عمنا (التوم ود شوك الكتر) – كان زول صعب….مشلخ (109). أ – خ. هيئة دبلوماسية. زمان في (شلوخ) كدا. هسع اختفت – ما عارفها راحت وين؟. عليكم الله دي (سخانة) تخلي ليها (شلوخ). الشلوخ ذاتها اختفت. عمنا (التوم ود شوك الكتر ) كان زول صعب – لكن مع صعوبيتو دي للحقيقة كان عندو (جلابية واحدة). ولا داسيها. ما قاعد يجامل ليه زول. لا بكضب لا بياكل (الفراخ). الفراخ الدخلها هنا شنو؟. والله (تلبت) براها – ودخلت في السطر. من غير ما اشعر. قلت ليكم قبل كدا في (كلمات) ما عندنا عليها (سيطرة) – بتلب براها في الكلام. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). عمنا (التوم ود شوك الكتر) وقت يرفع ليه فاتحة – ساعة ونص ما بنزل ايدو. لمن يرفعو الفراش ..هو ايدو ما بنزلها. زول صادق ..وامين في دعواته. واضح وما بحب (الفول بالجبنة). الفول بالجبنة هسع الدخلو هنا شنو؟. والله الفول بالجبنة ما عندو اي علاقة بالموضوع. غايتو انا لمن (الكهربة) تكون قاطعة ..عمودي دا بتدخل فيه كلمات غير ارادية. من غير ما اشعر. ما عارف علاقة انقطاع التيار الكهربائي – بالكلام البقول ليكم فيه دا شنو؟. التوم ود شوك الكتر ..مرة جانا الصباح ..لملم ليك اولاد الحلة ديل كلهم. نحن قلنا الليلة عمك دا عندو شنو؟. يا ربي عندو (نفير)؟. عمك التوم ود شوك الكتر وقف ليك وسط الناس – واتلفت شمال ويمين ..وقال ليهم يا جماعة ..يا شباب ..في زول منكم قبل كدا اكلو (اسد). الجماعة قالوا ليه ولو في زول اكلو اسد ..البوقفو معانا شنو في (السخانة) دي؟. أنت يا زول ما نصيح. الاسد ذاتو البجيبو في (الهجيرة) دي شنو؟. والله السخانة دي ..اخير منها الزول ياكلو اسد. عمك التوم ود شوك الكتر ..قال ليهم شفتوا …هدف مهند الطاهر في جمال سالم زي الزول الاكلو (اسد). الجماعة قالوا ليه والله يا عمك ..الاحساس دا نحن ما جربناه. ولا بنعرفو. التوم ود شوك الكتر – قال ليهم طيب يا شباب ..فيكم زول اكلو (تمساح). الجماعة كلهم استغربوا ..وقالوا ليه يا عمك لو في زول فينا اكلو تمساح..بكون عايش؟. مالك انت الليلة من الصباح؟. التوم ود شوك الكتر ..قال ليهم شفتوا هدف مهند الطاهر في المريخ – زي الزول الاكلو تمساح. الهدف دا عمل فيهم عمايل عجيبة. كشف ليك المستور كلو. 6 استقالو. و4 قفلوا تلفوناتهم. والمجلس اتهم اعلام المريخ. فضائح شديدة. الجماعة قالوا ليه والله نحن احساس الزول الاكلو (تمساح) ما جربناه ..كدا شوفنا لينا (تشبيه) تاني. شوفنا لينا حاجة اخف من كدا. عمك التوم ود شوك الكتر. قال ليهم : نمر؟. قالوا ليه ابدا..ما جربنا الموضوع دا. عمك قال ليهم طيب فيكم زول يا شباب اكلو (غزال). الجماعة كلهم قاموا ليك في التوم ود شوك الكتر – وقالوا ليه نحن (اسد) ما اكلنا ..تقول لينا (غزال). في زول ممكن ياكلو (غزال) – يا عمك انت ما تقول لينا كلام معقول شوية. التوم ود شوك الكتر ..طلع طاقيتو من رأسو ..وقال ليهم تصوروا المريخ اكلو (غزال). المريخاب الكلام ما عجبهم. عمك واصل في كلامو …وقال ليهم غزال يعمل فيكم كدا. غزال. غزال يا مفترين. طيب (الثعلب) يعمل فيكم شنو؟. ثلعبونا!!. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الهلالاب الفي الحي ..قالوا لي التوم ود شوك الكتر ..شوف لينا مثال تاني – نحن هدف مهند الطاهر بعد الشيء العملو في المريخ اصلو ما فايتنو. عمك ..