واحد قال لي باعوا كلوزيوم قلت ليهو يعني شنو؟؟؟ ما الوطنية اتباعت زماااااااان الوطنية باعوها من زمن الفيلم الهندي فيهو سطاشر اغنية باعوها من زمن السينما بتشتغل دورين باعوها بدري ايها الناس عزام اتمرن امس في ملعب امتداد ناصر مربع عشرة طبعاً حاتقولوا لي منو الوراهم الملعب ده ؟؟ اقول ليكم في تنزانيين قاعدين في بري من زماااااااااان ديل هم العرفوا ناس عزام بالملعب ده والتنزانيين ديل قاعدين وسطنا من بدري شديد ودواعي الوطنية هي التي دفعتهم لخدمة عزام موش تنزانيين زيهم !!! ولكني اوصي تنزانيين السودان واقول ليهم ادخلوا الميدان مع تنزانيين عزام تتغلبوا كلكم يوم واحد وتريحونا عشان تتفرغوا للوطني التنزانية بتاعتكم دي عجبي المهم بالامس كنا حضوراً في اجتماع المريخ والشرطة والاتحاد العام الريس والامين العام وممثلو روابط التشجيع من رابطة سوق ليبيا ولجنة التعبئة وكان طارق سيد حضوراً انيقاً وشخصي الضعيف الطويل كان الاجتماع ناجحاً اكدنا فيه صفوية الشفوت واكدت الشرطة ذلك واكدنا فيه احترامنا للقانون لأننا صفوة وناقشنا المواقف التي تكررت وسكنت النفوس نحن لسنا بلطجية ولكنا لدينا كرامة وشهامة وشهامتنا ليست شهادات استثمارية ولكنها مواقف رجولية وبطولية نحترم الدولة ونحترم الهيئات لأننا محترمين ناقش الاجتماع السلبيات وحقيقة وجدنا من قيادات الشرطة الفهم الراقي والعالي ووجدنا منها حرصها على العلائق الطيبة بينها وبين جمهور الرياضة وحكينا كلو شيء حتي (ابنصات الدفارات) ويا بتاع الركشة زح خرجنا بمكاسب كبيرة للعلاقات بين الشرطة والجمهور واكدت الشرطة انها لا تجامل او تحابي شخص على حساب شخص وقلنا اذا تفلتنا يجوز للشرطة تطبيق القانون علينا ولكن لانتخيل تفلتاً من الشرطة لأنها يفترض فيها الحلم والوعي كالذي لمسناه عند قادتها واعلنت الشرطة منعها للبمبان في الاستادات ودي يسجلها التاريخ لينا بكرة ناس الحركة الوطنية يقولوا كمان عملوها هم والغريبة البمبان في الميدان جابوهوا زمان اساساً ليهم زي المدينة الرياضية تبرع بها الشهيد الزبير بمطار الخرطوم عندما اتى المريخ بمانديلا يعني مدينتنا الرياضية ومدينتنا العقربية والماعاجبوا يقيف في الزلط تدقشوا العربية المهم صافية لبن تلك كانت خلاصة الاجتماع واعلنت الشرطة دعمها لكل الفرق التي تمثل الوطن ويبدأ الدعم بمبارتنا اليوم شكراً قيادات الشرطة الواعية وشكراً قيادات المريخ الحليمة وشكراً روابط المريخ الشفتة وشكراً للاتحاد العام ممثلاً في الدكتور معتصم جعفر وقلنا للشرطة نريد ان نهتف من حنايانا وبكل قناعة البوليس بوليس الشعب بوليس الشعب سيحمي الشعب ايها الناس ستحيينا الشرطة عند وصولها للملعب.. وسنرد التحية بافضل منها لكل مقام مقال ومقالنا في مقام الاحترام هو الاحترام والتقدير ايها الناس القيادة العامة عقدت تنويراً جماهيرياً في النادي بالامس اسارير الفرح كانت بادية وبيارق النصر كانت تلوح وعيون الشفوت تبتسم عزام غزالة في وكر اسد مربعن اتعشى يا كنج ايها الناس بالقرآن مريخنا مصان وصدقوني باذن الله سنتأهل وبكري المدينة ليهو كلمة كلمتين وتشوف عيونكم هارد لك تنزانيين بري وتنزانيين عزام والسمبهار بنجدع في زنزبار برة وبعيد واتزنبري ايها الناس نراهن علي ان النصر يأتي من حناجر الشفوت كلنا من عصراً بدري نعصر عزام والنصر يأتي في اي وقت لانستعجله المهم خلال تسعين دقيقة البعدو ايها الناس ينطلق النصر من حناجرنا اليوم كلنا اسلحة للنصر لايوجد احتمال غير النصر والتأهل سنعلنها من داخل القلعه الحمراء من حناجر الشفوت المريخ للمرحلة المقبلة ايها الناس «إن تنصروا الله ينصركم» آها نجي لي شمارات والي الخرتوم والينا مايغيروك لينا جنا تعرفوا ولا جنا مابتعرفو سلك كهربا ننساك كيف والله يستر ما يجي نمر محل اسد والي لقاء سلك
