عثمان ود ابو مرين اشتغل 15 سنة سواق في رئاسة مشروع زراعي عام..يوم واحد ما عمل مخالفة ولا صدم ليهو زول ولا ضرب ليهو غنماية ولا طقش ليهو عمود كهرباء ..وفجأة وبدون سبب جاهو خطاب من رئيسه المباشر بالعمل يفيده بالاستغناء عن خدماته الجليلة..عثمان انصدم وركبو الهم.. هو لا زول زراعة ولا زول تجارة وما بعرف غير السواقة ..وهو يادوب وصل ال 42 سنة وعندو وليدات وبنيات في المدارس والجامعات ..عثمان ما عارف يسوي شنو ولا يعمل شنو !! الجماعة قالوا ليهو ياخ شوف ليك زول (واصل) يتوسط ليك عشان يرجعوك شغلك.. وعثمان بسبب العطالة والفلس قام فتش ليهو كم واسطة كدا بس تعبو راح فشوش..واي واحد يوعدو بالمساعدة الا الحال ياهو الحال !! ومن يوم ما وقفوهو من الشغل سبعة شهور ما ادوهو حقوقو وكل يوم امشي وتعال امشي وتعال وهو طالع ونازل في الفاضي..واسياد الدكانين اكلوا لحمو من كترة الديون..ولوما ود اخوهو العايش في السعودية برسل ليهو من وكت للتاني شوية مصاريف.. عثمان واولادو كان ماتوا من الجوع والمرض لكن الله كريم .. اها في يوم هو قاعد في طرف الحلة شاف ليهو لاندكروز وحلان في الطين ..مشى عليهو في شان يساعد الجماعة يطلعوا العربية من الوحل..ومشى دافر وعافر مع الجماعة لكن العربية ابت تب ما تطلع من الوحل!! عثمان قال للسواق كدي يا ولدي انزل لي انا بمرق ليك العربية دي من الطين .. وركب عثمان في العربية وبعد دقيقتين بس وبدون دفرة عثمان مرق بالعربية زي الصاروخ من الطين ووقفها بعيد في حتة كويسة .. اها العربية طلعت حقت وزير ولائي انبسط واتكيف شديد من عثمان وقال ليهو دا كرتي .. تعال لي ضروري بعد باكر في الوزارة .. وعثمان اتوكل على الله وشال كرتو ومشى قابل المسئول ..المسئول اول ما شافو قال ليهو انت من يوم الليلة السواق الخصوصي حقي رايك شنو ؟ عثمان قال ليهو والله يا سعادتك انا ما عندي اي مانع ..وتاني يوم عثمان استلم شغلو وبقى شغال سواق معالي الوزير .. وطالع ونازل مع الوزير .. اها في يوم عثمان قال للوزير يا سعادتك انا عايز استاذن منك امشي لي مشوار خاص!! الوزير قال ليهو مشوار شنو الخاص دا ؟ عثمان قال ليهو ماشي لي بنتي في الداخلية اديها المصاريف حقات الجامعة ..سعادة الوزير قال ليهو خلاص انا اصلا طالع مشوار وصلني وبعدين امشي مشوراك ..عثمان نفذ التعليمات بالحرف الواحد .. اها مرة عثمان ماشي مع سعادة الوزير في الشارع وفجاة شاف بنته الجامعية واقفة منتظرة المواصلات .. قال للوزير سعادتك دي بنتي ممكن انزل اوقف ليها امجاد او ركشة في شان تصل الجامعة ؟ الوزير قال ليهو ما دام هي بنتك خليها تركب نوصلها الجامعة .. وفعلا عثمان وقف وقال للبنية اركبي والبنت لما شافت عربية الوزير اتخلعت واتهجمت ..بس لما شافت ابوها سائق العربية اطمانت وركبت .. الوزير مما شاف البنية سمحة وصغيرة 60 عفريت ركبو راسو وبدأ يفكر فيها ليل نهار.. بعد شهر كدي قال لي عثمان يا عثمان انا متكيف منك شديد ومبسوط من شغلك وعايز اكرمك واستر بنتك دي.. واناسبك اها رايك شنو ؟ عثمان زي الصبت فوقو مطرة اتهجم واتبكم وما عرف يرد من المفاجاة..!! معقول وزير بي مرتو واولادو يعرس بنت قدر واحدة من اصغر بناتو ..وبعد شوية كدا قال للوزير :هي دي لكن ما صغيرونة وقدر بنتاك !! الوزير قال ليهو: الزواج ما عيب وربنا حلل للراجل اربعة نسوان..وانا راجل مقتدر احمد الله.. وبقدر بفتح بدل البيت عشرة بيوت..اها شن قولك ؟ عثمان قال ليهو يا سعادتك الزواج سترة وصلحة وما دام زواج على سنة الله ورسوله خليني اشاور البنية وامها وان شاء الله خير! بعد يومين عثمان كلم البنت وامها .. الام على طول قالت موافقة لكن البنية حرنت تب وطنطنت وقالت ليهو لكن دا يا ابوي دا زول عجوز واكبر مني ومنك !! ابوها لطشها كف وقال ليها ما دام راجل ومقتدر ما اظن عندو عوجة .. وكبير ولا صغير ما فارقة المهم يسترك ويصونك بالحلال ..وبعدين دا وزير يا غبيانة..في بنت بترفض تعرس ليها وزير مليان قروش وعندو شركات وعمارات ومزارع ودكاكين وبقالات زي الرز؟! المهم بعد تعب البنية وافقت .. اها عثمان مشى لمعالي الوزير وقال ليهو البنت موافقة وربنا يتمو على خير !! الوزير قال ليهو: طبعا يا عثمان انت مننا ولينا وعارف زوجتي واولادي وبناتي وعارف وظيفتي حساسة ومنصبي في الحزب خطير وحساس وما بحمل اي كلام كدا ولا كدا ! عثمان اندهش وقال ليهو : صاح يا رئيس بس ماني فاهم قصدك شنو ؟ قال ليهو: انا حاتزوج البنت عرفي على كتاب الله ورسوله وبي شهود وحاسجل ليها بيت باسمها واعمل ليها حساب في البنك وبدفع ليها كل رسوم الجامعة كاملة مقدما ومؤخر الصداق والمهر 30 مليون جنيه بس خلي الموضوع سر بيني وبينكم وبس ومافي حد يعرف وخصوصا اولادي.. عثمان بسبب ظروفو وخوفو من الوزير وافق وتم الزواج .. وبعد سنة امنة بت عثمان حملت.. وتعبت شديد..قربت تموت.. وابوها وامها شالوها ودوها الاسبتالية .. وهناك ولدت وجابت ليها بنت زي القمر .. اها لما جوا يطلعوا الشهادة للمولودة الجديدة ناس المواليد والشهادات طلبوا قسيمة الزواج وبطاقة الاب عشان اجراءات تحرير شهادة الميلاد.. عثمان ضرب للوزير كلمو بالحاصل والوزير قال ليهو اديني الزول الشغال في المكتب دا .. الزول مسك سماعة التلفون وقال ليهو تمام يا افندم.. تمام يا سعادتك.. وطلعوا شهادة ميلاد باسم زول تاني وليس اسم الوزير الاب الحقيقي للبنت!!!ولما عمنا عثمان شاف الشهادة وقع كضم ولي يوم الليلة ما قام ..جاهو شلل!