قال ليهم في زول منكم وقعت فيه (صاقعة) جابت خبرو؟. الجماعة قالوا ليه ابدا. التوم ود شوك الكتر ..عاين ليك فيهم لقى وسطهم في مريخابي واقف ..جراهو ليك من قنبورو ..وقال ليه انت البوقفك مع الشباب ديل شنو؟..نحن موش سألنا وقلنا في زول وقعت فيه صاقعة وجابت خبرو وانت واقف وما قلت حاجة؟. المريخابي قال ليه بلحيل. عمك قال ليه طيب المسكتك شنو؟…ما تقول انا وقعت فيني صاقعة وجابت خبري. المريخابي قال ليه لكن انا ما وقعت فيني صاقعة. التوم ود شوك الكتر – قال ليه انت عاوز ليك صاقعة اكتر من هدف مهند الطاهر دا. هسع الهدف دا ما جاب خبركم. ما فرتكم قروب ..قروب. المريخابي قال ليه بلحيل. التوم ود شوك الكتر – قال ليه طيب واقف مع اسياد البلد ديل مالك في صف واحد؟ – انتوا (الصاقعة) البتقع فيكم ما بتعرفوها. المريخابي ما عرف يقول شنو؟. التوم ود شوك الكتر ..وجه ليه الحديث – قال ليه تاني لو في زول قال ليك وقعت فيك صاقعة قول ليه وقعت. ترفع ايدك اول زول. لو في زول قال ليك عفصك قطر ..قول ليه عفصنا. ترفع ايدك. لو في زول قال ليك وقعت من طيارة. قول ليه وقعت. ترفع ايدك. الحاجات دي هدف مهند الطاهر كلها عملها. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الهلالاب اقتنعوا ليك بالكلام. انبسطوا انبساطة شديد. كيف شديد. في واحد من الهلالاب قال لي عمك : يا عمنا اها انت بتقترح علينا شنو بعد هدف مهند الطاهر في جمال سالم؟. التوم ود شوك الكتر ..قال ليهم انا بقترح عليكم تكونوا ليكم (لجنة). واحد منهم قال ليه اوعك تقول لينا اعملوا ليكم (وقفة احتجاجية). التوم ود شوك الكتر – قال ليهم وقفة شنو كمان؟. الوقفة الاحتجاجية انتوا مالكم ومالها؟. الجماعة قالوا ليه طيب اللجنة نعمل بيها شنو؟. التوم ود شوك الكتر ..قال ليهم اللجنة تمشوا تقابلوا بيها عمكم (السر احمد قدور). في واحد منهم – قال ليه اوعك تكون عاوزنا نقول للسر احمد قدور امسك المريخ كمدير فني. التوم ود شوك الكتر – قال ليهم يا جماعة خلوني اتم كلامي ..ما تلفحوا الكلام. الجماعة قالوا ليه اللجنة البتمشي تقابل السر أحمد قدور مهمتها شنو؟. التوم ود شوك الكتر – قال ليهم اللجنة دي مهمتها تمشي تطلب من السر أحمد قدور ضم (مهند الطاهر) في برنامج (اغاني واغاني). الجماعة قالوا ليه والله نعم الطلب – اصلا نحن لا بنفع معانا طه سليمان ولا عاصم البنا ولا حسين الصادق – نحن عاوزين (مهند الطاهر). جيبوا لينا (مهند الطاهر) في (اغاني واغاني) خلوه يريحنا في (عضمنا) دا. شبعونا في (الهوبات) دي. نساكم كوّنوا لجنتهم ومشوا على السر أحمد قدور. لكن ما عارف تاني الحصل عليهم شنو؟. انا رسلت العمود قبل ما اعرف الحصل. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………… و مجلس المريخ هاجم اعلام المريخ. جرايد المريخ كترت. عشان كدا مشاكل المريخ بقت كتيرة. اي زول عاوز يعمل فيها (المدير الفني). انتوا ما عاوزين ليكم لجنة تسيير..انتوا مفروض يخلوا ليكم المريخ دا تديروه بي اعمدتكم. بلجيكي معاكم يعمل شنو يعني؟. كفاية (العشري). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……….. السيدة (ل) – البطيخ وهدف مهند الطاهر في المريخ والتفاح والموز والمنقا والجوافة والقرع. الحاجات دي كلها من (الفواكه) إلّا الحاجة الاخيرة. وقرّط على كدا.
