* طالعنا ببعض الصحف والمواقع تصنيفاً غريباً * تصنيف فيهو الجماعه نمرة أربعه * ونحنا نمرة طمنطاشر * قلنا لو البتكلم مجنون * البسمع يكون عاقل * رابع ايه الإنت جاى تقول عليه * تصنيف مايو 2015 فيهو؟ * الأول مازيمبى التانى المريخ * الباقى كلو طيش * بطولات مزيفة ومشتوله * وعمرها المشتوله ما بتبقى بطوله * المشتولة زى كاس الكونغو سنة ستة وستين * المطار بى شتلكم ده ما بتشموهوا * تشموهوا قدحه * فرق بين تصنيف وتصفيف * ممكن تصفف شعرك متل ما بدك * لكن ما ممكن تصنف نفسك متل ما بدك * المهم * مقترح الإستفادة من قروبات الشفوت فى دعم النادى لاقى قبولاً كبيراً * والواقع يقول ان ذلك ممكناً * ودوننا قروب أحباب حول المريخ * يعملون على تسليم المجلس دعماً وقدره خمسمائة مليون جنيه بالقديم * وعلمنا من الأخ مهدى الصادق من مريخاب الرياض * أن لديهم كيان مريخى تحت مسمى ملتقى مريخاب الرياض * أول دعم ليهم للمريخ وصل مبلغ خمسة وعشرون الف ريال * وأنها البداية * وعلمنا من الأخ عبدالله محمد الحسن * شقيق الأستاد أحمد محمد الحسن * أنهم أسسوا قروباً يجمع كل رؤساء الروابط بالمملكة والخليج تقريباً * وبعض الشخصيات الهامة والمهتمة والمهمومة بدعم الزعيم * يعنى يا عبدالله قروب صفوة الشفوت * خاص صفحة الأحمر الوهاج * أيها الناس * شخصياً بعرف ما يفوق المائة قروب مريخى * فى مائة عضو * ده غير الما بعرفهم * لو كلو قروب عمل لينا ميزانيتو على الف دولار شهرياً * صدقونى ميسى ما بعيد عننا * لذا ولذلك * نتمنى ان نتناول الموضوع بجديه ونخضعه للدراسه * لنصل للكيفية التى تجلب دعم القروبات للنادى * ذلك الدعم الثابت والمؤثر * وليه ما نعمل مؤتمر قروبات الشفوت الجامع * نتداول فيه * ونتناول طريقة دعمنا الفكرى والمادى والمعنوى للزعيم * ويبقى المؤتمر عندو لقاء ثابت ربع سنوى أو نصف سنوى * لنطور العمل من خلاله * صدقونى * البلزنا ما بيرمينا * تعالوا ننافس بعضنا فى دعم حبنا يا شفوت * أيها الناس * روابط التشجيع تعد فى معيناتها بدقة * تنافس بعضها * لتقوم بدورها كاملاً * القصة فيها مطار * محتاجة قشرة من امها * وصدقونى شامى لى ريحة مطار * أيها الشفوت * المرحلة القادمة مرحلة الإقدام فيها فرض عين * ما فرض كفايه * المجموعات تبدأ سعادتها من رمضان * وفى سعادة اكتر من السعاده الفى رمضان * رمضان والكورة بره والنهار * فى سعاده اكتر من كده؟ * اللهم بلغنا رمضان * وأنعم علينا بالعمرة فى رمضان * وأوعدنا بالحج يا كريم * نزور مكه ونمشى المدينة * نحب سيد المدينة * ونفرح بزيارة المدينة * ونسعد بى قون المدينة * الله يجيبك يا رمضان لينا * المهم * علمنا أن إسماعيل صديق قد وقع بمريخ الفاشر * أتوقع له نجاحاً كبيراً * فإسماعيل موهوب موهوب * ولكن حظه لم يحالفه أيام كان بكشف المريخ * خاص صفحة الأحمر الوهاج * بالتوفيق يا كابتن * ولك ان تعود لمكانك بالمنتخب * المهم * قالوا فى واحد مغترب * بونس فى جدو * جدو هلالابى * ويحكى لى جدو عن الحج * وعن عظمة المشاعر والشعائر * والجد متكى يسمع * الكلام عاجبو * والولد يشيل ويغرى فى الجد بالحج * والجد لعابو سال * بقى يتخيل روحو فى الحج * ويسأل عن الحج * ويستمتع بما يسمع * الجد هلالابى كبير * قال وطت اصلو الهلال ما وداهو المطار * أخير يوديهو ولد ولدو * ويمشى الحج * قام قال لى ولدو القعاد كلو مكه يا ولدى محل واحد بس؟؟؟ * ولدو قال ليهو أبداً * لازم تمشى المدينة * عمك قعد حيلو * قال ليهو جابت ليها مدينه كمان؟ * خليناهو * أيها الناس * إن تنصروا الله ينصركم * أها * نجى لى شمارات والى الخرتوم * والينا * دايرين تفتحوا المدارس فى السخانه وتكتلوا أولادنا علينا؟؟؟ * دى سخانة مدارس يا والينا؟؟؟ * والله النسوان فى السخانه دى فطير فطور العريس ما بفتحوا لينا * عشان بخمر يا والينا * صلحتوا الفصول يا والينا؟ * عشان ما تقع فينا * دربتوا العقول يا والينا؟؟؟ * عشان يعرفوا يشرحوا لينا * كترتوا الفول يا والينا * عشان شفعنا الجوع ما يقرضهم علينا * والنسألك يا والينا * إذا صدقتوا ميدان مدرسه لى زولاً فينا * يحق ليهو يبنى بيت لى روحو * وبيوت لى أخوانو جوه المدرسه يا والينا؟ * دحين ده ما إنقاص من مساحة المدرسة المفروضة تهوينا؟ * خاص صفحة الأحمر الوهاج سلك كهربا ** ننساك كيف وأى فسحة عامة بقت مصلحه خاصة غصباً عننا وعلينا؟!! والي لقاء سللللللللك
