من حقك كإنسانة مثقفة (عصرية) يكون عندك صفحة في (الفسيبوك) أو أي موقع آخر من مواقع التواصل الاجتماعي.. ومن حقك تكتبي خواطرك وانطباعاتك والأشياء التي تشغل تفكيرك وتثير اهتماماتك ك(أنثى) .. ومن حقك اختيار نوعية (اصدقائك) في الفيسبوك.. ومن حقك أيضا التعليق على مواضيع الآخرين والتعبير عن رأيك بحرية تامة .. ومن حقك ترفضي أي (طلب صداقة) من شخص (مريب) أو (غريب)، أو من شخص (صفحته الشخصية) تحتوي على اشتراك او انضمام لقروووبات أو صفحات (خليعة) أو (خادشة) للحياء العام .. ومن حقك (حظر Block) أي شخص تجاوز معاك حدود (الأدب) و(اللياقة).. أو حتى حاول يتدخل في (خصوصياتك) .. بس في حاجة (مهمة) عايزاك تنتبهي ليها ألا وهي ال (Chat) ورسائل (الدردشة).. وانتبهي لنفسك شديد واوعاك لو اي شخص (ولد او حتى بنت) طلب منك تتصوري وترسلي ليهو (صورك).. لانو في أولاد كتاااار منتحلين (أسماء بنات).. وبرضو في بنات (منتحلات شخصيات اولاد)..وأي (واحد) رسل ليك (صور مشخلعة) اوعاك تفتحيها واحظريهو (على طول)..وأوعاك ترسلي (إيميلك الخاص) لأي زول لأنو يا إما حيبتزك ويزعجك بكترة المراسلات أو يهكر ليك (حسابك) أو يتجسس عليك من خلال اختراق (ايميلك) ..وكمان أوعاك تشغلي (الكام) إلا مع صديقاتك الموثوقات البتعريفهم في الحياة (الواقعية) وليس في (العالم الاسفيري).. برضو عايزة أذكرك بإنو في (أولاد) بيضعوا في بروفايلاتهم (صور وسيمة) ومنتهى (الوجاهة) ...وهي أصلا ما (حقتو) وسارقها...وفي شخصيات (منتحلة) صفحات (مشاهير) ونجوم مجتمع (فنانين ومذيعين واعلاميين وممثلين ونجوم كورة) وديل احذريهم شديد وابتعدي عنهم..ولو إنتي معجبة ب (فنان) معين وتأكدتي من حقيقة صفحته في (الفيس) خلي علاقتك معاهو في حدود (الاعجاب) وبس.. وما تخدعي نفسك لو اتجاوب معاك إنو (بحبك) وبمووووت فيك..دا (شرك) ومصيدة بس ما أكتر لجرك نحو (الرزيلة)...كمان في ناس مجرمين وما عندهم اخلاق ولا ضمير بحبوا يبتزوا (البنات) بالصور وخاصة لو قدر يتحصل عليها منك إنتي (شخصيا) بحجة (الحب) أو التعارف أو الاعجاب أو الصداقة .. أو لو اتحصل على (صورك الخاصة) في أوضاع ما (مظبوطة) ومحرجة ومخجلة..!!! ولو رسلتي صورك الخاصة لزول في الفيس (الله قال بي قولك) حيبقى ليك (بمبي) ويخلي أيامك (كُحلي) وحيضيع سمعتك .. وينزل (رأس) أهلك في التراب،،، وما بعيد يبتزاك ،،ويمكن يطلب منك (قروش) أو يطلب منك تلاقيهو (face 2 face) !! وأوعاك تدقسي وتدي أي واحد رقم (موبايلك) حتى لو رسل ليك ايميلو ورقمو بحجة إنو عايز يضيفك في الواتس أب (what's up) .. حيبقى ليك (بمبي) وتكرهي حياتك.. وتكرهي اليوم الاخترعو فيهو الواتس اب والفيسبوك كمان !! وعايزة كمان اقول ليك إنو في (شباب) عايشين في حالة (تصحر عاطفي).. و(جفاف وجداني) وانطوائيين وعايشين في عزلة ..وعايزين يتواصلوا مع (البنات) ويتسلوا تحت مبرر (شراب) الفيسبوك بيروي العطشان وبيربطك بالسودان .. وبخليك في أمن وأمان..ديل ذئاب بشرية اعملي حسابك منهم شديد ياختي!!! وقبل ما أختم كلامي ليك عايزة أحكي ليك قصة حقيقية مقتطفة من دفاتر (الشرطة) وقعت (ضحيتها) طالبة ثانوي..وبدأت القصة بي طلب( صداقة) قدمو أحد (خبثاء) الفيس بوك للطالبة (الغبيانة) ..