لما آخر مَرّة زُرتَك وفى دواخلى الشّوق بِنَادى كُنت فَاكِر إنّى ألقَاك فى عيونك ريدى بَادِى إلّا جِيت وَلْقِيتُو قلبَكْ خَتّ موضوع ريدنا غَادِى *** إنتَ زهرة أُقحُوانة والخديد ريَان ونادى لو يمسّى الليل عليها أو يَجِيها نَسِيمُو هادى تَسمُو فى عَالَمْ جميلْ ابداع خيالى وماْ اعتيادى *** يا حلاة البسمة فيكَ يا زَهَر فَتّح يدابو نِحنَ مُشْتاقين نَجِيكَ والقليب تصبيرنا سَابُو راحْ يَفتّش عن عينيكَ فى اللّى جايين واللّى غَابُو *** الوداع يا غالي مُر مَذَاقو للروح والعيون يَعذّب القلبْ الرّهيف يَصْلِيهو بالشوقْ والشجون والفُراق قاسى وصَعِيب لو بالسفر أو بالمَنُون *** كان مُناى يا سالى نحيا فى دنيا ماليها الحنان لا مآسى نقاسى فيها ولا خصومة مع الزمان والأمل هسّه الفَضَل نتلاقى فى عالى الجِنَان ____________________________________________ قصيدة: أحلى الأمانى تأليف المهندس/ إبراهيم عيسى البيقاوى 1979م يعنى تسأل عن ظروفنا بعدما اتنكرت فعلاً شِن بجيب جواب سؤالك إلّا أهلاً بيك وسهلاً *** نِحنَ يا غالى المحبّة خلّتنا نتحاشى الملامة مهما تعقِد لجبينك ليكْ نَفِرْ أحلى ابتسامة حليلا أيامنا الجميلة حليل أغاريدا وكلاما ما خلاص شَقّيت طريقك وقُلْتَ لينا مع السلامة *** نِحْنَ مِنْ يوم ما افترقنا ربّنا القادر حمانا لا المآسى نقاسى فيها ولا قلوبنا مُعَذّبانا عِشْنَا فى قلوبنا القناعة نسينا أيامك معانا واصبحت أحلى الامانى جميلة بِتْظَلِّل سمانا *** نِحْنَ ما أرواحنا طَيْبَة لا بْنَسِيبك لا بْنَخَاصْمَك ولَو تَطُول بينَاتْنَا مُدّة نَبْقَى نَشْتَاق لكلامك طَالَما اتْنَكّرْتَ إنْتَ والحبيب واقف امامك أبقى حَاسِبْ لظروفك ومَا بَكتّرْ فى ملامك قصيدة: موضوع ريدنا تأليف المهندس/ إبراهيم عيسى البيقاوى 1980م