كعادة السواد الأعظم من السودانيين (مما تمغرب الواطا) يقوم العبد لله بالذهاب إلى (بقالة بيت المال) وهو يحمل (الجك) لشراء الفول والطعمية كوجبة عشاء روتينية لا يغيرها إلا الشديد القوي (اللي هم) الضيوف فإن كان هنالك ضيوف قمنا بعمل بعض (الحربشات) هنا وهنالك بما تسمح به الميزانية . بالأمس وبعد أن وضع (البائع) الفول داخل الجك بحث عن تلك الأكياس الورقية السميكة ليضع داخلها (الطعمية) فلم يجدها دلف إلى داخل البقالة وأحضر وريقات من صحيفة وضع عليها الطعمية فأخذت أغراضي وعدت إلى البيت ، بينما الاسرة مجتمعة على صينية العشاء ، أمسك إبني (ناجي) الذي لم يبلغ الحلم بعد بالصحيفة التي تبللت بزيت الطعمية وأخذ يطالع فيها ثم سالني : – إنتا يا بوي مساعد رئيس الجمهورية مش مفروض يكون سوداني – طبعن يعني ح يكون ألماني؟ – طيب يا بوي أقرأ الخبر ده (وناولني الصحيفة ) التي كانت بتاريخ 22 أغسطس 2013، وكان الخبر يقول : وصل مساء امس السيد جعفر الصادق الميرغني مساعد الرئيس عمر البشير الى الخرطوم قادما من العاصمة المصرية القاهرة والتي قضى فيها جزء من العيد وصام ” الستوت ” ، وكان السيد جعفر وصل الى القاهرة ثاني ايام عيد الفطر قادماً من مقر إقامته الدائم بلندن بعد صيام رمضان وحضور اول ايام العيد بالعاصمة البريطانية ، وكان في استقباله بمطار الخرطوم الفريق اول ركن بكري حسن صالح وزير رئاسة الجمهورية والاستاذ احمد سعد عمر وزير مجلس الوزراء وعدد من الوزراء والمسئولين. ما إن إنتهيت من قراءة الخبر حتي إلتفت إلى (ناجي) زاجراً : – يا ود إنتا حاسد وللا بغران؟ – كيفن يا بوي مساعد رئيس جمهورية ويكون المقر الدايم بتاعو لندن يعني يجي يقعد ليهو يومين تلاته ويرجع !! – فيها شنو يعني .. ما ممكن يكون ممشي الوظيفة بتاعتو (وتسبة ساااكت) – ما فاهم كيف يعني .. – يكون قاعد السنة كووولها في لندن وعامل ليهو قروب هو وناس مكتبو في (الواتس) – يعني يا بوي الزول الشغال هنا في الحكومة ما ضروري يمشي المكتب وممكن يوتسب ! – يوتسب شنوو يا إبني هنا الزول بشيلوهو (بدون وتسبه ذااااتو) – وهسه المساعد ده بيصرف مرتب عااادي – مرتب وكمان بدلات ومخصصات … مش طوااالي بيكون مساهر و أون لاين on-line وشريحتو – الإنجليزية- (فيها رصيد) ؟ – والله يا بوي وظيفة حلوة خلاس .. لكن هو بيعرف الحاصل في البلد كيف مثلاً وهو بعيد – ما تخلينا يا إبني ياااخ .. أفرض هو قاعد … يعني كان ح يعرف ؟ – هو يابوي قبل ما يبقى مساعد بالواتس كان وظيفتو (القبلها) برضو بشتغلا بالواتس ؟ – والله يا ولدي الشئ البعرفو دي اول وظيفه ليهو كان بالواتس كان (بي الما واتس) – وهسه يا بوي عااادي يقعد هناك (سنة) ويجينا كم يوم ويرجع ! – طبعن لازم يجي عشان يتفقد أحوال الرعية ويشوف الحاصل على (الشعب الفضل) شنووو .. الزيت بقي بى كم .. والرغيف بقي بى كم .. والمواصلات بقت بي كم .. ولحمة (الفتة) بقت بى كم – والله يابوي دي قمة المسؤولية … والله البلد دي كان لقت ليها خمسين مسؤول يديروها (بالريموت) زيو كده وهم قاعدين بره كانت .. – كانت شنو .. يا ناجي – كانت يا بوي لحقت أمات طه !! – وإنتا قايلا بالشايفنو ده ما لحقت أمات طه !! كسرة : عشان (سعادتو) ما يتعب حقو نشيل البلد ونوديها ليهو هنااااك في مقر (إقامتو) !! كسرة ثابتة (قديمة) : أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و
