الفكي (داؤود) زول (بصير) بيعالج الفكك والرضخ والملخ ويجبر الكسور ..وطول عمرو ما بيقصر مع زول ...لو في شافع عضتو (عقرب) فكي داؤود بطلع السم ويزيل الألم..لو في مزراع عضاهو (دبيب) فكي داؤود بيجي عندو لحدي البيت ويعالجو.. ولو في ولد اتعوق في الكورة.. وفكا (كراعو)..الجماعة بيجوا شايلنو لفكي داؤود عشان يرجع (الفكك)..وفكي داؤود ما بشيل بياض من زول..لكن الدنيا غدارة ..فكي داؤود بقى (عيااان).. شرب (قرض) ما نفع!! شرب (حلبة) ما نفعت!! مسّح بطنو بي(قطران) وبرضو ما نفع..التايه جابت ليهو موية (جردقة) .. وعطرون وكلو ما نفع!! التاية ما خلت (محريب) ولا (سنا مكة) ولا أي شئ..لكن بطنو دي فيها حاجة..بس هي شنو ما معروفة ! التايه مرتو ساقتو بالحمارة للشفخانة.. وعوضين (التمرجي) قال ليهم (يمكن تكون زائدة!) ..و (فاطنة بت جار النبي) حلفت وجزمت وقالت دا (استسقاء) عديييل.. زي الجاء لراجلا زمان وكتلو!! و حاجة (التاية) خافت ودموعها جرن زي سيول (صالحة).. قامت باعت (غويشتا) الوحيدة وقالت لازم نمشي الخرطوم للعلاج.. وجات الخرطوم مع فكي داؤود..ومن عيادة لعيادة.. ومن دكتور لي دكتور.. ومن بص لركشة.. القروش المعاها كملن جت وما فضل ليها ولا جنيه!!..اصلو المواصلات غالية والدكاترة (تذكرتهم غالية)..والدواء ذاتو غالي.. الحكيم كتب ليهم دواء سعرو أكتر من 2 مليون جنيه (بالقديم).. وهي ما عندها ولا حتى مية جنيه !! تعمل شنو؟ تسوي شنو ؟!! و فكي داؤود راقد في الاسبتاليه لا بيجر إيد لا كراع..لا بياكل ولا بيشرب.. ولا بنوم زي الناس .. اها اليوم داك (التايه) كانت قاعدة تتونس مع بخيتة (ست الشاي) الفي (شارع الحوادث) تفضفض معاها.. وكان في ولد (نجيض) إسمو (صالح) لابس ليهو بنطلون وقميص اخدراني.. لكن قلبو أبيض..وكان قاعد يشرب ليهو في شاي ويتصنت ساااي لنضمي التايه ..اها فجأة كدي قام قال ليها يا (خالة) زولكم العياااان راقد في ياتو عنبر؟ واسمو منو؟ قالت ليهو يا وليدي دا ما فكي داؤود ..انت ما بتعرف فكي داؤود ابو اسحاق البيلعب معاكم الكورة؟! قال ليها والله يا خالتي ما بعرفو..لكن بمشي بشوف عمنا (داؤود).. (صالح) الولد الظريف ضرب تلفون لي كم نفر كدا وبعد شوية جووا ولدين وتلاتة بنات..ومشى معاهم عنبر الباطنية..وشافو داؤود.. اها من دربم داك مشوا قابلوا الدكتور وسألوهو عن (حالة) فكي داؤود ووالأدوية والعلاجات والاورشتة..وفي أقل من (نص) ساعة مشوا جابوا (الدواء) وجووا.. وجابوا كيس (فواكه) مليان بركتان السرور يا يمة وكمان فيهو جوافة وليمون وموز.. وعصروا لحاجة التاية 200 ألف في يدها.. وفكي داؤود شرب الدواء واكل ليهو حبة (جوافة) وفتح عيونو ،،الحمد لله,, وشم ريحة العافية.. وقال (للتاية) بصوت ضعيييف بدور أصلي المغرب..جيبي لي (التبروقة)! لكن قبال أتوضأ انا عاوز احكي ليك حاجة..أنا حلمت بالملائكة جوووني وجابو لي الدواء ..وحلمت اني في الجنة باكل ساااي في موز وعنب وتفاح وجوافة..(التاية) غزت كوعها في نصها وعاينت ليهو وقالت ليهو يا ابو اسحاق الملائكة جووك وجابوا ليك (الدواء) وكمان جابو ليك الكيس المليااااان جوافة دا !! إنهم شباب شارع الحوادث..بلسم للتايه واسحاق وبرهووومة وفاطنة وامووونة ولكل طفل فقير ما لاقي حق الدواء..وما قادر يحصل حق الكشف ..ولا حتى حق المواصلات..تلفوناتهم 249910099100+ 249908815009+