انتشر الواتساب.. وأصبح هوس كل الناس.. وكل الشباب والشابات.. وبعض الشياب.. والشايبات.. وكم من غافل نصب عليه بواسطته وكم من غافل ما زال النصب عليه مستمرا.. وردنا أن الزين ود عبد الله ود أحمد.. من قبيلة الواطساب. والمقيم في الخليج.. لمت فيهو واحدة من نفس القبيلة مقيمة في السودان.. عملو حبو بعض.. في الواطساب رسل صورتو الواقف على حليو وحاشي القميص اللخدر وقاطع نصو وبنطلون أخدر برضو كباية ولابس ساعة يد.. ومربع إيديهو فوق سدرو.. شافت الصورة قالت ليهو وهي تقصد شخصه المنشحط في الصورة “عسووووووووولي.. عسوووووووولي.. عسووووووولي”. قال لها في الواتس برضو “هههههههههه.. اصلي من الله خلقني عسل كدي.. من كنت في البلد وأنا عسل.. انتي قايلة بقيت عسل هنا؟.. عان دي؟”.. ثم استمر “اضحكك؟”.. ردت “يا ريت.. من الصباح ما ضحكتّ”.. كتب لها “لما تجي رسالة منك بتسوي صوت (جلا للو).. زي الطشت الوقع في البلاط.. هههههههههههه” ردت هي “ههههههههه دمك خفيف وحات الله” رد وهو مصدقا لما بين يده “اصلي كدي.. وحات الله تقعدي معاي علا مصارينك يتقطعّن من الضحك.. ما تشوفيني كدي؟ أنا فكاهي خلاس.. عان دي؟” كتبت ليهو ويبدو علي ملامح وجهها القرف والامتعاض”لكن قميصك رهييييييييب…. ولونو حلووووووو” رد.. وهو واثق انها وقعت في الشرك وإمعانا في الإغراء “ههههههه.. عندي تلاتة قمصان خُدُر غيرو.. انتي قايلاهو فرد واحد؟.. عان دي؟” كتبت له وفي سرها تصفه بالداقس المتخلف “البنطلون مبااااااااالغة.. .وعامل ماتش مع القميص”.. رد عليها “أي ماطش شديد.. أصلي قاعد أمطش كدي.. هدومي كلها ماطشيات.. البنطلون كباية.. عندي غيرو تاني اتنين كبايات.. انتي قايلة بس هو برااااهو، عوينة ام صالح؟..عان دي؟” “ووووووووب علي والحزام!.. الحزام يا الزين.. رهييييييب” ثم استمرت في الدردشة.. رد هو وهو جذل “ايوا.. أصلي قاعد اتحزّم كدي.. عندي حزامات كتااااااار.. انتي قايلة ما عندي غيرو؟…. عان دي؟” قالت له “الله.. . الساعة حلوة يا زيزوني.. اللزيزوني”.. تقصد بزيزوني دلع للزين.. ولزيزوني تصغير لي لزيز.. قالتها وهي تعلم ومتيقنة انها كضابة وستين كضابة… أما هو فيرسل (وشي خجلان) من كلمة زيزوني وتلات وشيات خجلانات من كلمة لزيزوني.. ويرد”آآي.. الساعة يا بانية أصلية.. انتي قايلاها صينية؟.. عان دي؟.. و عايني جاي، مضبوطة على الساعة اللت لندن.. انتي قايلاها مضبوطة على ساعة السودان؟.. حسي في ضمتك دي.. دي ساعة يضبوطوها علي السودان ؟.. عان دي؟” قالت تداعبه.. وتغويهو” آآآآآآآه(رسمة قلب مشقوق النص)…. والله يا زيزوني أنا بموت فيك.. بحبك.. حبك ح يجنني” رد عليها وهو مبسوط من نفسو انو جنن بت الناس “يجننك أكتر من كدي؟.. إن جننك أكتر من كدي، نان البيعرسك منو؟… عان دي”!!
