابو القاسم - كبد الحقيقة صحيفة الصدى