وبعد الموافقة على (الصداقة) بدأ يهزر معاها و(يخفف دمو) ويشيل ويرسل ليها في (الزهور) ومقاطع (الاغاني) .. وتهاني (العيد).. وصباح الخير .. ومساء الخير .. وكيفك ؟ وين ماظاهرة..؟؟!! وأنا (معجب) بكتاباتك وأنا قصدي (شريف ).. و(ممكن اتعرف عليك أكتر) .. وطبعا هو من خلال (البروفايل) حقها والصور عرف إنها (بت ناس) من الأثرياء ..المهم قدر برسائله (الغرامية) وكلماته(المعسولة) يدوخها.. وقدر يقنعها إنو بحبها وبمووت (فيها)... طبعا هو خاتي (صورة) زول (وسيم) سارقها من الفيس (ودي كمان مصيبه تانية)!! المشكلة إنو الطالبة (المراهقة) صدقت ..وعاشت (وهم الحب) ..وبعد مكالمات طويلة أقنعها إنو مرتاح..وإنو هو (ود عزّ) وأبوهو عندو شركة طيران.. وصور البروفايل حقتو بتقول إنو كل يوم في بلد(لندن. تركيا. كينيا..الامارات..مصر) المهم طلب منها صور خاصه بحجة إنو هو خارج ( السودان) وماحايقدر يشوفها قريب وإنو حايموت شوقا وهياماً... و(المسكينة) رسلت ليهو صور بالبجامة..وصور بالشورت.. وإتدرج معاها لغاية صور شبه عارية .. وبعد أن تمكن من جمع حصيلة كبيرة من الصور (الخاصه جدا) . طلب منها (مبلغ 2 مليون جنيه) سلف.. وهي المسكينة قامت أدتو القروش بكل براءة وحسن نية... تاني طلب منها( 5 مليون).. إعتذرت لأنو ماعندها.. فقال ليها إتصرفي.. إنتي مرتاحه!! . وقام هددها بالصور يرسلا لي أصحابها وقريباتها الموجودين في( الفيس)... طبعا هو أضاففهم لأنو (صديق مشترك) . البت من جاي جاي دبرت القروش وحولتا ليهو . بعد إسبوعين طلب منها تاني 15 مليون جنيه.. فبكت وقالت ليهو دي حاجيبها ليك من وين؟ قال ليها أسرقيها من (أبوك) بيعي (دهب) من حق (أمك).. أحسن ليك من فضيحة مجلجلة .. بعد البكاء الحار نزل صورة ليها في صفحتها على سبيل الدعاية والتهديد والتخويف بس صورة عادية ..(الطالبة المسكينة) خافت .. وبسرعة اتصرفت وسرقت (غوايش) من دهب (أمها) وباعتهم ورسلت ليهو القروش عن طريق (حوالة بنكية).. طبعا الحبشية المسكينة الشغاله معاهم إتسجنت بسبب اتهامها بالسرقه دي بإعتبار إنها( مدانة) حتى وإن أثبت التحقيق براءتها.. آخر طلب منو كان إنو تجيب ليهو مستندات وأوراق (البيت) ليهو بإعتباره عندو (صفقة) تجارية مع بنك يخت الورق ضمان بس .. المهم لما حست إنو الخسيس دا حايبيع (بيتهم) إتوكلت على الله وقعدت مع أبوها وأمها وحكت ليهم كل حاجه . أهلها طوالي فتحوا بلاغ طلع رقموا غير مسجل في شركة الاتصالات... المهم أخوها إستعان بخبراء (حاسوب) و(هاكرز) قدروا يحددوا مكانوا وإتقبض وإتحاكم وربنا ستر لغاية هنا...!!! لذلك ما تفتكري إنو الفيسبوك أو الواتس أب مجردة وسيلة (تسلية) ، وتقضية الوقت ..وقتل الفراغ.. الفيسبوك زيو وزي (المجتمع) فيهو الصالح وفيهو الطالح..فيهو الشريف والعفيف والنظيف وفيهو الحرامي والكضاب والغشاش..فيهو المثقف والواعي والمناضل.. وفيهو النصابين والمحتالين والمبتزين وعديمي الضمير..وفيهو مدمني (الاجرام).. بس للأسف فئة الغشاشين والكذابين والمحتالين كتااار لكن بس ما ظاهرين ولا معروفين لكل الناس..عشان كدا انتبهي قبل ما الفأس تقع في الرأس وقبل ما شرف (العيلة) في التراب ينداس !!!